બોલિવુડના 'દબંગ' ખાન વિરુદ્ઘ મુંબઇ પોલીસ સ્ટેશનમાં ફરિયાદ નોંધાઇ છે. ઉલ્લેખનીય છે કે, સલમાન ખાનની સાથે-સાથે તેના બૉડીગાર્ડ વિરુદ્ધ પણ ફરિયાદ નોંધાઇ છે. ફરિયાદ કરનાર શખસે પોલીસને જણાવ્યું કે, સલમાને ગાડીમાંથી તેનો ફોન છીનવી લીધો. આ ફરિયાદ પછી સલમાનના બોડીગાર્ડે મુંબઇ પોલીસમાં ક્રોસ એપ્લિકેશન નોંધાવી છે.
સલમાનના બૉડીગાર્ડે પોતાની ક્રૉસ ફરિયાદમાં જણાવ્યું કે, તે સલમાનની મંજૂરી વગર તેનો પીછો કરી રહ્યો હતો. આ સાથે જ વીડિયો પણ બનાવી રહ્યો હતો. ફોન છીનવાની ફરિયાદ કરનારા શખસે સલમાન વિરુદ્ધ લેખિત ફરિયાદમાં કહ્યુ કે, ભલે તે એક સેલિબ્રેટી હોય પરંતુ ગાડીમાં હાથ નાખી ફોન છીનવો યોગ્ય નથી.
પોતાની ફરિયાદ નોંધાવાની સાથે તે શખસે પોલીસને યોગ્ય કાર્યવાહી કરવાની માંગણી કરી છે. જણાવી દઇએ કે, સલમાન ગુરુવારે સવાર મુંબઇના જૂહુથી કાંદીવલી તરફ પોતાની સાઇકલથી જઇ રહ્યો હતો. સલમાનને સાઇકલ ચલાવતો જોઇને તે શખસે પોતાના મોબાઇલથી શૂટિંગ કરવા લાગ્યો. પોતાની ફોટો જોઇ જતા સલમાન તેના પર ભડકી ઉઠ્યો અને તેણે પોતાનો મોબાઇલ લઇ પોતાના બોડીગાર્ડને આપી દીધો. જોકે, થોડા સમય બાદ બૉડીગાર્ડે તેને મોબાઈલ પરત કરી દીધો પણ આ આખો મુદ્દો પોલીસમાં જતો રહ્યો. ફરિયાદમાં એમ પણ કહેવામાં આવ્યું છે કે સલમાન ખાનના બૉડીગાર્ડે તે શખસની સાથે મારપીટ પણ કરી હતી.
ઉલ્લેખનીય છે કે, સલમાન ખાન અત્યારે પોતાની અપકમિંગ ફિલ્મ ભારતના કારણે ચર્ચામાં છે. ફિલ્મનું ટ્રેલર અને સોંગ રિલીઝ થઇ ગયા છે અને ઓડિયન્સ તરફથી સારો રિસપોન્સ મળી રહ્યો છે. ફિલ્મમાં સલમાન ખાન સિવાય કેટરિના કૈફ, સુનીલ ગ્રોવર અને દિશા પટની જોવા મળશે. ફિલ્મ 5 જૂનના રોજ રિલીઝ થશે.