પોતાનો જીવ જોખમમાં મુકીને કબૂતરનો જીવ બચાવી રાધનપુરના TRB જવાને સરાહનીય કામગીરી કરી છે. તેમની આ કામગીરીને લોકો બિરદાવી રહ્યાં છે.
રાધનપુરના TRB જવાન ભૂરાભાઈની સરાહનીય કામગીરી
પોતાનો જીવ જોખમમાં મુકી બચાવ્યો કબૂતરનો જીવ
ઓવરબ્રિજમાં દોરીમાં ફસાયેલા કબૂતરનો બચાવ્યો જીવ
ઉત્તરાયણના પર્વ પર અનેક એવી ઘટનાઓ સામે આવતી હોય છે કે જીવદયા પ્રેમીઓનું હૃદય દ્વવી ઉઠે છે. રાધનપુરમાં આવી જ એક ઘટના સામે આવી છે. જેમાં એક TRB જવાને કબૂતરનો જીવ જોખમમાં હોવાનું જોયું અને એક મિનિટ પણ વિચાર્યા વિના ઓવરબ્રિજની પાળી ઉપર ચડીને કબૂતરનો જીવ બચાવ્યો.
દોરીના ગૂંચળામાં ફસાઈ ગયું હતું કબૂતર
ઉતરાયણના તહેવાર પર ધારદાર કાચવાળી દોરીઓથી અબોલ પશુ-પક્ષીઓને બચાવવા અનેક જીવદયા સંસ્થાઓ દ્વારા પ્રવૃત્તિઓ હાથ ધરવામાં આવી હતી, જેના કારણે અનેક અબોલ પશુ પક્ષીઓને નવજીવન પ્રાપ્ત થયા છે. ઉતરાયણના પર્વ બાદ જ્યાં ત્યાં પડેલા દોરીના ગૂંચળાઓમાં અમુક પક્ષીઓ ફસાવાની ઘટનાઓ પ્રકાશમાં આવતી હોય છે ત્યારે પાટણ જિલ્લામાં પણ આવી ઘટના સામે આવી હતી. પાટણ જિલ્લાના તાલુકા મથક રાધનપુર ખાતે ઓવરબ્રિજ નજીકના ઇલેક્ટ્રીક વાયરમાં ફસાયેલા દોરીના ગૂંચળામાં કબૂતર ફસાઈ ગયું હતું અને તરફડીયા મારી રહ્યું હતું.
કબૂતરને મહામુસીબતે મુક્ત કર્યું
આ દરમિયાન હાઈવે પર ફરજ બજાવતા ભુરાભાઈ નામના TRB જવાનનું ધ્યાન જતાં તેઓ તાત્કાલિક બ્રિજ પર ગયા અને પોતાનો જીવના જોખમે બ્રિજની પાળી ઉપર ચડી ઈલેક્ટ્રિક વાયરમાં દોરામાં ફસાયેલા કબૂતરને મહામુસીબતે મુક્ત કરી જીવદયાની ભાવનાને ઉજાગર કરી.
વીડિયો સોશિયલ મીડિયા પર વાયરલ થયો
TRB જવાનની આ અબોલ જીવ પ્રત્યેની નિસ્વાર્થ સેવાને જોઈને દરેક લોકો તેમના વખાણ કરી રહ્યા છે. સમગ્ર ઘટના ક્રમનો વીડિયો સોશિયલ મીડિયા પર વાયરલ થયો છે ત્યારે આ વીડિયો જોઈને દરેક લોકો ભુરાભાઈના આ કાર્યને બિરદાવી રહ્યાં છે.