આક્ષેપ / અલ્પેશ ઠાકોરે કોંગ્રેસની આ પાંચ બેઠકો હરાવવાનો 90 કરોડમાં ઠેકો લીધો છેઃ બળવંત ઠાકોર

લાખણી તાલુકા પંચાયતના ઉપપ્રમુખ બળવંત ઠાકોરે અલ્પેશ ઠાકોર પર ભાજપ પાસેથી રૂપિયા 90 કરોડ લીધા હોવાનો આક્ષેપ કર્યો હતો. જેમાં અલ્પેશ ઠાકોરે ભાજપ પાસેથી રૂપિયા લઈ કોંગ્રેસની લોકસભાની પાંચ સીટો હરાવવાનો ઠેકો લીધો હોવાનો આક્ષેપ કરવામાં આવ્યો છે.
આ પાંચ સીટોમાં બનાસકાંઠા, પાટણ, મહેસાણા, સાબરકાંઠા, ગાંધીનગરની બેઠકોનો સમાવેશ થાય છે. મહત્વનું છે કે, કોંગ્રેસ દ્વારા બનાસકાંઠામાં પરથી ભટોળને, પાટણમાં જગદીશ ઠાકોરને, મહેસાણામાં એ.જે.પટેલને અને સાબરકાંઠામાં રાજેન્દ્રસિંહ ઠાકોરને તથા ગાંધીનગરમાં સી.જે.ચાવડાને ટિકિટ આપવામાં આવી છે.
ઠાકોર સમાજના મતદારોને રિઝવવા માટે રાજકીય પક્ષોના પ્રયાસ
લોકસભાની ચૂંટણી પહેલા અલ્પેશ ઠાકોરે કોંગ્રેસમાંથી રાજીનામુ આપ્યુ છે. ત્યારે હવે બનાસકાંઠા બેઠક પર ત્રિપાંખીયો જંગ થાય તેવી ચર્ચાઓ ચાલી રહી છે. બનાસકાંઠા બેઠક પર ભાજપ, કોંગ્રેસ અને ઠાકોર સેના વચ્ચે જંગ થાય તેવી ચર્ચા ચાલે છે. અલ્પેશ ઠાકોરે કોંગ્રેસના વિરૂદ્ધમાં પ્રચારમાં ઉતરતા કોંગ્રેસની મુશ્કેલીમાં વધારો થયો છે. હાલમાં તમામ પક્ષો દ્વારા ઠાકોર સમાજના મતદારોને રિઝાવવાના પ્રયાસ કરવામાં આવી રહ્યા છે. જે પક્ષને ઠાકોર સમાજ સમર્થન આપે તે પક્ષને મોટો ફાયદો થઈ શકે છે. જેને લઈને હાલમાં ઠાકોર સમાજને રિઝવવાના પ્રયાસ ચાલી રહ્યા છે.