ચૂંટણી / પક્ષવિરોધી પ્રવૃત્તિને લઇ કોંગ્રેસ અલ્પેશને કરી શકે છે સસ્પેન્ડ

અલ્પેશ ઠાકોરે કોંગ્રેસમાંથી રાજીનામું આપી દીધું છે. ત્યારે હવે કોંગ્રેસ અલ્પેશ ઠાકોરને આજે પક્ષમાંથી સસ્પેન્ડ કરી શકે છે. અલ્પેશનું રાજીનામુ હજુ સુધી કોંગ્રેસ પ્રમુખને મળ્યું નથી. ત્યારે પક્ષવિરોધી પ્રવૃત્તિને લઇ કોંગ્રેસ અલ્પેશને સસ્પેન્ડ કરી શકે છે.
 

મળતી માહિતી મુજબ, બનાસકાંઠામાં અપક્ષ અલ્પેશ ઠાકોર પ્રચાર કરી રહ્યા છે. ત્યારે કોંગ્રેસ તમામ બાબતોના પુરાવા એકત્ર કરી રહી છે અને સસ્પેન્ડ કર્યા બાદ ધારાસભ્ય પદેથી અલ્પેશને હટાવવાની પણ પ્રક્રિયા કોંગ્રેસ કરી શકે છે.

તમને જણાવીએ કે, અલ્પેશ ઠાકોરે કોંગ્રેસના તમામ હોદ્દા પરથી રાજીનામુ ધરી દેતા ઠેર ઠેર વિરોધનો શૂર ઉઠ્યો છે. ત્યારે ખુદ ઠાકોર સેના પણ અલ્પેશ ઠાકોર સામે મેદાને આવી છે. ગઇકાલે મહેસાણા ઠાકોર સેનાએ અલ્પેશ સાથે છેડો ફાડી નાખ્યો છે. આગામી સમયમા અલ્પેશ વિરૂદ્ધ કાર્યક્રમ આપવાની ચીમકી ઉચ્ચારી છે.
 

ઠાકોર સેનાનો આક્ષેપ છે કે, અલ્પેશ ઠાકોરે સમાજ સાથે દગો કર્યો છે. એટલું જ નહીં ભાજપ સાથે સોદો કરી અલ્પેશ ઠાકોરે કોંગ્રેસના તમામ હોદ્દા પરથી રાજીનામું આપ્યું હોવાનો પણ ઠાકોર સેનાએ આરોપ લગાવ્યો છે. મહત્વનું છે કે મહેસાણા ખાતે મળેલી ઠાકોર સેનાની બેઠકમાં આ નિર્ણય લેવાયો છે.

બીજી બાજુ અલ્પેશ ઠાકોરની ઠાકોર સેનાના ભાગલા પડી ગયા છે. રાધનપુરમાં જ અલ્પેશની ઠાકોરસેનામાં ભાગલા જોવા મળી રહ્યા છે. ઠાકોર સેનાના નેતા ગોવિંદ ઠાકોરે જગદીશ ઠાકોરને સમર્થન જાહેર કર્યું છે. જગદીશ ઠાકોરની જાહેરસભામાં ગોવિંદજી ઠાકોરે જણાવ્યું કે, અમે જગદીશ ઠાકોરને દોઢ લાખ મતોથી જીતાડીશુ. અમે જગદીશ ઠાકોરને જીતાડવા સમર્થકોને કામે લાગવા આહવાન કર્યું છે.