કોંગ્રેસ દ્વારા આજે ગુજરાત ચુંટણીને લઇને ઉમેદવારોના નામની છેલ્લી યાદી જાહેર કરાઇ છે. જેને લઇને કાર્યકરોમાં કકળાટ શરૂ થયો છે.
કોંગ્રેસની યાદી જાહેર થતા કકળાટ
ટિકિટ વહેચણીથી બનાસકાંઠા જિલ્લા પ્રમુખમાં નારાજગી
કોંગ્રેસે ચાર ધારાસભ્યની ટિકિટ કાપી
ગુજરાત કોંગ્રેસના ઉમેદવારોની છેલ્લી યાદી જાહેર કરી દેવામાં આવી છે. જેમાં કોંગ્રેસને જે ડર હતો એ જ થયું હોય તેવો ઘાટ સર્જાયો છે. યાદી જાહેર થતાંની સાથે જ અનેક સ્થળોએ કાર્યકરો અને આગેવાનોમાં નારાજગીનો સૂર ઉઠ્યો છે. આપને જણાવી દઈએ કે, પ્રદેશ નેતૃત્વ દ્વારા સંભવિત ઉમેદવારોની યાદી બનાવી દિલ્હી હાઇકમાન્ડ સમક્ષ મોકલવામાં આવી હતી. આ યાદી પર હાઈકમાન્ડની મહોર લાગ્યા બાદ હવે ઉમેદવારોના નામ જાહેર કરી દેવામાં આવ્યા છે. કોંગ્રેસ દ્વારા 37 ઉમેદવારોના નામ જાહેર કરવામાં આવ્યા છે. જેમાં કોંગ્રેસ દ્વારા વિરમગામથી હાર્દિક પટેલની સામે લાખા ભરવાડને ઉતારાયા છે.
પંચમહાલના ગોધરામાં કોંગ્રેસ કાર્યાલય પર તોડફોડ કરવામાં આવી હતી. જેમાં ગોધરાના ઉમેદવારની જાહેરાત બાદ કાર્યકરો રોષે ભરાયા હતા અને કાર્યાલયના બહારના ભાગે પથ્થરમારો કર્યો હતો. જેને લઇને પોલીસ અને કોંગ્રેસ અગ્રણીઓ દોડી ગયા હતા. જ્યાં ઉમેદવારથી કાર્યકરો નારાજ હોવાની ચર્ચા જાગી હતી.
કોંગ્રેસની યાદી જાહેર થતા બનાસકાંઠા કોંગ્રેસમાં કકળાટ
કોંગ્રેસની યાદી જાહેર થતા બનાસકાંઠામાં કકળાટ જોવા મળ્યો હતો. ટિકિટ વહેચણીને લઇને કોંગ્રેસ જિલ્લા પ્રમુખ રોષે ભરાયા હતા. જિલ્લા પ્રમુખ પ્રદેશ કાર્યલય પર પહોચ્યા હતા અને મોવડી મંડળે ટિકિટ ફાળવવામાં ભૂલ કરી હોવાનો સૂર ઉઠાવ્યો હતો. તેમણે વધુમાં જણાવ્યું કે બનાસકાંઠા કોંગ્રેસનો ગઢ છે. ત્યારે આ મામલે પ્રદેશ પ્રમુખને રજૂઆત કરીશ , જો યોગ્ય નિર્ણય નહિ આવે તો સમર્થકો સાથે રાજીનામુ આપી દેવાની પણ ચીમકી ઉચ્ચારી હતી.
મોરબીમાં કોંગ્રેસને ઝટકો
વિધાનસભાની ચૂંટણી ટાણે મોરબીમાં કોંગ્રેસને ઝટકો લાગ્યો છે. મોરબી જિલ્લા પંચાયતના માજી ચેરમેન હેમંગ રાવલે કોંગ્રેસ સાથે છેડો ફાડ્યો છે અને કેસરિયા કર્યા છે. હેમંગ રાવલ અને હળવદ પાલિકાના 2 સભ્યો સહીત 200થી વધુ કાર્યકરો ભાજપમાં જોડાયા છે. જેને પ્રદેશ ભાજપ ઉપાધ્યક્ષ જયંતિ કવાડિયાએ કેસરિયા કરાવ્યા હતા.
કોંગ્રેસે ચાર ધારાસભ્યની ટિકિટ કાપી
આજે જાહેર કરવામાં આવેલી ઉમેદવારોની યાદીમાં કોંગ્રેસે ચાર ધારાસભ્યની ટિકિટ કાપી હોવાનું સામે આવ્યું છે. ધંધુકા બેઠક પરથી ધારાસભ્ય રાજેશ ગોહિલની ટિકિટ કાપી તેના સ્થાને યુવા કોંગ્રેસના પ્રમુખ હરપાલસિંહ ચુડાસમાને ટિકિટ અપાઈ છે તો બેચરાજીથી ધારાસભ્ય ભરત ઠાકોરના સ્થાને ભોપાજી ઠાકોરને મેદાને ઉતાર્યા છે. વધુમાં કાંકરેજથી જગદિશ ઠાકોરના ભાઇ અમૃત ઠાકોરને ટિકિટ અપાઈ છે. બાયડથી ધારાસભ્ય જશુ પટેલની ટિકિટ કાપી મહેન્દ્રસિંહ વાઘેલાને ટિકિટ ફાળવી દેવામાં આવી છે. પેટલાદ નિરંજન પટેલને બદલે ડો. પ્રકાશ પરમારને કોંગ્રેસે મેદાને ઉતાર્યા છે.