અમરેલીના આ નેતા તાલુકા પંચાયતના પૂર્વ સભ્ય છે. રૂરલ પોલીસે સમગ્ર મામલે ફરિયાદ નોંધી તપાસ હાથ ધરી છે
અમરેલીના ભાજપના આગેવાન સામે દુષ્કર્મની ફરિયાદ
વાવાઝોડામાં સહાય અપાવવાના બહાને દુષ્કર્મનો આરોપ
2 ઓગસ્ટના દુષ્કર્મ આચર્યાની નોંધાઇ ફરિયાદ
સાવરકુંડલા રૂરલ પોલીસે ફરિયાદ નોંધી તપાસ હાથ ધરી
અમરેલીના ભાજપના આગેવાન સામે દુષ્કર્મની ફરિયાદ નોંધાતા ચકચાર મચી છે.ભાજપના સક્રિય નેતા અને તા.પંચાયતના પૂર્વ સભ્ય પ્રફુલ વેકરિયા સામે આ ફરિયાદ કરવામાં આવી છે. સાવરકુંડલાની નિરાધાર મહિલાને સહાય આપવાના બહાને દુષ્કર્મ કર્યું હોવાની ફરિયાદ ખુદ પીડિત મહિલાએ આપી છે.
સહાય ન આપી પણ બદનામી આપી..!
તાઉ-તે વાવાઝોડામાં મળેલી સહાય મેળવવા મહિલાએ કર્યો હતો પ્રફુલ વેકરિયાનો કોન્ટેક્ટ કર્યો હતો. બાદમાં સહાયના નામે 2 ઓગસ્ટના રોજ ભાજપ નેતા પ્રફુલ વેકરિયાએ દુષ્કર્મ કર્યું હોવાની ફરિયાદ કરવામાં આવી છે. સાવરકુંડલા રૂરલ પોલીસે ફરિયાદ નોંધી તપાસ હાથ ધરી છે. મહિલાની ફરિયાદને આધારે પોલીસ હવે તમામ પાસાઓ એક કરી ઘટના અંગે ગહન તપાસમાં જોતરાઈ છે. તો સામે અમરેલી ભાજપ તેમજ સમગ્ર પંથકમાં દુષ્કર્મની ફરિયાદ નોંધાતા ખળભળાટ મચ્યો છે.
અગાઉ કચ્છમાં ભાજપ નેતાની કામલીલા છતી થઈ
ગત સપ્તાહમાં કચ્છ ભાજપના યુવા નેતા ભદ્ર સમાજની મહિલા સાથે રંગરેલીયા મનાવતા રંગેહાથે ઝડપાઈ ગયા હતા. ઘટનાને પગલે માત્ર કચ્છમાં જ નહીં પરંતુ સમગ્ર ગુજરાતના રાજકારણમાં હડકંપ મચ્યો હતો. છેલ્લા કેટલાક સમયથી અવાર-નવાર નેતાઓના આપત્તિજનક વીડિયો વાયરલ થતાં હોય છે, ત્યારે ગુજરાત ભાજપના યુવા નેતા શરમજનક સ્થિતિમાં કચ્છની સ્થાનિક મહિલા સાથે રંગરેલીયા મનાવતા ઝડપાઈ ગયા હતા, કચ્છ ભાજપના યુવા નેતા ભાજપના જ નેતાની સંબંધી યુવતી સાથે રંગરેલિયા મનવાતા રંગેહાથ ઝડપાઈ જતાં યુવતીના સગા-વ્હાલાઓએ સારો એવો મેથી પાક ચખાડ્યો હતો. તો આ ઘટના બાદ ગુજરાતનું રાજકારણ ગરમાયું છે અને ખારેક કાંડ અને નલિયા કાંડની ચર્ચાઓ ફરી શરૂ થઈ હતી.
છેલ્લા 15 દિવસમાં બે ઘટના
કચ્છ બાદ અમરેલી ભાજપ નેતા સામે દુષ્કર્મની ફરિયાદ થઇ છે. કચ્છમાં ભાજપના નેતાએ પદ પ્રતિષ્ઠાનો ખોટો ઉપયોગ કરી કાંડ કર્યો હતો જ્યારે અમરેલીના ભાજપ નેતા પ્રફુલ વેકરિયાએ સહાયના નામે મહિલા પર દુષ્કર્મ કર્યું હોવાનો ઘટસ્ફોટ પીડિત મહિલાએ કર્યો છે. આમ એક બાદ એક ભાજપના નેતાઓની કામલીલા બહાર આવતા હવે આ નેતાઓ સામે કડક પગલાંની માંગ થઈ રહી છે.