અમદાવાદમાં દિન પ્રતિદિન ચોરીના બનાવોમાં સતત છાળો આવી રહ્યો છે. તેવામાં શહેરના નારણપુરા વિસ્તારમાં પીજી તરીકે રહેતા યુવકો ગરમીને પગલે રૂમનો દરવાજો ખુલ્લો રાખી ઊંધી રહ્યા હતા. આ દરમિયાન ખુલ્લા દરવાજાનો લાભ લઈ તસ્કર મકાનમાં ત્રાટક્યો હતો અને યુવાનોના ત્રણ મોબાઈલની ચોરી કરી અજાણ્યો શખ્સ ફરાર થઈ ગયો હતો. આ અંગેની નારણપુરા શાસ્ત્રીનગર ફ્લેટમાં પેઈંગ ગેસ્ટ તરીકે રહેતા અખિલ સોજિત્રાએ ફરિયાદ નોંધાવી છે. અખિલ ખાનગી કંપનીમાં નોકરી કરે છે. અખિલ ભાડાનાં મકાનમાં અન્ય મિત્રો સાથે રહેતો હોવાનું સામે આવ્યું છે.
3 મિત્રોના મોબાઈલ ચોરાયા
ગઈ કાલે રાત્રિના સમયગાળા દરમિયાન અખિલ તથા તેના મિત્રો નારણપુરા વિસ્તારમાં પોતાના રૂમમાં સૂઈ રહ્યા હતા. અખિલને ઊંઘ ન આવતી હોવાથી તે મોડી રાત પછી સૂઈ ગયો હતો. પરંતુ ઉનાળાની કાળઝાળ ગરમીને લઈને તેણે દરવાજો ખુલ્લો રાખ્યો હતો. અખિલ તેના રૂમમાં સૂઇ ગયો હતો ત્યારે તેનો મોબાઈલ ફોન તકિયા નીચે તેણે મૂક્યો હતો. વહેલી સવારે ઊઠીને જોયું તો તકિયા નીચેથી મોબાઈલ ગાયબ હતો. અખિલે મોબાઇલ શોધવા માટે તરત જ તેના રૂમમેટ અને મિત્રને રિંગ કરવાનું કહ્યું હતું. જોકે તેના અન્ય બે મિત્રના પણ મોબાઈલ ગાયબ હતા.
નારણપુરા પોલીસ સ્ટેશનમાં નોંધાઈ ફરિયાદ
વહેલી સવારે પેઈંગ ગેસ્ટ તરીકે રહેતા ત્રણ યુવકના મોબાઇલ ચોરાતાં અખિલે નારણપુરા પોલીસ સ્ટેશનમાં ફરિયાદ કરી હતી. પોલીસે આ મામલે અજાણ્યા ચોર વિરુદ્ધ ગુનો દાખલ કરીને તપાસ શરૂ કરી છે. નવરંગપુરા જેવા પોશ વિસ્તારમાં પેઈંગ ગેસ્ટ તરીકે રહેતા યુવક યુવતીના રૂમમાંથી પણ ચોરીના બનાવમાં વધારો થયો છે. ત્યારે પીજી (પેઈંગ ગેસ્ટ) તરીકે રહેતાં યુવક-યુવતીઓ દરવાજા ખુલ્લા રાખતાં હોવાથી તેમના રૂમને ટાર્ગેટ બનાવી ચોરી કરતી ટોળકી શહેરમાં ફરી સક્રિય બની હોવાનું જણાઈ રહ્યું છે.