દાન ધમણનું, મળી ધમણી / ધમણ વિવાદ : કોંગ્રેસે કહ્યું જ્યોતિ CNCએ મફતમાં નથી આપ્યાં, માલિકે કહ્યું દાન કરનારી સંસ્થા પણ અમારી

• ધમણ-1 જ્યોતિ CNCએ સરકારને મફતમાં નથી આપ્યુંઃ ધાનાણી
• નીયો રાજકોટ ફાઉન્ડેશન અમારી જ સંસ્થાઃ પરાક્રમસિંહ
• જ્યોતિ CNCએ ધમણ માટે દાન સ્વીકાર્યાની વાત પરાક્રમસિંહ કરી ચૂક્યા છે

ધમણ-1ને લઇને વિપક્ષ નેતા પરેશ ધાનાણીએ આરોપ લગાવતા કહ્યું કે, ધમણ-1 જ્યોતિ CNCએ સરકારને મફતમાં નથી આપ્યું. ધમણ-1 માટે નીયો રાજકોટ ફાઉન્ડેશને નાણા ઉઘરાવ્યા છે. ત્યારબાદ આ નાણા ઉઘરાવીને જ્યોતિ CNCને ચુકવ્યા છે. મુખ્યમંત્રીએ મિત્રનો ખરાબ માલ વેચવા પ્લાન બનાવ્યો હતો. નાણા સંસ્થાએ આપ્યા અને વિના મુલ્યે મળ્યાનું સરકારે રટણ કર્યું કર્યું. આ વેન્ટિલેટર માટે વિવિધ સંસ્થાના નાણાનો સરકાર હિસાબ આપે.

""દાન ધમણનું, મળી ધમણી""

કોરોનાની વૈશ્વિક મહામારી વચ્ચે ગરીબ
ગુજરાતને અંદાજીત અેક હજાર જેટલા
"ધમણ-૧" પૂરા પાડવા માટે..,

'જ્યોતિ સીએનસી'ને "ધન-દાન" કરનારા
"'નિયો-રાજકોટ ફાઉન્ડેશન'" તથા તમામ
દાતાઓને અંતરથી અભિનંદન પાઠવું છું.!#ગુજરાત_બચાવો_અભિયાન pic.twitter.com/pMinHA8rpU

— Paresh Dhanani (@paresh_dhanani) May 24, 2020

નીયો રાજકોટ ફાઉન્ડેશન અમારી જ સંસ્થાઃ પરાક્રમસિંહ

મહત્વનું છે કે, 4થી એપ્રિલના રોજ CNCના પરાક્રમસિંહે પ્રેસ કોન્ફરન્સમાં આક્ષેપોના જવાબ આપ્યા હતા. જેમાં પરાક્રમસિંહે સ્વીકારેલું કે મારા મિત્ર સર્કલના ગ્રુપે દાન કર્યું છે. પહેલા 1 હજાર વેન્ટિલેટર માટે પરાક્રમસિંહે દાન સ્વીકાર્યાનું કહ્યું હતું. 1 હજાર પછીના ધમણ માટે સરકાર પાસેથી પૈસા લેવાની વાત કરી હતી. ધમણ મુદ્દે જયોતિ સીએનસીના પરાક્રમસિંહ જાડેજાએ ખુલાસો કર્યો છે કે, નીયો રાજકોટ ફાઉન્ડેશન અમારી જ સંસ્થા છે. અમે અને અમારી સંસ્થાએ ધમણ-1નું દાન કર્યું છે. 

ક્યાથી શરૂ થયો વિવાદ?

જોકે, આ વેન્ટિલેટરનું પ્રોડક્શન થોડા સમય બાદ શરૂ થયું અને ત્યારબાદ તેની ડિલિવરી કરવામાં આવી. હોસ્પિટલમાં આ વેન્ટિલેટર પણ લગાવાયા. એટલે તે ચર્ચાના વિષયમાંથી બાકાત થવા લાગ્યું. પરંતુ અચાનક 15 તારીખે ફરી આ મુદ્દો લાઇમ લાઇટમાં આવ્યો જ્યારે સિવિલ હોસ્પિટલના સુપ્રિટેન્ડેટે એક પત્ર લખ્યો હતો.

હોસ્પિટલના સુપ્રિટેન્ડટે પોતાના પત્રમાં લખ્યું હતું કે, કોરોના વાયરસની મહામારીને પહોંચી વળવા માટે સિવિલ હોસ્પિટલમાં સરકાર દ્વારા ધમણ-1 અને MGVA વેન્ટિલેટર પુરા પાડવામાં આવ્યા હતા. પરંતુ એનેસ્થેશિયા વિભાગ વડા દ્વારા જણાવવામાં આવી રહ્યું છે કે, આ બન્ને વેન્ટિલેટર કોવિડ-19ના દર્દીઓમાં ધાર્યું પરિણામ નથી આપી શકતા. જેથી કોરોનાના દર્દીઓ માટે હાઈએન્ડ ICU વેન્ટિલેટર ફાળવવામાં આવે.

સુપ્રિટેન્ડટના પત્રમાં એવુ સ્પષ્ટ લખવામાં આવ્યું કે આ મશીન કોરોના વાયરસના દર્દીઓ માટે ધાર્યું પરિણામ નથી આપી શકતા. આ પત્ર સોશિયલ મીડિયામાં વાયરલ થતા સરકારની ખુબ ટીકા થવા લાગી. ધમણ ફેઇલ થયું હોવાના આક્ષેપો થવા લાગ્યા. મુખ્યમંત્રીનો મહત્વકાંક્ષી પ્રોજેક્ટ હોવાથી વિપક્ષે પણ પ્રહાર કરવાની આ તક જવા ન દીધી.

પત્ર વાયરલ થયા બાદ ડેમેજ કંટ્રોલ કરવા માટે ડૉક્ટર પ્રભાકરે કરી હતી સ્પષ્ટતા

પ્રભાકરે સ્પષ્ટતામાં કહ્યું કે, મશીનમાં સુધારા વધારા સુચવી દેવાયા છે. હવે ધમણ 3 વેન્ટિલેટર માર્કેટમાં મુકવાના છે. એટલે કે જવાબ નરોવાકુંજોવા સમાન હતો. કારણ કે, તેમણે જે આશા સેવી છે તે ધમણ 3 પર છે. ધમણ 1 તો ખાસ કારગર નથી તે વાત થયા સ્થાને જ છે. જોકે, સુપ્રીટેન્ડટ બાદ ફરી વિપક્ષે સરકાર પર આક્ષેપ કર્યા. તો સરકારે પણ જવાબ આપીને વળતો પ્રહાર કર્યો.

ધમણ 1 વેન્ટિલેશન મશીન પોતે વેન્ટિલેટર પર હોય તેમ કોરોનાના દર્દીઓ માટે ખાસ સફળ નથી રહ્યું. જોકે આ મશીનને કારણે દેશભરમાં ગુજરાતની વાહવાહી થઈ છે. એટલે આશા રાખીએ કે આ મશીનનું આગળનું વર્ઝન ધમણ 3 કોરોનાના દર્દીઓ માટે કારગત નિવડે અને આશા યથાર્થ ઠરે.