અફઘાનિસ્તાનમાં તાલિબાન રાજનું આધિકારિક એલાન થાય તે પહેલા વિશ્વને હચમચાવી મૂકે તેવા સમાચાર સામે આવી રહ્યા છે જેમાં મુલ્લા બરાદર ગોળીબારમાં ઘાયલ થયો હોવાનું મનાઈ રહ્યું છે.
હક્કાનીઓએ તાલિબાની નેતા પર ચલાવી ગોળી
મુલ્લા બરાદર ઘાયલ થયો હોવાના અહેવાલ
અફઘાનિસ્તાનમાં જબરદસ્ત હલચલ મચી
તાલિબાન અને હક્કાની વચ્ચે વિવાદ
અમેરિકાએ અફઘાનિસ્તાન છોડી દીધું તેને પાંચ દિવસ વિત્યા છતાં તાલિબાન અફઘાનિસ્તાનમાં સરકાર બનાવી શક્યું નથી. કોઈને કોઈ બહાને સરકારનાં ગઠનમાં વિલંબ કરવામાં આવી રહ્યો છે ત્યારે રિપોર્ટ અનુસાર તાલિબાન અને હક્કાનીની વચ્ચે સરકારને લઈને ખૂબ મોટો મતભેદ થઈ ગયો છે. હક્કાની નેટવર્ક અને તાલિબાન વચ્ચે સત્તાની વહેંચણીને લઈને વિવાદ ચાલી રહ્યો છે અને આ વિવાદમાં ગોળીબાર બાદ તાલિબાનનો બીજા નંબરનો સૌથી મોટો નેતા બરાદર ઘાયલ થઈ ગયો હોવાના સમાચાર સામે આવ્યા છે.
પાકિસ્તાનમાં ચાલી રહી છે બરાદરની સારવાર : રિપોર્ટ
રિપોર્ટમાં દાવો કરવામાં આવ્યો છે કે બરાદરની સારવાર પાકિસ્તાનમાં કરવામાં આવી રહી છે. જોકે આ રિપોર્ટની અત્યાર સુધી તાલિબાન દ્વારા કોઈ જ પુષ્ટિ કરવામાં આવી નથી. પરંતુ બરાદર ઘાયલ થયો છે તેવા અહેવાલ બાદ આખા અફઘાનિસ્તાનમાં પરિસ્થિતિ ખૂબ જ તનાવપૂર્ણ છે. નોંધનીય છે કે મુલ્લા બરાદર જ આગામી નવી સરકારનું નેતૃત્વ કરશે તેવા અહેવાલો પણ પહેલા સામે આવ્યા હતા.
પાકિસ્તાન દોડતું થયું
નોંધનીય છે કે ગઈકાલે જ પાકિસ્તાની ગુપ્તચર એજન્સી ISIનો ચીફ કાબુલમાં દેખાયો હતો. હવે અહેવાલ સામે આવી રહ્યા છે કે પાકિસ્તાન સરકાર દ્વારા જ ISI ચીફને ત્યાં ઝઘડો શાંત પાડવા માટે મોકલવામાં આવ્યો છે.
આતંકવાદી-આતંકવાદી વચ્ચે વિવાદ
અફઘાનિસ્તાનમાં એવી અટકળો છે કે હક્કાની નેટવર્ક દ્વારા રક્ષા મંત્રીનું પદ માંગવામાં આવ્યું છે જેના પર તાલિબાન તૈયાર નથી. નોંધનીય છે કે હક્કાની નેટવર્કને પાકિસ્તાન દ્વારા સંરક્ષણ પ્રાપ્ત છે અને સંયુક્ત દ્વારા તેને એક આતંકવાદી સંગઠન જાહેર કરવામાં આવ્યું છે. બીજી તરફ માનવામાં આવી રહ્યું છે કે પાકિસ્તાનને અફઘાનિસ્તાનમાં પોતાની સરકાર જોઈએ છે, તે જે કહે તેમને મંત્રી બનાવવામાં આવે. બીજી તરફ તાલિબાન ઈરાન મોડલનાં આધારે સરકાર બનાવવાની તૈયારી કરી રહ્યું છે.
તાલિબાનનો દાવો : પંજશીર પર થયો કબજો
અફઘાનિસ્તાનમાં તાલિબાનનું રાજ પાછું આવી ગયું છે. થોડા દિવસ બાદ આધિકારીક રીતે તાલિબાન અહિયાં સરકાર બનાવી લેશે અને તેના માટે મોટા પાયે તૈયારી કરવામાં આવી રહી છે. જોકે સરકાર બને તે પહેલા જ તાલિબાન દ્વારા મોટો દાવો કરવામાં આવ્યો છે કે તાલિબાને પંજશીર પર પણ કબજો કરી લીધો છે. આ વાત સાંભળતા જ આખા દેશમાં તાલિબાનનાં લડાકૂએ બેકાબૂ બન્યા હતા અને અંધાધૂંધ હવાઈ ફાયરિંગ કરીને જશ્ન માનવવાની શરૂઆત કરી દેવામાં આવી હતી. જોકે આ જશ્ન માતમમાં ફેરવાઇ ગયો છે, દેશમાં કેટલાય સ્થાનો પર ફાયરિંગનાં કારણે લોકોનાં મોતનાં સમાચાર સામે આવ્યા છે.
હવાઈ ફાયરિંગમાં જ 70 લોકો માર્યા ગયા હોવાના સમાચાર
તાલિબાન દ્વારા કરવામાં આવેલ હવાઈ ફાયરિંગમાં અત્યાર સુધીમાં 70 લોકો માર્યા ગયા હોવાના સમાચાર સામે આવી રહ્યા છે. જોકે આ સંખ્યા હજુ પણ વધારે હોય શકે છે કારણ કે કેટલાય રાજ્યો એવા છે જ્યાંથી હજુ સુધી યોગ્ય રિપોર્ટ પણ મળી શક્યા નથી. ખામાં ન્યૂઝ દ્વારા આપવામાં આવેલ એક અહેવાલ અનુસાર એક જ હોસ્પિટલમાંથી 17 લોકોનાં મોતની પુષ્ટિ કરવામાં આવી છે. નોંધનીય છે કે ઈસ્લામી અમીરાતનો એક માત્ર વિરોધી પ્રાંત પંજશીર પર કથિત રૂપે તાલિબાને કબજો કર્યો હોવાનો દાવો કરવામાં આવ્યો છે જે બાદ લડાકૂઓએ ગેલમાં આવીને હવાઈ ફાયરિંગ કર્યું હતું. જોકે હવે આ ફાયરિંગમાં મરનાર લોકોને સાચો આંકડો તાલિબાનો બહાર આવવા દેશે કે નહીં તેને લઈને પણ ઘણા લોકોને મનમાં આશંકા છે.
પંજશીરનાં અભેદ્ય કિલ્લોમાં તાલિબાને પાડ્યું ગાબડું?
તાલિબાનનો દાવો છે કે પંજશીરમાં રાજ્યપાલની ઓફિસ પર તેના કબજો કરી લેવામાં આવ્યો છે. અફઘાનિસ્તાનમાં તાલિબાનના નિયંત્રણમાંથી બહાર એકમાત્ર પ્રાંત પંજશીર છે. જો કે, અફઘાનિસ્તાન નેશનલ રેઝિસ્ટન્સ ફ્રન્ટ (એનઆરએફએ) તાલિબાન દ્વારા કરવામાં આવી રહેલ હુમલાનો જડબાતોડ જવાબ આપી રહી છે. નોંધનીય છે કે પંજશીર એક માત્ર એક અભેદ્ય કિલ્લો છે જ્યાં તાલિબાનનું શાસન સ્થાપિત થઈ શક્યું નથી. વર્ષો પહેલા સોવિયેત દ્વારા અફઘાનિસ્તાનમાં યુદ્ધ કરવામાં આવ્યું ત્યારે સોવિયેત પણ પંજશીરમાં આવીને જ હારી ગયું હતું. જોકે તાલિબાન દ્વારા કરવામાં આવી રહેલા દાવા પર વિદ્રોહી પક્ષ દ્વારા ખંડન કરવામાં આવી રહ્યું છે. હવે જોવાનું રહે છે કે આગામી સમયમાં અહેમદ મસૂદ દ્વારા શું દાવો કરવામાં આવે છે અને દુનિયાનાં દેશો પંજશીરને લઈને શું પગલાં ભરે છે.