નિયમોની પાઠશાળા / ટ્રાફિક નિયમો નેવે મુકી બાળકોને વાહન આપનાર માતાપિતા સામે પોલીસે કરી લાલ આંખ

• લાઈસન્સ વગર સગીર વયે વાહન ચલાવતાં વિદ્યાર્થીઓને દંડ ફટકારાયા
• પોલીસે સ્કુલ અને વાલીઓ સામે દંડ શસ્ત્ર ઉગામ્યું
• નાનીવયનાં વિદ્યાર્થીઓને લાઈસન્સ વગર વાહન આપવા બદલ વાલીઓ સામે ગુનો નોંધાયો

વિદ્યાર્થીઓને દંડ ફટકારાયા

ટ્રાફિક પોલીસ દ્વારા શહેરનાં વિવિધ વિસ્તારમાં લાઈસન્સ અને હેલ્મેટ વગર વાહન ચલાવતાં વિદ્યાર્થીઓને રોકી દંડ ફટકારીને કડક કાર્યવાહી કરવામાં આવી છે. ગઈ કાલથી ટ્રાફિક પોલીસ દ્વારા અકસ્માત અટકાવવા નાની વયે વાહન હંકારતાં વિદ્યાર્થીઓ સામે ડ્રાઈવ શરૂ કરાઈ છે. જેમાં ઘોડાસર વિસ્તારમાં યોજાયેલી એક ડ્રાઈવમાં એક સ્કૂલનાં ત્રણ વિદ્યાર્થીઓ હેલ્મેટ અને લાઇસન્સ વગર બુલેટ અને પલ્સર જેવાં વાહન ચલાવતાં પોલીસના હાથે ઝડપાયા હતા. 

વાલીઓ સામે ગુનો નોંધાયો

પોલીસે આ વિદ્યાર્થીઓનાં વાલીને જાણ કરી તેમના વાલી વિરુદ્ધ ટ્રાફિકની કલમ મુજબ ગુનો નોંધી કાર્યવાહી હાથ ધરી છે.  હેલ્મેટ નહીં પહેરનાર વાહનચાલકો પાસેથી પણ દંડ વસૂલવામાં આવ્યો હતો. અગાઉ પણ સ્કૂલ અને કોલેજમાં અભ્યાસ કરતા સગીર વયનાં વિદ્યાર્થીઓ વાહન લઇને જતા હોવાથી હેલ્મેટ અને લાઇસન્સ સહિતની 
ડ્રાઈવ રાખવામાં આવી છે. જેમાં પોલીસને મહદંશે સફળતા મળી છે.

પોલીસે સ્કુલ અને વાલીઓ સામે દંડ શસ્ત્ર ઉગામ્યું

સગીર વયનાં વિદ્યાર્થીઓ સ્કૂલ અને કોલેજ વાહન લઈને જતાં હોવાનું સામે આવતાં પોલીસે સ્કૂલ સંચાલકો અને વાલીઓ સામે પણ દંડનું શસ્ત્ર ઉગામ્યું હતું, પરંતુ સ્કૂલ સંચાલકો અને વાલીઓ વિદ્યાર્થીઓને વાહન લઈને જવાની છૂટ આપતા હોવાથી જ સગીર વિદ્યાર્થી વાહન લઈને સ્કૂલ જાય છે. ત્યારે પોલીસે વિદ્યાર્થીઓ પાસેથી વાહન કબજે કરીને દંડ વસૂલ્યો હતો.