લાલઘુમ / ચૂંટણીમાં કમા પર પણ રાજકારણ: ભાજપ મંત્રીએ રાહુલ ગાંધીની ઠેકડી ઉડાવી તો બરાબરની ભડકી કોંગ્રેસ

• કોંગ્રેસ ઇન્ચાર્જ પ્રવકતા આલોક શર્માનું નિવેદન 
• ભાજપ કામ કરતી નથી સમાજમાં વિભાજનના નામે લે છે મતો: કોંગ્રેસ  
• કમો નહીં તેની માતાને પણ ટાર્ગેટ કરવામાં આવીઃ આલોક શર્મા

ચૂંટણી નજીક આવતા સંબોધનમાં નેતાઓના બફાટ અને વિવાદ શરૂ થઈ ગયા છે. ભાજપની ગૌરવ યાત્રામાં અંબાજી ખાતે આવેલા મધ્યપ્રદેશના તબીબી શિક્ષણ મંત્રી વિશ્વાસ સારંગે રાહુલ ગાંધીની સરખામણી કોઠારીયાના દિવ્યાંગ કમા સાથે કરતા વિવાદ સર્જાયો છે. જેના પર હવે કોંગ્રેસે આક્રોશ વ્યક્ત કર્યો છે. કોંગ્રેસના ઇન્ચાર્જ પ્રવક્તા આલોક શર્માએ આકરી પ્રતિક્રિયા આપી છે. 

ભાજપ આવ્યા બાદ વધ્યું હેટ સ્પીચનું પ્રમાણઃ આલોક શર્મા
આલોક શર્માએ કહ્યું કે, ભાજપ માટે ચૂંટણી જીતવાનું મુખ્ય હથિયાર હેટ સ્પીચ છે. દેશની સર્વોચ્ચ અદાલતે પણ હેટ સ્પીચ અંગે ચુકાદો આપતા ચિંતા વ્યક્ત કરી છે. ભાજપ આવ્યા બાદ હેટ સ્પીચનું પ્રમાણ વધ્યું છે.

કોંગ્રેસ આને વખોડે છે: આલોક શર્મા
તેમણે કહ્યું કે, ગુજરાતમાં ડ્રાઉન સિન્ડ્રોમથી પીડિત એક બાળક છે, લોકો તેને કમાના નામથી ઓળખે છે, તે દિવ્યાંગ છે. ગુજરાતમાં આવેલા મધ્યપ્રદેશના મંત્રીએ માત્ર કમાનો જ નહીં પરંતુ સમગ્ર દેશના દિવ્યાંગોનો મજાક ઉડાવ્યો છે, જે એક દુર્ભાગ્યપૂર્ણ છે. ભાજપના નેતાએ માત્ર કમાને જ ટાર્ગેટ નથી કર્યો પરંતુ તેની માતાને પણ ટાર્ગેટ કરી છે. કોંગ્રેસ પાર્ટી આની કડક શબ્દોમાં નિંદા કરે છે. 

ભાજપના નેતા વિશ્વાસ સારંગનો એક વીડિયો વાયરલ 
વાસ્તવમાં મધ્યપ્રદેશ ભાજપના નેતા વિશ્વાસ સારંગનો એક વીડિયો વાયરલ થયો છે. જેમાં તેઓ કોંગ્રેસ નેતા રાહુલ ગાંધીની સરખામણી કમા સાથે કરી રહ્યા છે. વીડિયોમાં તેઓ કહી રહ્યા છે કે, કમાએ ભારત જોડો યાત્રા શરૂ કરી છે. તે કહી રહ્યો છે કે હું ભારતને જોડીશ... ભારતને જોડીશ. કમો કહે છે કે અમે ગરીબી હટાવશું પરંતુ પોતે 40 હજાર રૂપિયાની ટી-શર્ટ પહેરે છે.  ભારત જોડવાનું કહીને કોંગ્રેસનો કમો યાત્રા પર નીકળ્યો છે અને આ કમાને ગળે લગાડવા માટે કોઈ ના મળ્યું તો એ યુવતીને ગળે લગાવી જે યુવતી ભારત તોડવાની વાત કરે છે અને પાકિસ્તાન જિંદાબાદના નારા લગાવે છે. કમાની માતાના હાથમાં રિમોટ હતું, તે મનમોહનસિંહને રિમોટથી કંટ્રોલ કરતી હતી.