ભીષાભાઈ જોષીને મેંદરડાની કોર્ટે દોષિત જાહેર કર્યાની સાથે એક વર્ષની સજા અને 5 હજાર રૂપિયાનો દંડ પણ ફટકાર્યો છે.
જૂનાગઢના કોંગ્રેસના ધારાસભ્ય ભીખા જોષી દોષી કરાર
2008ના એક કેસમાં મેંદરડા કોર્ટે સંભળાવી સજા
1 વર્ષની સજાની સાથે 5 હજારનો દંડ પણ ફટકારાયો
જૂનાગઢના કોંગ્રેસી ધારાસભ્ય ભીખા જોષીને કોર્ટે દોષિત જાહેર કર્યા છે. વર્ષ 2008ના એક કેસમાં મેંદરડાની કોર્ટે આ ચુકાદો સંભળાવ્યો છે. જો કે, તેમની પાસે હજુ ઉપલી કોર્ટમાં જવાનો વિકલ્પ ખુલ્લો છે. કોર્ટે દોષિત જાહેર કર્યાની સાથે એક વર્ષની સજા અને 5 હજાર રૂપિયાનો દંડ પણ ફટકાર્યો છે.
ભીખાભાઈ જોષી 2017ની વિધાનસભા ચૂંટણીમાં કોંગ્રેસના ઉમેદવાર તરફથી જૂનાગઢ બેઠક પરથી જીત મેળવી હતી. લાંબા સમયથી જૂનાગઢના ધારાસભ્ય મહેન્દ્ર મશરૂને હરાવી ભીષાભાઈ જોષી ધારાસભ્ય બન્યા હતા.
આ પ્રમાણે હતો સમગ્ર મામલો
વર્ષ 2008 માં મેંદરડામા મારામારીના કેસમાં ફરીયાદ નોંધાઈ હતી. જે મામલામાં ભીખાભાઈ જોષીના પુત્ર ભરતભાઈ, મનોજભાઈ અને જેન્તીભાઈ પણ આરોપી હતા. મેંદરડા તાલુકાના અમરાપુર કાઠીના ગામે 4 નવેમ્બર 2008ના રોજ સમગ્ર ઘટના બની હતી. જેમાં ગ્રામ પંચાયતની ચૂંટણી બાબતે મનદુઃખને લઈ ઘર્ષણ સર્જાયું હતું. ચૂંટણી ખર્ચની 15 હજારની રકમ બાબતે મારામારી થઈ હતી. અને પછી પોલીસમાં ફરીયાદ પણ નોંધાઈ હતી. ભીખાભાઈ સહીત તેમના પુત્રોને કોર્ટે એક વર્ષની સાદી કેદની સજા અને પાંચ હજારનો દંડ ફટકાર્યો છે. કોર્ટના ચુકાદા બાદ ભીખાભાઈએ ઉપલી કોર્ટમાં જવા માટે તરત જામીન અરજી દાખલ કરી અને ભીખાભાઈના જામીન મંજૂર પણ થઈ ગયા છે.