ભાવનગરના સાંસદ ભારતીબેન શીયાળ વિરુદ્ધ નોંધાઇ ફરિયાદ 

ભાવનગરના લોકસભાના સાંસદ ભારતીબેન શીયાળ વિરુદ્ધ ફરિયાદ કરવામાં આવી છે, આ ફરિયાદ આચાર સંહિતાના ભંગને લઈને કરવામાં આવી છે. મળતી માહિતી મુજબ બોટાદ જિલ્લા કોંગ્રેસ પ્રમુખ રમેશ મેરે ફરિયાદ નોંધાવી છે. જેમાં સાંસદ ભારતીબેન શીયાળ દ્વારા અખબારોમાં લોક પ્રસિધ્ધિની જાહેરાત કરવામાં આવી હોવાની વાતનો ઉલ્લેખ કરવામાં આવ્યો છે.

મહત્વનું છે કે,લોકસભાની ચૂંટણીની જાહેરાત ચૂંટણીપંચ દ્વારા કરવામાં આવી. ત્યારથી જ આચાર સંહિતા લાગુ થઈ ગઈ છે. જેમાં રાજકીય પક્ષો દ્વારા કોઈપણ પ્રકારની સરકારી જાહેરાત કરી શકાતી નથી કે જે તે સાંસદ પણ પોતાની લોક પ્રસિધ્ધિની જાહેરાત કરી શકતા નથી.
 

તમને જણાવી દઇએ કે, CM નિવાસે મળેલી બેઠકને લઇ ચૂંટણીપંચમાં ફરિયાદ થઈ હતી. જેમાં કોંગ્રેસ દ્વારા આચાર સંહિતા ભંગની ફરિયાદ કરવામાં આવી હતી. ત્યારે આ ફરિયાદ મામલે ક્લીન ચિટ આપવામાં આવી છે. મળતી માહિતી મુજબ આ મામલે ગાંધીનગર SDM અને ડે.કમિશનરને તપાસ સોંપાઈ હતી. જેને લઈને ગાંધીનગર કલેક્ટરે માર્ગ મકાન વિભાગના કાર્યપાલક ઇજનેર પાસેથી વિગતો મેળવી હતી અને ત્યારબાદ ગાંધીનગર કલેક્ટરે આચાર સંહિતાની જોગવાઇને ટાંકીને ચૂંટણી અધિકારીને રિપોર્ટ સોંપ્યો હતો. આ રિપોર્ટમાં આચાર સંહિતાનો ભંગ થતો ન હોવાનો ઉલ્લેખ કરવામાં આવ્યો છે. 
 

તમને જણાવી દઇએ કે, થોડા દિવસો પહેલાં નવસારીના પ્રવર્તમાન સાંસદ સી.આર.પાટીલે તેમની ફેસબુક પોસ્ટ પર પીએમ મોદીના ફોટા સાથે સેનાની મજબૂતી બતાવતો એક ફોટો અપલોડ કર્યો હતો.  પીએમ મોદીના ફોટા સાથે સેનાની મજબૂતી બતાવતો એક ફોટો સીધો જ આચાર સંહિતાનો ભંગ કરતું હોવાનું માલુમ પડતા કોંગ્રેસના કોર્પોરેટર અસલમ સાઈકલવાળાએ પોસ્ટનો સ્ક્રીનશોટ લઈને કલેકટર અને ચૂંટણીપંચને ફરિયાદ કરી હતી.