ગુજરાત કોંગ્રેસ પ્રભારી રાજીવ સાતવ 3 દિવસના ગુજરાત પ્રવાસે છે. ત્યારે રાજીવ સાતવે ગુજરાતની પેટાચૂંટણી પર પોતાની જીતનો વિશ્વાસ વ્યક્ત કર્યો હતો. જ્યારે અમેરિકામાં ટ્રમ્પની સંભવિત હાર પર ભાજપ પર પ્રહાર કર્યા હતા.
રાજીવ સાતવ અમદાવાદ પહોંચ્યા
રાજીવ સાતવે કર્યા ભાજપ પર પ્રહાર
ભાજપે પ્રચાર કર્યો એમની હાર નિશ્ચિત હોય છેઃ સાતવ
અમેરિકામાં રાષ્ટ્રપતિ ચૂંટણીના પરિણામ લટકેલા છે. જોકે મતોના આધારે કહી શકાય છે કે જો બાઇડેન પોતાની જીતના ફુટબોર્ડ પર ઉભા છે અને તેમણે તો પોતાની જીતનો દાવો કરી દીધો છે. ત્યારે, બીજી તરફ ટ્રમ્પને પણ પોતાની હાર પચી નથી રહી અને તેમણે બાઇડેનને ધમકી ભર્યા શબ્દોમાં કહી દીધું કે તેમણે જબરદસ્તી અને ખોટી રીતે રાષ્ટ્રપતિ પદ પર દાવો ન કરવો જોઇએ. આ વચ્ચે અમેરિકાના ચૂંટણી પરિણામનું રાજકારણ ગુજરાત સુધી પહોંચ્યું છે. ટ્રમ્પની સંભવિત હાર બાદ કોંગ્રેસના પ્રભારી રાજીવ સાતવે ભાજપ પર પ્રહાર કર્યા છે.
રાજીવ સાતવ અમદાવાદની મુલાકાતે છે ત્યારે USAની ચૂંટણીમાં ડોનાલ્ડ ટ્રમ્પની સ્થિતિ પર તેમણે નિવેદન આપ્યું હતું. તેમણે કહ્યું હતું કે, હાલના સમયમાં ભાજપની હાલત ખરાબ છે. ભાજપ જેમનો પ્રચાર કર્યો એમની હાર નિશ્ચિત હોય છે. નમસ્તે ટ્રમ્પે ભાજપને બોધપાઠ આપ્યો કે રાજ્યની ચૂંટણી બાદ દેશની ચૂંટણી બાદ વિદેશની ચૂંટણીમાં ન જોડાવુ જોઇએ. ભાજપે ફરીવાર નમસ્તે ટ્રમ્પ જેવું આયોજન ન કરવું જોઇએ.
રાજીવ સાતવે 8 બેઠકોની પેટાચુંટણીમાં વિજયનો વિશ્વાસ વ્યક્ત કર્યો
એક તરફ એગ્ઝિટ પોલમાં ભાજપની જીતનું અનુમાન લગાવવામાં આવી રહ્યું છે ત્યારે બીજી તરફ રાજીવ સાતવે કહ્યું કે, પેટાચુંટણીના સારા પરિણામ આવશે. સ્થાનિક સ્વરાજની ચુંટણી માટે કોંગ્રેસે તૈયારી શરૂ કરી છે. સ્થાનિક સ્વરાજની ચુંટણી માટે કોંગ્રેસની કેડર તૈયાર છે. યોગ્ય સમયે કોંગ્રેસનું માળખું જાહેર થશે. ગુજરાતની જનતા છેલ્લા 25 વર્ષથી ભાજપ સરકારથી પરેશાન છે.