આરોપ / 49 લાખ મૂડીનું 70 લાખ વ્યાજ..! નવસારીમાં વ્યાજખોરી મામલે ભાજપના કોર્પોરેટર સામે ફરિયાદ, એક્શનથી ફફડાટ

• નવસારી પોલીસની વ્યાજખોરી મામલે કડક કાર્યવાહી
• વ્યાજખોરી મામલે ભાજપના કોર્પોરેટર સામે ફરિયાદ
• નવસારી-વિજલપોર પાલિકાના બાંધકામ ચેરમેન સામે ફરિયાદ

રાજયમાં વ્યાજખોરો બેફામ બનીને આડેધડ વ્યાજ વસૂલતા હોવા ઉપરાંત ત્રાસ ગુજારતાં હોવાની અનેક વખત રાવ ઉઠે છે ત્યારે આ મામલે રાજ્યમાં પોલીસ દ્વારા ડ્રાઇવ ચલાવવામાં આવી છે અને 100 દિવસમાં વ્યાજખોરોના આતંકથી લોકોને ઉગારવા સરકાર મિશન મોડ પર કાર્યવાહી કરી રહી છે આવી સ્થિતી વચ્ચે નવસારી પોલીસ દ્વારા વ્યાજખોરી મામલે કડક કાર્યવાહી હાથ ધરાઇ છે. જેમાં ભાજપના કોર્પોરેટર સામે વ્યાજ વસુલવાના આરોપ લાગતા પોલીસે ફરિયાદ દાખલ કરી છે.

જગદીશ મોદી અને કિરણ મોદી સામે કરી ફરિયાદ

પોલીસે નવસારી-વિજલપોર પાલિકાના બાંધકામ સમિતિના ચેરમેન સામે ફરિયાદ નોંધી કાર્યવાહી હાથ ધરી છે. બાંધકામ શાખાના ચેરમેન જગદીશ મોદી સામે વ્યાજખોરીનો આરોપ લગાવાઈ રહ્યો છે. સાથી પોલીસે વ્યાજે નાણા આપવા મામલે વ્યાજખોર નગરસેવક અને તેના ભાઈ સામે ગુન્હો દાખલ કર્યો છે. ભોગ બનનાર મહિલાએ જગદીશ મોદી અને કિરણ મોદી સામે ફરિયાદ કરી બન્ને 2.5 ટકા જેટલું વ્યાજ વસૂલતા હોવાનો દાવો કર્યો છે.

આરોપીઓએ 1.19 કરોડની માંગ કરી હતી

વધુમાં મહિલાએ સોનાના દાગીના ગીરવે મૂકીને 49 લાખ રૂપિયા જેટલી રકમ વ્યાજે લીધી હોવાનો પણ ઉલ્લેખ કરાયો છે. ફરિયાદીએ એવું પણ જણાવ્યું કે, વ્યાજે નાણા આપતી વખતે એક ટકા જ વ્યાજની વાત થઈ હતી. પાછળથી 2.5 ટકા વ્યાજની માંગ કરવામાં આવતા મામલો પોલીસ મથકે પહોંચ્યો હતો. મહિલાએ ચોંકાવનારા આરોપ લગાવ્યા કે લૂંટારું બનેલા વ્યાજખોરોએ મુદ્દલ રકમ 49 લાખ, વ્યાજના રૂ.70 લાખ મળીને કુલ 1.19 કરોડની માંગ કરી હતી.

વ્યાજખોરો વિરુદ્ધ ફરિયાદ કરવા લોકો આગળ આવે: પોલીસની અપીલ

રાજ્યભરમાં વ્યાજખોરો સામે ચાલતી ડ્રાઈવ દરમિયાન અમદાવાદ પોલીસે બેફામ વ્યાજ વસુલતા શખ્સો સામે અનેક ગુનાઓ નોંધ્યા છે. વ્યાજખોરો સામે લોકદરબાર યોજી શહેરના સેટેલાઇટ, ઇસનપુર, ઓઢવ, ચાંદખેડામાં ડ્રાઇવ દરમિયાન 53 નવી અરજીઓ આવી હતી.આ દરમિયાન ઓઢવમાં અધિકારીઓને મળ્યા વગર માત્ર ફોન પર રજુઆત કરી હતી. જેમાં પણ પોલીસે ગુનો નોંધ્યો હતો. જો કે હજુ સુધી એક પણ આરોપીઓ પોલીસ ઝપટે ચડ્યા નથી. હજુ પણ વ્યાજખોરનો ભોગ બનેલા લોકો આગળ આવે તેવી પોલીસ દ્વારા અપીલ કરાઈ છે.

ગૃહ રાજ્યમંત્રી હર્ષ સંઘવી રાતે 8.30 કલાકે વિડીયો કોંન્ફ્રેંસ થકી ઉચ્ચ પોલીસ અધિકારીઓ સાથે બેઠક કરી હતી. રાજ્યમાં હાલ વ્યાજખોરો વિરુદ્ધ સ્પેશિયલ ડ્રાઇવ ચાલી રહી છે ત્યારે આ મામલે જિલ્લા વાઇસ સ્પેશ્યલ ડ્રાઈવ દરમિયાન થયેલી પોલીસની કામગીરી અંગે બેઠકમાં સમીક્ષા કરાઈ હતી. જેમાં દરેક જિલ્લામાં વ્યાજખોરો વિરૂધ કરવામાં આવેલ ફરિયાદો, કેસો અને રજુઆતો પરની કાર્યવાહીની સમીક્ષા કરવામાં આવી હતી.