ભારતીય બોક્સિંગની શાન કહેવાતા વિજેન્દર સિંહનું પ્રોફેશનલ બોક્સિંગમાં શાનદાર પ્રદર્શન કાયમ રહ્યું છે. તેણે ગઈ કાલે મોડી રાતે યોજાયેલી ફાઇટમાં બે વાર કોમનવેલ્થ ગેમ્સના મિડલવેઇટ ચેમ્પિયન ચાર્લ્સ એદામુને ઢેર કરી દીધો. આમ વિજેન્દરની પ્રોફેશનલ કરિયરમાં નોટઆઉટ રહેવાની સફર ચાલુ જ રહી છે. આ તેનો ૧૨મો વિજય હતો.
કોમનવેલ્થ ગેમ્સમાં જીત્યો વિજેન્દર
ભારતીય બોક્સિંગની શાન ગણાય છે વિજેન્દર
બોક્સર એદામુને કર્યો ઢેર
WBO એશિયા પેસિફિક અને ઓરિયન્ટલ સુપર મિડલવેઇટ ચેમ્પિયન વિજેન્દરે આ વર્ષે જુલાઈમાં માઇક સ્નાઇડરને હરાવીને પોતાની પ્રોફેશનલ કરિયરની સતત ૧૧મી જીત મેળવી હતી. ૩૪ વર્ષીય ઓલિમ્પિક બ્રોન્ઝ મેડલ વિજેતા વિજેન્દરે ૮મા રાઉન્ડમાં ઘાનાના બોક્સર એદામુને ઢેર કરીને ફાઇટ પોતાના નામે કરી લીધી હતી. બાઉટ દરમિયાન વિજેન્દર આક્રમક જોવા મળ્યો હતો. બીજા અને છઠ્ઠા રાઉન્ડમાં તો તેના મુક્કાથી ઘાયલ થયેલો એદામુ રિંગમાં જ ઢળી પડ્યો હતો.
ઉલ્લેખનીય છે કે એદામુને ૪૭ ફાઇટનો અનુભવ હતો અને આ ૪૭ ફાઇટમાંથી તેણે ૩૩માં જીત મેળવી હતી, જ્યારે ૧૪માં હારનો સામનો કર્યો હતો. તેના નામે ૨૭ નોકઆઉટ જીત પણ નોંધાયેલી હતી, પરંતુ આ લાંબો અનુભવ ગઈ કાલે વિજેન્દર સામે કામમાં આવ્યો નહોતો.
જીત બાદ વિજેન્દરે કહ્યું, ''આ શાનદાર ફાઇટ હતી. એદામુ સારો ફાઇટર છે, પરંતુ આ ફાઇટ માટે મેં જોરદાર તૈયારીઓ કરી હતી અને મારો ગેમ પ્લાન મારા પ્લાન અનુસાર જ ચાલ્યો. મને એમ હતું કે ફાઇટ ત્રણ-ચાર રાઉન્ડમાં ખતમ થઈ જશે, પરંતુ એવું બન્યું નહીં. હું મારા પ્રદર્શનથી ઘણો ખુશ છું.''