દેહાવસાન / કોંગ્રેસના વરિષ્ઠ નેતા મોતીલાલ વોરાનું 93 વર્ષે નિધન, ગઈકાલે હતો જન્મદિવસ

• કોંગ્રેસના વરિષ્ઠ નેતા મોતીલાલ વોરાનું નિધન
• 93 વર્ષની જૈફ વયે મોતીલાલ વોરાનું દેહાવસાન
• મોતીલાલ વોરાનો 20 ડિસેમ્બર 1927ના થયો હતો જન્મ

2020ના વર્ષમાં અહેમદ પટેલ બાદ વધુ એક કોંગ્રેસના દિગ્ગજ નેતાની વિદાય થઈ છે. કોંગ્રેસ પક્ષના વરિષ્ઠ નેતા મોતીલાલ વોરાનું 93 વર્ષની જૈફ વયે નિધન થયું છે. પોતાના જન્મદિવસના એક દિવસ બાદ જ મોતીલાલ વોરાનું નિધન થતાં એક સંયોગ બન્યો હતો.  ઉલ્લેખનીય છે કે કોંગ્રેસના મહત્વના અને પાયાના નેતાઓમાં મોતીલાલ વોરાની ગણતરી થતી હતી. થોડાં સમય અગાઉ જ્યારે રાહુલ ગાંધી અધ્યક્ષ પદેથી ખસી ગયા હતાં ત્યાર બાદ મોતીલાલ વોરાનું નામ પણ કોંગ્રેસની કમાન સોંપાવામાં ચર્ચાયુ હતું. 

મધ્યપ્રદેશના બ્રાહ્મણ પરિવારમાં થયો હતો જન્મ

ઉલ્લેખનીય છે કે, 1928માં રાજસ્થાનમાં બ્રાહ્મણ પરિવારમાં જન્મેલા મોતીલાલનો ઉછેર અને અભ્યાસ મધ્યપ્રદેશમાં થયો હતો. સ્નાતક થયા પછી વિભિન્ન અખબારો, સામયિકોમાં પત્રકાર તરીકે જોડાયા હતા. મોતીલાલે નગરપાલિકાની ચૂંટણીમાં જીત મેળવીને રાજકારણમાં પ્રવેશ કર્યો હતો. તત્કાલીન મુખ્યમંત્રી પી.સી.સેઠીએ આ યુવાન કોર્પોરેટરનું હીર પારખીને તેમને પ્રજા સમાજવાદી પક્ષમાંથી કોંગ્રેસમાં જોડાવા સમજાવ્યા હતા અને વિધાનસભાની ટિકિટ આપી દીધી હતી. વિધાનસભામાં તેઓ વિજયી થયા હતા અને બાદમાં તેઓ સતત 6 ટર્મ જીત્યા હતા.

Congress leader Moti Lal Vohra (file photo) passes away at Fortis Escort Hospital in Delhi at the age of 93 pic.twitter.com/pCR8QHwXkh

— ANI (@ANI) December 21, 2020

રાહુલ ગાંધીએ ટ્વીટ કરીને અર્પી શ્રદ્ધાંજલિ 

કોંગ્રેસના પૂર્વ અધ્યક્ષ રાહુલ ગાંધીએ ટ્વિટ કરીને તેમને શ્રદ્ધાંજલિ આપી હતી. 93 વર્ષીય વોરાને ઓક્ટોબરમાં કોરોના વાયરસની ઝપેટમાં આવ્યા હતા. રાહુલ ગાંધીએ ટ્વીટ કરીને શ્રદ્ધાંજલિ અર્પી હતી. રાહુલ ગાંધીએ તેમને એક સાચા કોંગ્રેસમેન અને મહાન માણસ ગણાવ્યા હતા અને કહ્યું હતું કે અમે તેમને ખૂબ યાદ કરીશું. રાહુલ ગાંધીએ વોરાના પરિવાર અને મિત્રો પ્રત્યે પણ સંવેદના વ્યક્ત કરી છે.

આ હતી તેમની ખાસિયત

તેમની ખાસિયત એ હતી કે, વિવાદમાં આવવાનું નહિ, એકપણ વાતની ના નહિ પાડવાની અને દરેકની સાથે સંબંધો જાળવી રાખવાના. આ કૂનેહ માટે જાણીતા મોતીલાલે આરંભે મધ્યપ્રદેશના દિગ્ગજ કોંગ્રેસી નેતા અર્જુનસિંહની આંગળી પકડીને પ્રગતિ કરી હતી. 

મધ્યપ્રદેશના મુખ્યમંત્રી બન્યાં હતા

બાદમાં અર્જુનસિંહને પંજાબના ગવર્નર બનાવાયા ત્યારે તેમના અંગત વિશ્વાસુ તરીકે મધ્યપ્રદેશના મુખ્યમંત્રી બન્યા હતા. રાજીવ ગાંધીને પણ મોતીલાલ પર વિશ્વાસ બેઠો હતો.સોનિયા અને રાહુલ પ્રત્યે પણ મોતીલાલની વફાદારી અડીખમ મનાય છે. નેશનલ હેરલ્ડ કેસમાં સોનિયા, રાહુલની સાથે ટ્રસ્ટી તરીકે મોતીલાલ પણ સામેલ હતાં. ગાંધી-નહેરુ પરિવારની દરેક સંસ્થાઓમાં મોતીલાલની ચાવીરૂપ ભૂમિકા રહી હતી. તેઓ ઉત્તરપ્રદેશના રાજ્યપાલ પણ રહી ચૂક્યાં છે.