કાર્યકારી નાણાં મંત્રી પીયૂષ ગોયલના અંતરિમ બજેટ રજૂ કર્યા બાદ હવે વિપક્ષી પાર્ટીઓએ પોતાના રિએક્શન આપ્યા હતા. કોંગ્રેસે બજેટ રજૂ કર્યા બાદ એક પ્રેસ કોન્ફરન્સ કરી હતી. જેમાં પૂર્વ નાણાં મંત્રી અને કોંગ્રેસ નેતા પી ચિદમ્બરમે મોદી સરકાર પર પ્રહાર કર્યા હતા. આ સાથે કોંગ્રેસ અધ્યક્ષ રાહુલ ગાંધીએ પણ બજેટને ખેડૂતોનું અપમાન ગણાવ્યું હતું.
રાહુલ ગાંધી બોલ્યા- ખેડૂતોનું અપમાન
કોંગ્રેસ અધ્યક્ષ રાહુલ ગાંધીએ વચગાળાના બજેટને ખેડૂતોના અપમાન સમાન ગણાવ્યું હતું. તેમણે ટ્વિટર પર લખ્યું કે તમારા અભિમાનથી ભરેલાં પાંચ વર્ષોએ અમારા ખેડૂતોનું જીવન બરબાદ કરી નાંખ્યું છે. ખેડૂતોને પ્રતિદિન 17 રૂપિયા આપીને તેમનું અપમાન કરવામાં આવ્યું છે.
અડધું હિન્દી અડધું અંગ્રેજીએ કર્યુ કામ ખરાબ
પી ચિદમ્બરમે કહ્યું કે સરકારના મોટાભાગના દાવા ભરોસાપાત્ર હોતા નથી. ગોયલના અડધા અંગ્રેજી અને અડધા હિંદીથી કામ ખરાબ થયું. તેમણે કહ્યું કે લોકોને કન્ફ્યૂઝ કરવાનો સરકારનો ઇરાદો હતો અને તેમાં તે સફળ રહ્યાં. અડધી હિન્દી અને અંગ્રેજીએ લોકોને મૂંઝવણમાં મૂકી દીધાં.
એક-બે દિવસમાં બજેટની પોલ ખૂલી જશે. તેમણે કહ્યું કે ટૅક્સ કલેક્શનમાં વધારો કોઈ વખાણવા લાયક નથી પરંતુ માત્ર સામાન્ય ગ્રોથ છે. જો હું એક લાઈનમાં કહું તો આ વોટ ઑન અકાઉન્ટ નહીં અકાઉન્ટ ફૉર વોટ હતું.
બજેટ પર ચિદમ્બરમની પ્રતિક્રિયા
માછીમારોને ડિપાર્ટમેન્ટ મળ્યો છે પરંતુ પૈસાની ફાળવણી મળી નથી
દરેક ખેડૂતને વાર્ષિક રૂ.6000 આપશે જે લગભગ રોજના રૂ.17 થશે
આવકવેરામાં કોઈ રાહત નથી મળી માત્ર સામાન્ય છેડછાડ થઈ છે
કોંગ્રેસ સત્તામાં આવી તો પૂરા ડાયરેક્ટ ટૅક્સ કોડને નવી રીતે સામે મૂકીશું
બજેટમાં બે શબ્દો હતાં નહીં. 1) ઍજ્યુકેશન અને 2) નોકરીઓ
2030ના વિઝનમાં પણ એજ્યુકેશન અને નોકરીઓનો ઉલ્લેખ નથી
NSSOના ડેટા સરકારથી મંજૂર કરાવવાની જરૂરત નથી હોતી
ડેટાથી ખ્યાલ આવે છે કે બેરોજગારી 45 વર્ષની ટોચે છે
સરકારે નોકરીઓને મામલે કંઈ પણ કહ્યું નથી
સરકારે આ દેશના યુવાઓ અને બાળકોને છેતર્યા છે
કોંગ્રેસ મિનિમમ ઇન્કમ ગેરંટી આપવામાં સક્ષમ
કોંગ્રેસ નેતા ચિદમ્બરમે કહ્યું કે ખેડૂતોને જેટલી મદદની રજૂઆત કરાઈ છે તેનાથી રોજની અડધા કપની ચા પણ નહીં આવે. તેમણે કહ્યું કે કોંગ્રેસ પાર્ટી મિનિમમ ઇન્કમ ગૅરંટી આપવામાં સંપૂર્ણ રીતે સક્ષમ છે. જેનો પૂરો ઉલ્લેખ મૅનિફેસ્ટોમાં કરશે. દરેક ગરીબ પરિવાને ન્યૂનતમ આવકની ગૅરંટી આપવામાં આવશે. મિનિમમ ઇન્કમ ગૅરંટી સ્કીની જાહેરાત કોંગ્રેસ અધ્યક્ષે કરી હતી અને આ તેમનો જ આઈડ્યા છે.