કોંગ્રેસ દ્વારા અમદાવાદમાં નિકોલ ખાતે ગીતા પટેલના સમર્થનમાં જાહેરસભાનું આયોજન કરવામાં આવ્યુ હતુ. જેમાં હાર્દિક પટેલ અને ગીતા પટેલ સહિતના આગેવાનો ઉપસ્થિત રહ્યા હતા. જો કે હાર્દિક પટેલ સભામાં બોલવા ઉભો થયો તે પહેલા સભામાં હોબાળો થયો હતો. જેને લઇને પોલીસ કાર્યવાહી હાથ ધરવામાં આવી છે.
અમદાવાદમાં હાર્દિક પટેલની સભામાં હોબાળા મામલે ફરિયાદ નોંધાવા તજવીજ હાથ ધરવામાં આવી છે. નિખિલ સવાણી અને અક્ષય પટેલ સહિત 150 વિરુદ્વ ફરિયાદ નોંધાવા માટે તૈયારીઓ શરૂ કરવામાં આવી છે.
મહત્વનું છે કે, સુરતના યુવાનોએ હાર્દિક પટેલની સભામાં હોબાળો કર્યો હતો. અલ્પેશ કથીરિયાના બેનર લઈને સભામાં હોબાળો કર્યો હતો. આ મામલે હાર્દિક પટેલ આક્ષેપ કર્યા હતા કે, હુમલાખોરો ભાજપના કાર્યકરો છે. આ મામલે વિરોધ કરનાર યુવકોએ હાર્દિક પટેલના આક્ષેપ ફગાવ્યા છે. વિરોધ કરનાર યુવકોનો દાવો છે કે, તેઓ ભાજપના કાર્યકરો નથી.
અત્રે ઉલ્લેખનીય છે કે, કોંગ્રેસ દ્વારા અમદાવાદમાં નિકોલ ખાતે ગીતા પટેલના સમર્થનમાં જાહેરસભાનું આયોજન કરવામાં આવ્યુ હતુ. જેમાં હાર્દિક પટેલ અને ગીતા પટેલ સહિતના આગેવાનો ઉપસ્થિત રહ્યા હતા. જો કે હાર્દિક પટેલ સભામાં બોલવા ઉભો થયો તે પહેલા સભામાં હોબાળો થયો હતો. સભામાં તોડફોડ કરવામાં આવી હતી. ત્યારે પોલીસે વચ્ચે પડીને મામલો થાળે પાડ્યો હતો. હોબાળો કરનાર શખ્સોની અટકાયત કરી હતી.
મળતી માહિતી મુજબ આ સભામાં અલ્પેશ કથીરિયાના સમર્થકોએ હાર્દિકનો વિરોધ કર્યો હતો. જેમાં તેમણે અલ્પેશ કથીરિયાને છોડાવવાની માંગ કરી હતી. પરંતુ હાર્દિક દ્વારા ભાજપના લોકો અલ્પેશ કથીરિયાના પોસ્ટર લઇને આવ્યા હોવાનો આક્ષેપ કરવામાં આવ્યો છે.
મહત્વનું છે કે, સુરેન્દ્રનગરની સભામાં પણ હાર્દિક પટેલને એક શખ્સે તમાચો માર્યો હતો. ત્યારે હવે સભામાં હોબાળા મામલે ફરિયાદ નોંધાવાની કાર્યવાહી હાથ ધરવામાં આવી છે.