કારકિર્દી / સુંદરતા નિખારવાના ક્ષેત્રમાં તમે બનાવી શકો છે સફળ કારકિર્દી ; બ્યુટિશિયન તરીકે કરિયર માટે સંપૂર્ણ જાણકારી

એક અંદાજ પ્રમાણે બ્યુટી ક્ષેત્રમાં આવનારા સમયમાં એટલે કે ૨૦૨૫ સુધીમાં ૨૦ ટકાથી વધુ વૃદ્ધિ થવાની સંભાવનાઓ છે. બ્યુટી ક્ષેત્રમાં કાર્યસ્થળ વધવાના કારણે આ વધારો જોવા મળે છે. જેમાં સૌથી વધારે યોગદાન યુવતીઓનું છે. હાલના સમયમાં ભારતના બ્યુટી ઉદ્યોગ અંદાજે ૬.૫ અબજ યુ.એસ. ડૉલર છે. જેમાં દર વર્ષે ૨૦ ટકાના દરથી વૃદ્ધિ થઈ રહી છે. જ્યારે વૈશ્વિક સ્તરે સુંદરતાનું માર્કેટ ૨૭૪ અબજ યુ.એસ. ડૉલર છે. આજના સમયમાં બ્યુટી તમારી કાર્યક્ષમતા અને ગુણવત્તાનો સ્કેલ બની ગઈ છે. તમે સુંદર છો, પ્રેઝન્ટેબલ છો તો તેનો મતલબ છે કે તમારી પાસે કુશળતા, સફળતા અને વિશેષ નોકરી માટેની ક્ષમતા પણ છે.

ટેલિવિઝન ચેનલોએ લોકોની જીવનશૈલી તો બદલી છે સાથે જ સુંદરતાના માપદંડને પણ એક ચોક્કસ ઊંચાઈ પર સ્થાયી કરી દીધો છે. જેની સાથે સફળતા અને કુશળતા જોડાઈ ગઈ છે.  સારી નોકરી માટે પ્રેઝન્ટેબલ હોવું અનિવાર્ય શરત છે. માટે જ સુંદરતા પાછળનો ખર્ચ વધી રહ્યો છે. જોકે આ વાત માત્ર મહિલાઓ માટે જ નથી, પુરુષો માટે પણ સુંદરતાના માપદંડ બદલાઈ ગયા છે. મહિલાઓ સુંદરતાના નવા ખ્યાલને નવા પરિણામ આપી રહી છે. તો પુરુષોએ પણ સારા લુક માટે નવી શોધ કરી લીધી છે. જેના કારણે પુરુષોના સુંદરતાની કોસ્મેટિક્સમાં વૃદ્ધિ થઈ રહી છે. આ જ કારણ છે કે પબ્લિક ડિલિંગ સાથે જોડાયેલા લોકો પોતાના હાસ્યને બ્યુટી એન્જિનિયરિંગથી નવા પરિણામ અપાવી રહ્યા છે. 

મોટાં શહેરોમાં સુંદરતા કોસ્મેટિક્સના વેચાણમાં ઘણી વૃદ્ધિ થઈ છે. તો કોસ્મેટિક્સ સર્જરી કરનારા ડૉક્ટરોના ત્યાં પણ યુવાનોની લાંબી કતાર જોવા મળે છે. પોતાને મૅકઓવર કરી નવા રૃપમાં જોવા લોકો ઉત્સુક હોય છે. જેમાં પેટને આકર્ષિત બનાવવાની સાથે રાઇનોપ્લાસ્ટી, હેર ઇમ્પ્લાન્ટ્સ અને સમય પહેલાંની કરચલીઓને દૂર કરવાના તમામ પ્રકારના ઉપાયોનો સમાવેશ થાય છે.

છેલ્લાં કેટલાંક વર્ષો દરમિયાન દેશમાં બ્યુટી ટૂરિઝમમાં મોટા પ્રમાણમાં વધારો થઈ રહ્યો છે. ભારતમાં થતી કોસ્મેટિક્સ સર્જરી અન્ય દેશોની સરખામણીમાં ઘણી સસ્તી છે. દાખલા તરીકે મમ્મોપ્લાસ્ટી માટે ઇંગ્લેન્ડમાં ૮૫ હજાર જેટલો ખર્ચ થાય છે. જ્યારે ભારતમાં આ સર્જરી માત્ર ૧૫થી ૨૦ હજારમાં જ કરી આપવામાં આવે છે. આ જ કારણોસર જુદા-જુદા દેશોમાંથી મહિલાઓ અને પુરુષો ભારતમાં વિભિન્ન સર્જરી કરાવવા માટે આવે છે. સારા દેખાવવા માટે અને સ્વાસ્થ્યને સ્થાયી રાખવાની મહેચ્છાએ એક વિશાળ ઉદ્યોગને જન્મ આપ્યો છે. આ ઉદ્યોગ એટલે બ્યુટી અને વેલનેસ.

આ તકને કારકિર્દી તરીકે સ્વીકારવા માટે સાચી દિશામાં સાચી સમજ સાથે આગળ વધવાની જરૃર છે. સુંદરતા વિશેષજ્ઞ અને સુંદરતા કોસ્મેટિક્સના ઉત્પાદન બંનેમાં કારકિર્દી બનાવવાનો વૅ છે. સચોટ માર્ગદર્શન, તાલીમ, યોગ્ય સલાહ અને પ્રયોગ કરવાની તૈયારી તમને બ્યુટિશિયનની મંજિલ સુધી પહોંચાડી શકે છે.

અભ્યાસ

સામાન્ય રીતે આ ક્ષેત્રમાં અભ્યાસની વધારે જરૂર નથી, પરંતુ વિષયનું જ્ઞાન વધારે જરૂરી છે. જોકે સારી જગ્યાએ નોકરી મેળવવા માટે કોઈ પણ વિષયમાં સ્નાતકની ડિગ્રી જરૂરી છે.

આ સાથે જ અંગ્રેજી પર પ્રભુત્વ હોવું પણ અનિવાર્ય છે. તમારા ત્યાં કેવા કસ્ટમર આવે છે તેના આધારે તમારે વાતચીત કરવાની હોય છે. ઘણા કસ્ટમર અંગ્રેજી ભાષામાં વાત કરતા હોય છે ત્યારે તેમને સમજવા અને સમજાવવા તમારી માટે જરૃરી બની જાય છે.

ઉપરાંત સર્જરી ડૉક્ટર તરીકે કારકિર્દી બનાવવા માટે તે કક્ષાનો અભ્યાસ કરવો પડે છે. સામાન્ય બ્યુટિશિયનની નોકરી કરતા લોકો પાસે અભ્યાસની વધારે અપેક્ષા રાખવામાં નથી આવતી, પરંતુ જો તમે આ ક્ષેત્રને કારકિર્દી તરીકે જોતા હોય તો સારો અભ્યાસ તમને આગળ લઈ જશે. ખાસ કરીને વિદેશમાં વસવાટ કરવા ઇચ્છતા યુવાનો માટે સારો અભ્યાસ અનિવાર્ય છે. બ્યુટિશિયન ક્ષેત્રે પણ ઘણા ડિપ્લોમા અને ડિગ્રી કોર્સ ઉપલબ્ધ છે. ઓનલાઇન આ વિષયની સંપૂર્ણ જાણકારી મળી રહે છે.

આવકના સ્ત્રોત

આ ક્ષેત્રમાં ક્યારેય મંદી જોવા નથી મળતી. એકવાર તમે સારી જગ્યાએથી ડિગ્રી કે ડિપ્લોમા કોર્સ કરો છો તો તમને કોઈ પણ ઉચ્ચ જગ્યાએ જોબ મળી રહે છે. જેમાં શરૃઆતના તબક્કે ૧૫થી ૨૦ હજાર પગાર પ્રતિમાસ મળે છે. જો પોતાનો જ બિઝનેસ હોય તો તેમાં સહેલાઈથી પ્રતિમાસ ૪૫થી ૫૦ હજાર આવક કરી શકો છો, પરંતુ તમારા કસ્ટમર કેવા છે, કઈ જગ્યા પર તમારો બિઝનેસ ડેવલોપ થયેલો છે. આ તમામ પાસાં મહત્ત્વનાં છે. એક વખત કામ સેટ થઈ ગયા પછી ચાર પાંચ વર્ષના સમયગાળામાં પ્રતિમાસ લાખ જેટલી આવક કરી શકાય છે.

જરૂરી છે આ ગુણ

કેટલાક એવા ગુણ છે જે આ ક્ષેત્રમાં ચારચાંદ લગાવે છે. જેમાં મુખ્ય છે સારો સ્વભાવ. ઉપરાંત વાત કરવાની કલા. સારી રીતે વાત કરવી તે આ ક્ષેત્રે ખૂબ જ મહત્ત્વની છે. સાથે જ તમારી ટીમ સાથે યોગ્ય રીતે વર્ક લેવું પણ જરૂરી છે. કસ્ટમરને આપેલો સમય સાચવવાની કુનેહ પણ તમારા કામને નવો મુકામ આપે છે.

આ ક્ષેત્ર ઘણુ વિશાળ છે. માટે અનેક પ્રકારની તક રહેલી છે. સારા કામને વખાણવામાં આવે છે. સમય જતા ટીવી કલાકારો, બોલિવૂડ સ્ટાર્સ, પોલિટિકલ વર્ગ, બિઝનેસ જગત સાથે જોડાયેલી સેલિબ્રિટી અને ધનિક વર્ગ આ ક્ષેત્રમાં અઢળક પૈસા ખર્ચે છે. માટે તમારા સારું કાર્ય આ લોકો સુધી પહોંચી શકે તો તમે કાયમી ધોરણે તેમના ખાસ બ્યુટિશિયન બની શકો છો.