એક તરફ સમગ્ર વિશ્વમાં કોરોનાએ હાહાકાર મચાવ્યો છે. ખાસ કરીને ચીનમાં 2300થી વધુ લોકોના મોત નિપજ્યા હતા. ત્યારે ભાવનગરમાં કોંગો ફીવરે ફરીવા માથું ઉચક્યું હોવાના અહેવાલ પ્રાપ્ત થયા છે.
ભાવનગરમાં શંકાસ્પદ કોંગો ફીવરનો કેસ નોંધાયો
શંકાસ્પદ કોંગો ફીવરનો દર્દી હોસ્પિટલમાં દાખલ
ઉલ્લેખનીય છે કે, હાલ કોરોના વાયરસથી બચવા માટે તમામ સાવચેતી રખાઇ રહી છે. તેવામાં ભાવનગરમાં કોંગો ફીવરનો એક શંકાસ્પદ કેસ સામે આવ્યો છે. ભાવનગરમાં એક મહિલા દર્દીને કોંગો ફીવરના લક્ષણો દેખાતા તેમને સર ટી હોસ્પિટલમાં દાખલ કરાઈ છે. ઉમરાળાના ધોળા જંકશનની મહિલામાં કોંગો ફીવર જેવા લક્ષણો દેખાતા સર ટી હોસ્પિટલમાં દર્દીને તબીબી નિરીક્ષણ હેઠળ રખાઇ છે.
પહેલી વખત 1944માં ક્રિમિયામાં કોંગો વાયરસ જોવા મળ્યો
સૌ પહેલી વાર 1944માં ક્રિમિયામાં કોંગો વાયરસ જોવા મળ્યો હતો. ત્યારબાદ 1969માં કોંગો દેશમાં મોટા પ્રમાણમાં આ વાયરસ ફેલાયો. પછી 2001માં પાકિસ્તાન, દક્ષિણ આફ્રિકા, ઈરાનમાં જોવા મળ્યો. 2011માં પહેલી વાર ગુજરાતમાં આ વાયરસ જોવા મળ્યો હતો. મોટાભાગે તે પૂર્વ આફ્રિકામાં વધારે જોવા મળે છે.
કેવી રીતે પડ્યું કોંગો નામ?
1969માં કોંગો દેશમાં મોટા પ્રમાણમાં આ વાયરસ ફેલાયો. અનેક લોકોને તેના કારણે સખત તાવ આવ્યો. આ કારણે તે કોંગો ફીવરના નામે ઓળખવવા લાગ્યો.
શેનાથી ફેલાય છે?
પશુઓથી ફેલાય છે આ રોગ
પશુઓની ચામડી પર ચોંટેલા હનીમોરલ નામના પરજીવી રોગનું વાહક છે.
ઈતરડીના કરડવાથી તેની અસર થાય છે.
ઈતરડી ગાય અને ભેંસના પૂછડામાંથી ફેલાય છે.
માલધારી અને પશુ પાલકોને આ રોગ થવની શક્યતા વધારે રહે છે.
કોંગો ફીવરના લક્ષણો
તાવ આવવો
માંસપેશીમાં દર્દ થવું
માથાનો દુઃખાવો રહેવો
ચક્કર આવવા
પીઠનું દર્દ થવું
આંખોમાં બળતરા થવી
ગળું બેસી જવું
ઝાડા ઉલટી થવા
શરીરના છિદ્રોમાંથી લોહી આવવું
શરીર પર લાલ ચકામા થવા
3થી 9 દિવસમાં ફેલાય છે વાયરસના લક્ષણો.
ઉપાય
જ્યારે પણ તમને આ પ્રકારના લક્ષણો દેખાય ત્યારે તરત જ તમારા ફેમિલી ડોક્ટરનો કે અન્ય ડોક્ટરનો સંપર્ક કરવો. તરત જ તમામ તપાસ કરાવીને તેની ટ્રીટમેન્ટ શરૂ કરી દેવી જરૂરી છે. જો સમયસર ટ્રીટમેન્ટ ન મળે તો તે જીવલેણ બની શકે છે.