રાજકારણ / ગુજરાત સરકારે કોરોના કામગીરી મુદ્દે સુપ્રીમમાં એવો સ્વીકાર કર્યો કે કોંગ્રેસને મોકો મળી ગયો, જાણો મામલો

• કોંગ્રેસ પ્રવક્તા જયરાજસિંહના સરકાર પર વાર
• ગુજરાત સરકારના સુપ્રીમ કોર્ટમાં સોગંધનામા મુદ્દે પ્રહાર
• "ગુજરાતની જનતાના ગાલ પર સરકારનો તમાચો"

સુપ્રીમ કોર્ટમાં ગુજરાતના ચીફ સેક્રેટરી અનિલ મુકીમ દ્વારા એક સોગંદનામું રજૂ કરવામાં આવ્યું છે. જેના પર હવે કોંગ્રેસ દ્વારા આક્ષેપ કરવામાં આવી રહ્યા છે. કોંગ્રેસના નેતા જયરાજસિંહના સોગંદનામા મુદ્દે પ્રહાર કર્યા હતા. જયરાજસિંહે કહ્યું કે, ગુજરાતમાં 12 હજારથી વધુ બેડ ઓક્સિજનના અભાવે ખાલી રહ્યા છે. અને કેન્દ્ર તરફથી અન્યાય થતો હોવાની સોગંદનામામાં સરકાર કબૂલાત પણ કરી છે. ઓક્સિજનના અભાવે દર્દીઓ સચવાતા ન હોવાનો પણ સરકારે ઉલ્લેખ કર્યો છે. ઓક્સિજન ન મળવાના કારણે અત્યાર સુધી દર્દીઓના જીવ ગયા છે. આ વિપક્ષની વાત નથી સરકારે જ સોગંદનામામાં ઉલ્લેખ કર્યો છે. 

કોંગ્રેસ પ્રવક્તાએ કહ્યું કે, ઓળખીતો જમાદાર બે ધોકા વધુ મારે તેવી સ્થિતિ હાલ રાજ્યમાં છે. કેન્દ્રમાં કોંગ્રેસ હતી ત્યારે ગુજરાતને અન્યાયની વાતો થતી હતી. જ્યારે હવે કેન્દ્ર સરકારનો ગુજરાતની જનતાને હડહડતો અન્યાય છે. ગુજરાતની જનતાના ગાલ પર આ સરકારનો તમાચો છે.

CM વિજય રૂપાણીનું નિવેદન

ગુજરાતને કોરોના સંક્રમણે બાનમાં લીધું છે. ત્યારે એક નવા અભિયાનની શરૂઆત કરવામાં આવી છે. “મારૂં ગામ, કોરોના મુક્ત ગામ” અભિયાન દરમિયાન મુખ્યમંત્રી વિજય રૂપાણી અને પૂર્વ અમદાવાદ મ્યુનિસિપલ કમિશનર વિજય નેહરાએ ગાંધીનગર જિલ્લાના કલોલ તાલુકાના આરસોડીયા ગામના કોમ્યુનીટી કોવિડ કેર સેન્ટરની મુલાકાત લીધી હતી. 

રાજ્યમાં કોરોનાનો કહેર યથાવત છે. ત્યારે કોરોનાને લઇને રાજ્યમાં લોકડાઉન અંગે CM રૂપાણીએ કહ્યું કે, રાજ્યમાં હાલ આંશિક લોકડાઉન યોગ્ય છે. કેસ ઘટી રહ્યાં છે ત્યારે હાલ લોકડાઉનનું આયોજન નહીં. ગામડાઓને સલામત રાખવા સરકાર પ્રયત્નશીલ છે. 15 દિવસે લોકાડઉનની સમીક્ષા કરવામાં આવી રહી છે.

ઓક્સિજન અછતથી કોઈનું મૃત્યુ નહીં, ત્રીજી લહેરની પણ તૈયારી શરૂ કરી દીધી છેઃ રૂપાણી

CM રૂપાણીએ આ ગામમાં મોટું નિવેદન આપ્યું હતું કે રાજ્યમાં ઑક્સીજનની અછતથી કોઈનું મૃત્યુ થયું નથી. પ્રથમ લહેર કરતાં બીજી લહેરમાં કેસ વધ્યા છે પરંતુ બેડ વગર લોકો હેરાન હોય તેવી સ્થિતિ નથી. રાજ્યમાં કોરોના કેસ ઘટતા જાય છે અને સરકારે ત્રીજી લહેરની તૈયારી પણ શરૂ કરી દીધી છે. સરકાર ઑક્સીજન અંગે મોનીટરીંગ કરી રહી છે.