રસ્તો ભૂલી જવાને કારણે જુનિયર ક્લાર્કની પરીક્ષા આપવા પહોંચેલા બે ઉમેદવારો મુંજવણમાં મુકાયા હતા, ત્યારે સાણંદ પોલીસ સ્ટેશનના પી.આઈએ બંને પરીક્ષાર્થીને સમયસર ચોક્કસ પરીક્ષા સ્થળ પર પહોંચાડ્યા હતા.
સાણંદ પોલીસની સરાહનીય કામગીરી
રસ્તો ભૂલી ગયેલા પરીક્ષાર્થીઓની કરી મદદ
જીપમાં બેસાડી ઉમેદવારોને પરીક્ષા કેન્દ્ર સુધી પહોંચાડ્યા
29 જાન્યુઆરીએ જુનિયર ક્લાર્કની પરીક્ષાનું પેપર ફૂટી જવાના કારણે રદ થયેલી જુનિયર ક્લાર્કની પરીક્ષા આજે ગુજરાતના 32 જિલ્લાના 30 હજાર કેન્દ્રો પર યોજાઈ હતી. આ દરમિયાન પરીક્ષાર્થીઓને કોઈપણ પ્રકારની અગવડ ન પડે એ માટે તંત્ર દ્વારા વ્યવસ્થા કરવામાં આવી હતી. આ દરમિયાન સાણંદ પોલીસ તંત્ર દ્વારા પરીક્ષાર્થીઓ માટે સરાહનીય કામગીરી કરવામાં આવી હતી.
ઉમેદવારોની વ્હારે આવ્યા PI રમેશ જાદવ
જુનિયર ક્લાર્કની પરીક્ષા આપવા માટે આવેલા બે વિદ્યાર્થીઓ રસ્તો ભટકી ગયા હતા. તેઓ પરીક્ષા કેન્દ્રથી 10 કિલોમીટર દૂર પહોંચી ગયા હતા. કુંવર ગામમાં સેન્ટર હતું અને ઉમેદવારો સાણંદના શ્રીનગર ગામમાં અટવાયા હતા. આ દરમિયાન સાણંદ પોલીસ સ્ટેશનના પી.આઈ રમેશ જાદવ પરીક્ષાર્થીઓની વ્હારે આવ્યા હતા.
બંને ઉમેદવારોને સમયસર પરીક્ષા કેન્દ્રમાં પહોંચાડ્યા
PI રમેશ જાદવે બંને ઉમેદવારોને જીપમાં બેસાડીને સમયસર ચોક્કસ પરીક્ષા સ્થળ પર પહોંચાડ્યા હતા. પરીક્ષા શરૂ થવાનો થોડા સમય બાકી હતો તેવા સમયે પોલીસે બંને પરીક્ષાર્થીઓની મદદ કરી હતી. ઉમેદવારોએ પોલીસની કામગીરીને લઇને આભાર માન્યો હતો.