Coronavirus / ખેડાવાલા બાદ કોંગ્રેસના વધુ 2 નેતાઓ કોરોના પોઝિટિવ જ્યારે ગ્યાસુદ્દીન- શૈલેષ પરમારના સેમ્પલ લેવાયા

• કોંગ્રેસના નેતા બદ્દરૂદ્દીન શેખ કોરોના પોઝિટિવ
• ઓઢવના કોંગ્રેસના મહામંત્રીને પણ કોરોના
• પ્રજાને મદદથી લઈને તમામ કામોમાં આ લોકોએ લીધો છે ભાગ

અમદાવાદમાં એક પછી એક કોંગ્રેસી નેતાઓ કોરોનાની ઝપેટમાં આવી રહ્યા છે. પહેલા ધારાસભ્ય અને હવે કોર્પોરેટર કોરોના પોઝિટવ આવ્યા છે.  આજે અમદાવાદના કોંગ્રેસના નેતા બદરૂદ્દીન શેખનો કોરોના રિપોર્ટ પોઝિટિવ આવ્યો છે. તેમને તુરંત જ સારવાર માટે હોસ્પિટલ ખસેડવામાં આવ્યા છે. આ પહેલા ધારાસભ્ય ઈમરાન ખેડાવાલા પણ કોરોના પોઝિટિવ આવી ચુક્યા છે અને તેમને સારવાર માટે હોસ્પિટલ ખસેડવામાં આવ્યા છે. જ્યારે બીજી બાજુ ઓઢવના કોંગ્રેસના મહામંત્રીનો પણ રિપોર્ટ પોઝિટિવ આવ્યો છે. 

કોંગ્રેસ ધારાસભ્ય ખેડાવાલાનો આવ્યો હતો કોરોનાનો રિપોર્ટ પોઝિટિવ

કોંગ્રેસના ધારાસભ્ય ઇમરાન ખેડાવાલાનો કોરોના રિપોર્ટ પોઝિટિવ આવતાં ગઇકાલે કોની-કોની સાથે મુલાકાત તેમજ કયા વિસ્તારોની મુલાકાત લીધી તે અંગે તપાસ કરી કાર્યવાહી કરવામાં આવી રહી છે. જેને લઇને ગઇકાલે ગાંધીનગર ખાતે બેઠકમાં હાજર રહેતા તંત્ર એકશનમાં આવી ગયું છે. 

CM રૂપાણી હોમ ક્વોરન્ટાઈન થયા

ઈમરાન ખેડાવાલા સાથે ગઈકાલે થયેલી મિટિંગ અને તેમનો કોરોના રિપોર્ટ પોઝિટિવ આવ્યો છે. ત્યારે WHOની ગાઈડલાઈન મુજબ CM વિજય રૂપાણી કોઈને મળી શકશે નહીં. ગઈ કાલે બંગલા નંબર 1માં મીટિંગ થઈ હતી અને હવે આજે CM રૂપાણી બંગલા નંબર 26માં હોમ ક્વોરન્ટાઈન થયા છે.

શું કહે છે ખેડાવાલા?

મને કોરોનાના કોઇ લક્ષણ ન હતા. મને બે દિવસ સામાન્ય તાવ આવે તેવો તાવ આવ્યો હતો. સામાન્ય હાથ પગ દુખતા હતાં. એટલે મેં સામાન્ય તાવની દવા લીધી હતી. થોડો ફેર પડ્યો પણ શરદી થઈ ગઈ નાક જામ થઈ ગયુ અને શ્વાસ લેવામાં પણ તકલીફ પડવા લાગી એટલે મેં રિપોર્ટ કરાવ્યો હતો. આ માટે આરોગ્ય ટીમ ઘરે આવીને મને મળી ગઈ હતી અને મારા સેમ્પલ લઈ ગઈ હતી. ગઈકાલે CM ઓફિસથી ફોન આવ્યો હતો એટલે મળવા ગયો હતો. કોટ વિસ્તાર ક્ફર્યુ બાબતે બેઠક હતી. એટલે હું ગયો હતો. મેં ગઈકાલે વારંવાર હેલ્થ ખાતામાં ફોન કરી કરીને રિપોર્ટ અંગે પૂછપરછ કરી હતી જેમાં મારો રિપોર્ટ છેક ગઈકાલે આઠ વાગ્યે આવ્યો હતો. 

આ બંને ધારાસભ્યો પણ હોમ ક્વોરન્ટાઈન થયા

અમદાવાદના જમાલપુર-ખાડિયાના ધારાસભ્ય ઈમરાન ખેડાવાલાનો કોરોનાનો રિપોર્ટ પોઝિટિવ આવ્યો છે, ત્યારે હવે શૈલેષ પરમાર અને ગ્યાસુદ્દીન શેખ હોમ ક્વોરન્ટાઈન થયા છે. કોંગ્રેસના આ બન્ને ધારાસભ્યો ઇમરાન ખેડાવાલાના સતત સંપર્કમાં રહ્યાં હતાં. 

કોને-કોને મળ્યા ખેડાવાલા ?

ઉલ્લેખનીય છે કે, ખેડાવાલા ગઈકાલે ગાંધીનગર ખાતે રાજ્યના મુખ્યમંત્રી વિજય રૂપાણી, નાયબ મુખ્યમંત્રી અને ગૃહમંત્રી સાથે બેઠક કરી હતી. આ ઉપરાંત તેઓ રાજ્યના મુખ્ય સચિવ અનિલ મુકીમ તથા રાજ્ય પોલીસ વડા શિવાનંદ ઝા તથા તેમના સચિવને પણ મળ્યા હતા. આ સાથે જ તેઓ મુખ્યમંત્રીના અંગત સચિવને પણ મળ્યા હતા તો કેટલાક પત્રકારો તથા કેમરામેન પણ તેઓ મળ્યા હતા.