ચૂંટણી / કોંગ્રેસના નેતાએ ભાજપના પૂનમ માડમ માટે મત માગ્યા, જુઓ વીડિયો

કોંગ્રેસના સભ્યોએ જાહેરમાં ભાજપ માટે મત માગ્યા હતા. કોંગ્રેસના નેતા રામ કરમુરનો વિડીયો વાયરલ થયો છે. જેમાં રામ કરમુરે ભાજપને સમર્થન આપવા ગામ લોકો સાથે ચર્ચા કરી હતી. 

મહત્વનું છે કે, રામ કરમુર જામ ખંભાળીયાના કાટકોલા ગામના રહેવાસી છે. રામ કરમુરના પત્ની તાલુકા પંચાયતમાં કોંગ્રેસ તરફથી ચૂંટાયા હતા. પરંતુ રામ કરમુરે ભાજપના પૂનમ માંડમ માટે મત માગ્યા હતા. વિડીયો વાયરલ થતા દ્વારકા જિલ્લા કોંગ્રેસમાં ભંગાણ સર્જાયું છે.

જોકે રામ કરમુર વિક્રમ માડમના નજીકના માણસ ગણાય છે. વિક્રમ માડમના મત વિસ્તારમાં કોંગ્રેસના કાર્યકર્તાઓએ ભાજપ માટે મત માગ્યા હતા. વિક્રમ માડમના ઇશારે પૂનમ માડમ માટે મત માગ્યા હોવાની ચર્ચાઓ તેજ થઇ છે.

અત્રે ઉલ્લેખનીય છે કે, બીજી તરફ કોંગ્રેસના સભ્ય રામસી મારૂની ઓડિયો ક્લિપ વાયરલ થઇ છે જેમાં તેઓ ભાજપ તરફી મતદાન માટે આપી સૂચના રહ્યાં છે. સ્થાનિક આગેવાનને ભાજપને મત આપવા માટે વાત કરી હતી. આ ઓડિયો ક્લિપ વાયરલ થતા કોંગ્રેસમાં ખળભળાટ મચી જવા પામ્યો છે. કોંગ્રેસના સભ્યોએ ભાજપ માટે કામ કર્યું હોવાની ચર્ચા તેજ બની છે. કોંગ્રેસના અન્ય આગેવાનોએ પણ ભાજપ ફાયદો કરાવવા કામ કર્યું હોવાના આક્ષેપ થઇ રહ્યા છે.