એક્શન / રાજકોટમાં રસ્તો બંધ કરી કેક કટિંગ કરી રહ્યું હતું ટોળું, પોલીસ સમજાવવા પહોંચી તો થઈ મોટી બબાલ, 9 વિરુદ્ધ ફરિયાદ

• રાજકોટમાં જાહેરમાં બર્થ ડે પાર્ટીની ઉજવણીમાં મારામારી 
• રસ્તો બંધ કરી કેટલાક યુવકો કરી રહ્યા હતા બર્થ ડે પાર્ટી 
• બર્થ ડેની ઉજવણી કરતા યુવકોએ કર્યો હતો પોલીસ પર હુમલો
• માલવીયાનગર પોલીસ સ્ટેશનમાં 9 લોકો વિરુદ્ધ મારામારીની ફરિયાદ

રાજકોટમાં ગતમોડી રાત્રે કેટલાક યુવકો અને પોલીસ વચ્ચે ઘર્ષણ સર્જાયું હતું. ઘર્ષણ બાદ ઘટના સ્થળે માલવીયાનગર પોલીસે ચુસ્ત બંદોબસ્ત ગોઠવી દીધો હતો. આ મામલે રાજકોટના માલવીયાનગર પોલીસ સ્ટેશનમાં 9 લોકો સામે મારામારીની ફરિયાદ નોંધાવામાં આવી છે. જેમાંથી 4 આરોપીઓની પોલીસે અટકાયત કરી છે. 

બર્થ ડે પાર્ટી ઉજવણી કરતી ટોળકી અને પોલીસ વચ્ચે ઘર્ષણ
આ મામલે વિગતવાર વાત કરીએ તો રાજકોટના સ્વામિનારાયણ ચોક નજીક ગઈકાલે રાતે કેટલાક યુવાનો રસ્તો બંધ કરીને જાહેરમાં જન્મદિવસની ઉજવણી કરી રહ્યા હતા. આ અંગેની જાણ થતાં માલવીયાનગર પોલીસની ટીમ ઘટના સ્થળે પહોંચી હતી. પોલીસે જાહેરમાં બર્થ ડે પાર્ટીની ઉજવણી કરનારાઓને સમજાવવા પ્રયાસ કર્યો હતો. જેથી ઉશ્કેરાઈને કેટલાક યુવાનોએ પોલીસ પર હુમલો કર્યો હતો. 

માલવીયાનગર પોલીસ સ્ટેશનમાં 9 સામે ફરિયાદ
જે બાદ ઘટના સ્થળે પોલીસે ચુસ્ત બંદોબસ્ત ગોઠવી દીધો હતો. સાથે રાજકોટના માલવીયાનગર પોલીસ સ્ટેશનમાં 9 લોકો વિરુદ્ધ મારામારી તેમજ ટોળામાં એકઠા થઈ પોલીસ પર હુમલાનો ગુનો નોંધાયો હતો. પોલીસની તપાસમાં સામે આવ્યું છે કે આ બર્થ ડે પાર્ટી માથાભારે કહેવાતા વિશાલ જોશી ઉર્ફે રોકીની હતી. 

4 આરોપીઓની અટકાયત 
પોલીસ પર હુમલો કરવા મામલે માલવીયાનગર પોલીસ સ્ટેશનમાં વિશાલ જોશી, નયના જોશી, મિતાલી જોશી, દર્શન ભટ્ટ, કિરીટ પીઠડીયા, વિનય ભટ્ટ, ગોપાલ બોળીયા અને પ્રતીક માલમ સામે ગુનો નોંધાયો છે. હાલ પોલીસે 4 આરોપીઓની અટકાયત કરી છે. જ્યારે અન્યને ઝડપી પાડવામા ચક્રો ગતિમાન કર્યા છે.