સુરત શહેરના છેવાડે સારોલી નિયોલ ચેક પોસ્ટ પાસેથી 1.6 કરોડના ડ્રગ્સ સાથે એક રાજસ્થાની યુવકની ધરપકડ કરવામાં આવી હતી. હવે આ મામલે સુરત પોલીસ કમિશનર અજય તોમરે મહત્વના ખુલાસા કર્યા છે.
સુરતમાં ડ્રગ્સ રેકેટનો પર્દાફાશ થયો છે. સુરતમાં ગત 25 સપ્ટેમ્બરે ગૃહ રાજ્યમંત્રી હર્ષ સંઘવીના હસ્તે સારોલી પોલીસ સ્ટેશનનું લોકાર્પણ કરવામાં આવ્યું હતું. ત્યારે સારોલી પોલીસ સ્ટેશન શરૂ થયા ને પહેલો કેસ ડ્રગ્સનો નોંધાયો છે. પોલીસે બુધવારે મોડીરાતે એક યુવકને એટકાવતા તેની બેગમાંથી 1 કિલો 670 ગ્રામ એમડી ડ્રગ્સ મળી આવ્યું હતું.
સારોલી પોલીસને મળી સફળતા
આ મામલે પોલીસ કમિશનર અજય તોમરે પત્રકાર પરિષદ યોજી ચોંકાવનારા ખુલાસા કર્યા છે. તેમણે જણાવ્યું કે, સારોલી પોલીસને બાતમી મળતા ટીમે નિયોલ ચેક પોસ્ટ પાસે વોચ ગોઠવી હતી, આ દરમિયાન એક શંકાસ્પદ યુવકને અટકાવીને તેની બેગ તપાસવામાં આવી હતી. જેમાંથી ડ્રગ્સનો જથ્થો મળી આવ્યો હતો. શરૂઆતમાં આ યુવકે આ સફેદ પાવડરને ફટકડી ગણાવી હતી. જોકે, બાદમાં એફએસએલ રિપોર્ટમાં તે MD ડ્રગ્સ હોવાનું સામે આવ્યું હતું.
અત્યાર સુધીનો સુરતમાંથી મોટો ડ્રગ્સનો જથ્થો પકડાયોઃતોમર
તેમણે જણાવ્યું કે, પોલીસે આ યુવક પાસેથી 1 કિલો 670 ગ્રામ ડ્રગ્સનો જથ્થો કબજે કર્યો છે. જેની કિંમત 1 કરોડ 60 લાખ 70 હજાર થાય છે. સુરતમાં એમડીના આટલા મોટા જથ્થાનો પ્રથમ કેસ છે. ઝડપાયેલા પકડાયેલા ડ્રગ્સ માફીયાનું નામ અફઝલ ઉર્ફે ગુરૂ સુબ્રરતઅલી સૈયદ મૂળ રાજસ્થાનનો રહેવાસી છે અને હાલ અફઝલ ઉર્ફે ગુરુનો પરિવાર મુંબઈ ખાતે રહે છે. ડ્રગ્સ માફીયા લકઝરી બસમાં મુંબઇથી એમડી લઈ સુરત સપ્લાય કરવા આવ્યો હતો.
ક્રાઈમ બ્રાંચને સોંપાવામાં આવી તપાસ
અજય તોમરે કહ્યું કે, મુંબઈથી તેને ડ્રગ્સ આપનારનું નામ પણ સામે આવ્યું છે. જે ઈસમે ડ્રગ્સ આપ્યું છે, તેના પિતા પણ જેલમાં હોવાનું પોલીસને જાણવા મળ્યું છે. આ કેસની તપાસ હવે ક્રાઈમ બ્રાંચના અધિકારીઓને સોંપવામાં આવી છે. જે કોઈ આમાં સંડોવોયાલ છે તેને ધરપકડ કરવામાં આવશે. સુરતને ડ્રગ્સથી મુક્ત રાખવા માટે પોલીસ સતત કામગીરી કરી રહી છે.
ગત અઠવાડિયે ઝડપાયું હતું 7.82 લાખનું ડ્રગ્સ
અત્રે ઉલ્લેખનીય છે કે, થોડા દિવસ અગાઉ સુરત પોલીસે અલ્લારખા ઉર્ફે લાલા બરફવાલા નામના શખ્સ અને તેના 2 સાથીઓને એમડી ડ્રગ્સ સાથે ઝડપી પાડવામાં આવ્યા હતા. આ શખ્સો પાસેથી 7.82 લાખ રૂપિયાનું ડ્રગ્સ મળી આવ્યું હતું. આ ઉપરાંત આરોપીઓ પાસેથી ઈન્જેક્શનની સીરીંજ, ડ્રગ્સ પેકિંગ માટે પ્લાસ્ટીકની કોથળી અને વજન કરવા ડિજિટલ કાંટો પણ મળી આવ્યો હતો.જેમની પૂછપરછમાં તેઓ આ ડ્રગ્સ મુંબઈથી લાવ્યા હોવાનું સામે આવ્યું હતું.