કોંગ્રેસને જ્યાં સૌથી વધુ વિશ્વાસ છે ત્યાં જ પડ્યું ગાબડુ, 150 કાર્યકરોનું રાજીનામું

લોકસભા ચૂંટણી પહેલા કોંગ્રેસને વધુ એક ફટકો પડ્યો છે. નેતા વિપક્ષ પરેશ ધાનાણીના ગઢમાં જ ગાબડું પડ્યું છે. સાવરકુંડલા તાલુકાના 150 કોંગ્રેસના કાર્યકરોએ રાજીનામું ધરી દીધું છે. સહકારી નેતા દિપક માલાણીને કોંગ્રેસે સસ્પેન્ડ કરતા જિલ્લા પંચાયતની વિજપડી અને આંબરડી બેઠકના સભ્યોએ રાજીનામા આપી દીધા છે.

સાવરકુંડલાના ધારસભ્ય પ્રતાપ દુધાતના વિસ્તારમાં કોંગ્રેસને મોટો ફટકો પડ્યો છે. દિપક માલાણીને સસ્પેન્ડ કરતા કોંગ્રેસના નેતાઓની બેઠક મળી હતી જેમાં દિપક માલાણીના સમર્થનમાં 150 કોંગ્રેસ કાર્યકર્તાઓએ રાજીનામા આપી દીધા છે.
 

મળતી માહિતી મુજબ કોંગ્રેસના સસ્પેન્ડેડ નેતા દિપક માલાણી થોડા સમયથી ભાજપના સાંસોના સંપર્કમાં હતા અને સસ્પેન્ડ થયા બાદ તેમને પોતાના તમામ ટેકેદારો સાથે ભાજપમાં ભેળવવાનો પ્રયત્ન ચાલી રહ્યો હોવાનું જાણવા મળ્યું હતું. જેથી રાજકીય ગતિવિધિઓ તેજ બની છે. સત્તાવાર રીતે હજુ કોઈપણ નેતા મગનું નામ મરી પાડતા નથી.

તમને જણાવીએ કે, વિધાનસભામાં વિપક્ષનાં નેતા પરેશ ધાનાણીની સામે અમરેલી જિલ્લા પંચાયતની સિંચાઈ સમિતિનાં ચેરમેન ભરત ગીડા સહિત ત્રણ જિલ્લા પંચાયતનાં સદસ્યોએ મોરચો માંડયો હતો. તો વિપક્ષનાં નેતા ધાનાણી રાજીનામુ આપતો પત્ર પ્રદેશ કોંગ્રેસમાં લખતા અમરેલી જિલ્લાનાં રાજકારણમાં ખળભળાટ મચી ગયો હતો. ત્યારે હવે કૉંગ્રેસ સામે બગાવત કરાનારા દિપક મલાણીને સસ્પેન્ડ કરવામાં આવ્યા હતાં. 
 

અમરેલીનાં જિલ્લા કૉંગ્રેસ પ્રમુખે 7 વર્ષ માટે માલાણીને સસ્પેન્ડ કર્યા છે. આ પહેલા તેમણે વિપક્ષનાં નેતા ધાનાણીનાં રાજીનામાંની માંગ કોંગ્રેસનાં જિલ્લા પંચાયતનાં સિંચાઈ સમિતિનાં ચેરમેન ભરત ગીડા સાથે મળીને ઉઠાવી હતી.