અમદાવાદ: લોકસભાની ચૂંટણીના પડઘમ વાગી રહ્યા છે અને રાજકીય પક્ષોએ પોતાના ઉમેદવારની પસંદગી અંગે કમર કસી છે ત્યારે ગુજરાત કોંગ્રેસ દ્વારા પણ રાજ્યની તમામ બેઠકો પૈકીની 6 બેઠકો માટે ઉમેદવારોના નામ પર સહમતી સધાઈ ચૂકી છે. કહેવામાં આવી રહ્યું છે કે 6 નામો ફાઈનલ થઈ ગયાં છે અને માત્ર ઔપચારિક જાહેરાત બાકી છે. જેની જાહેરાત આજે મોડી રાત્રે અથવા આવતીકાલે સવારે થઈ શકે છે.
આ 6 બેઠકોમાં ગાંધીનગર બેઠક પરથી સી.જે.ચાવડા, પોરબંદર બેઠક પર લલિત વસોયા, કચ્છ પરથી નરેશ મહેશ્વરી અને નવસારી બેઠક પરથી ધર્મેશ પટેલનું નામ નક્કી કરાયું હોવાનું સૂત્રો કહી રહ્યાં છે. જો કે માહિતી પ્રમાણે એમ પણ કહેવાય છે કે આ ઉપરાંત અમદાવાદ પૂર્વ બેઠક પરથી હિમાંશુ પટેલ, પાટણ બેઠક પરથી જગદીશ ઠાકોર, લલિત વસોયાએ પોરબંદર બેઠક પરથી, બારડોલી બેઠક પરથી તુષાર ચૌધરી, દાહોદ બેઠક પરથી મહિલા ઉમેદવાર પ્રભાબેન તાવિયાડ, સુરેન્દ્રનગર પરથી સોમા ગાંડા પટેલ, એમ કુલ ગુજરાતની કુલ 8 બેઠકો માટે નામની પસંદગી કરવામાં આવી હોવાના અહેવાલો પ્રાપ્ત થયા છે.
ગુજરાત કોંગ્રેસના ઉમેદવારોએ શરૂ કર્યું પ્રચાર કેમ્પેઇન
એકબાજુ ભાજપે હજુ સુધી તેના ઉમેદવારો જાહેર નથી કર્યા તો સામે ગુજરાત કોંગ્રેસના ઉમેદવારોએ પ્રચાર પણ શરૂ કરી દીધો છે. અમદાવાદ પશ્ચિમ લોકસભા વિસ્તારમાં કોંગ્રેસના ઉમેદવાર રાજુ પરમારે પ્રચાર શરૂ કરી દીધો છે. રાજુ પરમાર લોકોના ઘરે-ઘરે જઇને ડોર ટૂ ડોર કેમ્પેઇન શરૂ કરી દીધું છે. કોંગ્રેસે વહેલા નામ જાહેર કરતા ઉમેદવારોએ ચૂંટણી પ્રચાર શરૂ કરી દીધો છે. રાજુ પરમારે લોકો સાથે સીધો સંપર્ક કરવાની શરૂઆત કરી દીધી છે.