પાટણ: આગામી લોકસભાની ચૂંટણીમાં અલ્પેશ ઠાકોરને ટિકિટ મળે તે માટે ચર્ચાઓ ચાલી રહી છે. ત્યારે હવે પાટણ કોંગ્રેસમાં ભંગાણની સ્થિતી સર્જાઈ છે. પાટણમાં કોંગ્રેસના ઠાકોર સમાજના નેતાઓ દ્વારા શક્તિ પ્રદર્શનનુ આયોજન કરવામાં આવ્યુ હતું.
કોંગ્રેસના ઠાકોર સમાજના નેતાઓ દ્વારા જૂના સર્કિટ હાઉસમાં શક્તિ પ્રદર્શન યોજાયું હતું. પૂર્વ ધારાસભ્ય જોધાજી ઠોકાર સહિતના આગેવાનોએ શક્તિ પ્રદર્શનનું આયોજન કર્યુ હતુ. આ કાર્યક્રમમાં ધારાસભ્ય અલ્પેશ ઠાકોર અને જગદીશ ઠાકોરનો જાહેરમાં વિરોધ કરાયો હતો.
છેલ્લા ઘણા સમયથી કોંગ્રેસના ધારાસભ્ય અલ્પેશ ઠાકોરને લઇને ઘણી ચર્ચાઓ થઇ રહી છે. લોકસભા ચૂંટણી પહેલા અલ્પેશ ઠાકોરની ભાજપમાં જોડાવાની ચર્ચાએ વેગ પકડ્યું હતું. તો હાલમાં જ કોંગ્રસેની એક બેઠકમાં પણ અલ્પેશ ઠાકોરની ગેરહાજરી લોકોને આંખે ઉડીને વળગી હતી. ત્યારે ફરી અલ્પેશ ઠાકોરનું નામ ચર્ચાના કેન્દ્રમાં છે.
તમને જણાવીએ કે, થોડા દિવસો પહેલાં અલ્પેશ ઠાકોરનો તેમના જ સમાજના લોકો દ્વારા પાલનપુરમાં ઠાકોર સમાજની ચિનોંતન શિબિરમાં વિરોધ કરવામાં આવ્યો હતો. જેમાં ઠાકોર સમાજ અને ઠાકોર સેના સામસામે આવી હતી અને હોબાળો થયો હતો.
ઉલ્લેખનીય છે કે, કોંગ્રેસના ઠાકોર સમાજના નેતાઓ અલ્પેશથી નારાજ છે. અલ્પેશ ઠાકોર દ્વારા ઠાકોર સમાજને ભ્રમિત કરવામાં આવી રહ્યો હોવાનું મોટા ભાગના નેતાઓ માની રહ્યા છે. ભાજપ અને કોંગ્રેસના નેતાઓ આ મુદ્દે એક છે. તેઓ હવે જાહેર કાર્યક્રમો પણ આપવા લાગ્યા છે.