રણનીતિ / રાજસ્થાન કોંગ્રેસનું સંકટ ખતમ કરવા આ નેતાને સોંપાઇ મોટી જવાબદારી! તૈયાર કરાયો આ માસ્ટર પ્લાન

• રાજસ્થાનમાં કોંગ્રેસના રાજકારણમાં સંકટ વધ્યું
• અશોક ગેહલોત અને સચિન પાયલટ વચ્ચે જંગ
• આવનાર સમયમાં વેણુગોપાલ ઉકેલ લાવી શકે છે

ડિસેમ્બરના પ્રથમ સપ્તાહમાં યોજાનારી કોંગ્રેસની ભારત જોડો યાત્રાના રાજસ્થાન આવતા પહેલા, સીએમ અશોક ગેહલોત અને સચિન પાયલટ વચ્ચેની રાજકીય ખેંચતાણ પાર્ટી માટે માથાનો દુખાવો બની ગઈ છે. સૂત્રોના જણાવ્યા અનુસાર પાર્ટી સંગઠનના મહાસચિવ કેસી વેણુગોપાલ 29 નવેમ્બરે સ્થિતિનો સામનો કરવા જયપુર જઈ રહ્યા છે. મીડિયા સાથે વાત કરતા કેસી વેણુગોપાલે કહ્યું, "રાજસ્થાનમાં કોઈ સંઘર્ષ નથી. પાર્ટી ભારત જોડો યાત્રા દ્વારા રાજસ્થાન કોંગ્રેસની તાકાત બતાવશે."

વેણુગોપાલની 29મી નવેમ્બરે જયપુર મુલાકાત
સૂત્રોના જણાવ્યા અનુસાર, ભારત જોડો યાત્રા દરમિયાન રાહુલ અને પ્રિયંકાને મળ્યા બાદ દિલ્હી આવેલા વેણુગોપાલે કોંગ્રેસ અધ્યક્ષ મલ્લિકાર્જુન ખડગે સાથે રાજકીય સંકટ અંગે ચર્ચા કરી હતી. જે બાદ વેણુગોપાલની આગામી 29મી નવેમ્બરે જયપુર મુલાકાત નક્કી કરવામાં આવી હતી. માહિતી અનુસાર, જયપુરની મુલાકાત દરમિયાન વેણુગોપાલ ભારત જોડો યાત્રાના રાજસ્થાન તબક્કા માટે રચાયેલી સમિતિઓની બેઠક કરશે, જેમાં અશોક ગેહલોત અને સચિન પાયલટ પણ હાજર રહેશે. સૂત્રોએ જણાવ્યું હતું કે, આ દરમિયાન તેઓ બંને સાથે અલગ-અલગ વાત કરીને મુદ્દાનો ઉકેલ શોધવાનો પણ પ્રયાસ કરશે અને ભારત જોડો યાત્રા દરમિયાન કોઈપણ પ્રકારની ભાષણબાજી કે અનુશાસનથી દૂર રહેવાની કડક ચેતવણી પણ આપશે.

2-3 દિવસમાં આવી શકે છે ઉકેલ 
અગાઉ 25 સપ્ટેમ્બરે જ્યારે અશોક ગેહલોત દિલ્હી આવ્યા હતા અને જયપુરમાં સમાંતર બેઠક યોજવા માટે સોનિયાને મળ્યા બાદ માફી માંગી હતી ત્યારે વેણુગોપાલ પણ સંગઠનના મહાસચિવ તરીકે બેઠકમાં હાજર હતા. 10 જનપથમાંથી બહાર આવતા વેણુગોપાલે કહ્યું હતું કે, "રાજસ્થાનમાં નેતૃત્વના પ્રશ્નનો ઉકેલ બે-ત્રણ દિવસમાં બહાર આવશે." પરંતુ ત્યારથી બે મહિના વીતી ગયા અને ગેહલોત અને પાયલટ વચ્ચેની તાજા ઝઘડાએ મામલો વધુ જટિલ બનાવી દીધો.

ગેહલોતને હટાવવામાં આવશે તો સરકાર નહી પડે
દરમિયાન, સૂત્રોના જણાવ્યા અનુસાર, પાયલોટ પાર્ટી હાઈકમાન્ડ પર નેતૃત્વનું દબાણ બનાવી રહ્યા છે. તેમણે હાઈકમાન્ડને ધારાસભ્યોનું ગુપ્ત મતદાન કરાવવા અને આગામી નેતા નક્કી કરવા જણાવ્યું છે. સૂત્રોનો દાવો છે કે સચિને કહ્યું છે કે જો ગેહલોતને હટાવવામાં આવશે તો સરકાર નહીં પડે.