કેન્દ્ર સરકાર દ્વારા પેટ્રોલ-ડીઝલના એક્સાઈઝ ડ્યૂટીમાં ઘટાડો કરાયો છે. જ્યારે રાજ્ય સરકારે વેટમાં ઘટાડો કર્યો છે. ત્યારે આ ઘટાડા બાદ પણ વિપક્ષ દ્વારા પ્રહાર કરવામાં આવી રહ્યા છે. અમિત ચાવડાએ ગુજરાત સરકાર પર આકરા પ્રહાર ક્યા છે.
કોંગ્રેસના નેતાઓએ સરકાર પર કર્યા પ્રહાર
પેટાચૂંટણીમાં હાર બાદ સરકારની ઉંઘ ઉડીઃ ચાવડા
દિવાળી પર કેન્દ્ર સરકાર અને રાજ્ય સરકારે જનતાને આપી રાહત
પેટ્રોલ અને ડીઝલની વધી કિંમતથી સામાન્ય લોકોને મોટી રાહત મળી છે. કેન્દ્ર અને રાજ્ય સરકારે પેટ્રોલ-ડીઝલની કિંમતમાં મોટી રાહત આપવાનો નિર્ણય કર્યો છે. કેન્દ્ર સરકારે પેટ્રોલ પર 5 રૂપિયા અને ડીઝલમાં 10 રૂપિયા એક્સાઈઝ ડ્યૂટી ઘટાડવાની જાહેરાત કરી છે. જ્યારે રાજ્ય સરકારે પેટ્રોલ પર 7 રૂપિયા અને ડીઝલ પર પણ 7 રૂપિયા વેટ ઘટાડ્યો છે. વિપક્ષી નેતાઓએ કહ્યું કે, સરકારે એક્સાઈઝ ડ્યૂટીમાં વધારો કર્યા બાદ માત્ર આંશિક રાહત આપી.
જો સરકાર ઈચ્છે તો પેટ્રોલ-ડીઝલ 50 રૂપિયામાં મળી શકેઃ અમિત ચાવડા
પેટ્રોલ-ડીઝલના ભાવ ઘટાડા બાદ ગુજરાત કોંગ્રેસ પ્રદેશે અમિત ચાવડાએ નિવેદન આપ્યું છે. તેમણે કહ્યું કે, પેટાચૂંટણીમાં પરાજય મળતા સરકારની ઉંઘ ઉડી છે. આગામી ચૂંટણીને ધ્યાને રાખીને પેટ્રોલ-ડીઝલનો ભાવ ઘટાડ્યો છે. જો સરકાર ઈચ્છે તો પેટ્રોલ-ડીઝલ 50 રૂપિયામાં મળી શકે છે. પેટ્રોલ-ડીઝલનો સરકારે GSTમાં સમાવેશ કરવો જોઈએ. 2 વર્ષથી દેશવાસીઓ મોંઘવારીનો માર સહન કરતા હતા. મહામારીમાં સરકારે લોકોને લૂંટવામાં કોઈ કસર બાકી ન રાખી. ક્રૂડ ઓઈલના ભાવ ઘટ્યા, તેમ છતા લૂંટ ચલાવવામાં આવી. ઈન્ટરનેશનલ ભાવ મુજબ દેશવાસીઓને પેટ્રોલ-ડીઝલ મળવું જોઈએ.
ગુજરાતમાં ક્યાં કેટલો ભાવ?
હવે પેટ્રોલ અને ડીઝલની કિંમત 100 રૂપિયાથી ઓછી થઈ ગઈ છે. નવો ભાવ મધ્યરાત્રીથી જ અમલી બની ગયો છે. આ સાથે જ અમદાવાદમાં પેટ્રોલનો ભાવ 95 રૂપિયા 13 પૈસા અને ડીઝલનો ભાવ 89 રૂપિયા 12 પૈસા, રાજકોટમાં પેટ્રોલનો ભાવ 98 રૂપિયા 89 પૈસે, ડીઝલનો ભાવ 88 રૂપિયા 89 પૈસા થઈ ગયો છે. જ્યારે સુરતમાં પેટ્રોલ 94 રૂપિયા 89 પૈસા, ડીઝલ 88 રૂપિયા 99 પૈસા, વડોદરામાં 94 રૂપિયા 78 પૈસા, ડીઝલ 88 રૂપિયા 76 અને ભાવનગરમાં પેટ્રોલનો ભાવ 96 રૂપિયા 86 પૈસા અને ડીઝલનો ભાવ 90 રૂપિયા 85 પૈસા થઈ ગયો છે.