ગુજરાત વિધાનસભાની ચૂંટણીનું પ્રથમ તબક્કાનું મતદાન પૂર્ણ થઈ ગયું છે. 19 જિલ્લાની 89 બેઠકો પર 788 ઉમેદવારોના ભાવિ ઇવીએમમાં કેદ થઈ ગયા છે. ગુજરાત વિધાનસભાની ચૂંટણીના પ્રથમ તબક્કામાં આટલા ઓછા મતદાન વચ્ચે પણ કોંગ્રેસ ખુશ જોવા મળી રહી છે અને કોંગ્રેસના દિગ્ગજ નેતાઓ જીતનો દાવો કરી રહ્યા છે.
ચૂંટણીમાં ઓછું મતદાન છતાં કોંગ્રેસ ખુશમ ખુશ
પ્રથમ તબક્કામાં કોંગ્રેસને 65 સીટ મળશેઃ રઘુ શર્મા
પ્રથમ ચરણના મતદાનમાં 55 બેઠકો પર કોંગ્રેસની જીત થશેઃ પવન ખેરા
સૌરાષ્ટ્રમાં 35થી વધુ સીટ કોંગ્રેસની આવશેઃ ઈન્દ્રનીલ રાજ્યગુરુ
ગુજરાત વિધાનસભાની ચૂંટણીનું પ્રથમ તબક્કાનું મતદાન પૂર્ણ થઈ ચૂક્યું છે. પહેલા તબક્કાનું અંદાજિત 60.35 ટકા મતદાન નોંધાયું છે. સૌરાષ્ટ્ર-કચ્છમાં 58 ટકા જેટલું મતદાન થયું છે. તો બીજી તરફ દક્ષિણ ગુજરાતમાં 66 ટકા જેટલું મતદાન નોંધાયું છે. જ્યારે બીજા તબક્કાનું મતદાન 5મી ડિસેમ્બરના રોજ યોજાશે. 5 ડિસેમ્બરે મધ્ય ગુજરાત અને ઉત્તર ગુજરાતની 93 બેઠક પર ચૂંટણી યોજાવાની છે. ગત ચૂંટણી કરતા આ વખતે ઓછું મતદાન નોંધાયું છે, તેમ છતાં ગુજરાત કોંગ્રેસ ખુશ ખુશ દેખાઈ રહી છે.
કોંગ્રેસ નેતાઓના દાવા
ગુજરાત કોંગ્રેસના પ્રભારી રઘુ શર્માએ કહ્યું કે, પ્રથમ તબક્કામાં 65 સીટ પર કોંગ્રેસની જીતવાની સંભાવના છે. તો કોંગ્રેસના રાષ્ટ્રીય પ્રવક્તા પવન ખેરાએ દાવો કર્યો છે કે પ્રથમ ચરણની ચૂંટણીમાં 55 બેઠકો પર કોંગ્રેસની જીત થશે. જ્યારે કોંગ્રેસ ઉમેદવાર ઇન્દ્રનીલ રાજ્યગુરુએ પણ સૌરાષ્ટ્રમાં 35થી વધુ સીટ કોંગ્રેસની આવશે તેવું જણાવ્યું છે.
પવન ખેરાએ ટ્વીટ કરીને જીતનો વિશ્વાસ વ્યક્ત કર્યો
ગત 1લી ડિસેમ્બરના રોજ સૌરાષ્ટ્ર-કચ્છ અને દક્ષિણ ગુજરાતની 89 બેઠકો પર ચૂંટણી યોજાઈ હતી. પ્રથમ તબક્કાનું અંદાજિત 60.35 ટકા મતદાન નોંધાયું છે. જે ગત ચૂંટણી કરતા પણ ઓછું છે, એવામાં ઓછું મતદાન થયું હોવા છતાં પણ કોંગ્રેસ ગેલમાં જોવા મળી રહી છે. કોંગ્રેસના દિગ્ગજ નેતાઓ મોટા મોટા દાવા કરી રહ્યા છે. પ્રથમ ચરણના મતદાનમાં 55 બેઠકો પર કોંગ્રેસની જીત પાક્કી હોવાનો દાવો કોંગ્રેસના રાષ્ટ્રીય પ્રવક્તા પવન ખેરા અને રાષ્ટ્રીય પ્રવક્તા આલોક શર્મા દ્વારા કરવામાં આવ્યો છે. તેમના દ્વારા ગતરોજ એક ટ્વીટ પણ કરવામાં આવ્યું છે.
89માંથી 55 બેઠકો જીતી રહી છે કોંગ્રેસઃ પવન ખેરા
જેમાં તેઓએ લખ્યું છે કે, ગઈકાલે પ્રથમ તબક્કાની ચૂંટણી થઈ અને આજે સુરતના વેપારીઓ પર દરોડા પડી રહ્યા છે, આ ભાજપની નિરાશા પણ છે અને એક પ્રકારથી સંભવિત હારથી રોષ પણ છે. મીડિયા પણ સારી રીતે જાણે છે કે પ્રથમ તબક્કાની 89 બેઠકોમાંથી કોંગ્રેસ ઓછામાં ઓછી 55 બેઠકો જીતી રહી છે.
कल पहले चरण के चुनाव हुए, और आज सूरत के व्यापारियों पर रेड हो रहे है, ये BJP की हताशा भी है और एक तरह से संभावित हार से बौखलाहट भी है।
કોંગ્રેસ 125થી વધુ બેઠકોનો ટાર્ગેટ પાર કરશેઃ રઘુ શર્મા
આ ઉપરાંત ગુજરાત કોંગ્રેસના પ્રભારી રઘુ શર્માએ ભાજપ પર આકરા પ્રહાર કરતા કહ્યું કે, ગુજરાતમાં ભાજપની સ્થિતિ ખરાબ છે. ભાજપ વિરુદ્ધ લોકોનો આક્રોશ છે. અમને સારા પરિણામના ઈનપુટ મળી રહ્યાં છે. પ્રથમ તબક્કામાં 65 સીટ પર કોંગ્રેસની જીતવાની સંભાવના છે. કોંગ્રેસ 125થી વધુ બેઠકોનો ટાર્ગેટ પાર કરશે.
કોંગ્રેસની વોટબેંક ફિક્સ છેઃ ઇન્દ્રનીલ
આ ઉપરાંત રાજકોટમાં કોંગ્રેસના ઉમેદવાર ઇન્દ્રનીલ રાજ્યગુરુનું નિવેદન પણ સામે આવ્યું છે. તેમણે જણાવ્યું કે, ઓછા મતદાનથી ભાજપને નુકસાન થશે. સૌરાષ્ટ્રમાં 35થી વધારે સીટ કોંગ્રેસની આવશે. કોંગ્રેસની વોટબેંક ફિક્સ છે. મતદારો ભાજપથી નારાજ છે. ભાજપના કાર્યકરોએ પણ મતદાન કરાવ્યું નથી.