ડ્રગ્સ કેસમાં ટીવી ઈન્ડસ્ટ્રીની જાણીતી હાસ્ય કલાકાર ભારતી સિંહ ની NCB દ્વારા ધરપકડ કરવામાં આવી છે. તેના પતિ હર્ષની પણ પૂછપરછ ચાલી રહી છે. સૂત્રો દ્વારા મળેલી માહિતી પ્રમાણે ભારતી સિંહ અને તેના પતિ હર્ષ એ પૂછપરછમાં ડ્રગ્સનું સેવન કર્યું હોવાની વાતને સ્વીકારી હતી.
મુંબઈમાં કોમેડિયન ભારતીસિંહની કરાઇ ધરપકડ
NCB એ ડ્રગ્સ કેસમાં પતિ હર્ષ સાથે કરી અટકાયત
ભારતીસિંહ ના ઘરે દરોડા દરમિયાન ગાંજા સાથે ડ્રગ્સ મળ્યું હતું
NCB ડ્રગ્સ કેસમાં સતત પોતાનું વલણ કડક બનાવતી જઈ રહી હોય તેવુ જણાઈ રહ્યું છે. શનિવારે NCB એ મુંબઈમાં જાણીતી હાસ્ય કલાકાર ભારતી સિંહ ની ધરપકડ કરી છે. તેના પતિ હર્ષની પૂછપરછ કરવામાં આવી હતી જે બાદ ધરપકડ કરાઇ હતી. ભારતી સિંહ ને આજે રાત્રે NCB કચેરી ખાતે કસ્ટડીમાં રાખવામાં આવશે અને આવતીકાલે કોર્ટમાં રજૂ કરવામાં આવશે.
મુંબઈમાં ત્રણ સ્થળોએ NCB એ દરોડા પાડયા હતા
મહત્વનું છે કે શનિવારે NCB એ મુંબઇમાં 3 સ્થળોએ દરોડા પાડ્યા હતા. ભારતી સિંહ અને તેના પતિ હર્ષના ઘરે દરોડા પાડવામાં આવ્યા હતા. સૂત્રો દ્વારા મળેલી માહિતી અનુસાર ભારતી સિંહ ના ફ્લેટમાંથી ગાંજો મળી આવ્યો છે. જે બાદ ભારતી સિંહ અને તેના પતિ હર્ષ લિંબાચીયાને NCB દ્વારા સમન્સ અપાયું હતું. હવે ભારતી સિંહ ની ધરપકડ કરવામાં આવી છે.
21 નવેમ્બરના રોજ, NCB એ ખાર ડાંડા વિસ્તારમાં દરોડા પાડ્યા હતા અને LSD , ગાંજા (40 ગ્રામ) અને Nitrazepam (સાયકોટ્રોપિક ડ્રગ્સ) સહિતના ડ્રગ્સ સાથે 21 વર્ષ ના એક તસ્કરને પકડી પાડ્યો છે.
ભારતી સિંહ ની ઓફિસ અને ઘરે NCB એ પાડી હતી રેડ
આ પછી, NCB એ શનિવારે અન્ય બે સ્થળોએ દરોડા પાડ્યા હતા, જેમાં હાસ્ય કલાકાર ભારતી સિંહ ની પ્રોડક્શન ઓફિસ અને ઘર (બંને સ્થળો) એ દરોડો પાડ્યો હતો, જ્યાંથી 86.5 ગ્રામ ગાંજો મળી આવ્યો હતો. ભારતી સિંહ અને તેના પતિ હર્ષ લિંબાચિયા બંનેએ ગાંજા ના સેવનની વાત કબૂલી છે. ભારતી સિંહ ની NDPS એક્ટ 1986 ની જોગવાઈ હેઠળ ધરપકડ કરવામાં આવી હતી.
મહત્વ નું છે કે અભિનેતા સુશાંત સિંહ રાજપૂત 14 જૂન 2020 ના રોજ તેમના ફ્લેટમાં મૃત હાલતમાં મળી આવ્યા પછી CBI એ આ કેસની તપાસ શરૂ કરી હતી. સુશાંતની ગર્લફ્રેન્ડ રિયા ચક્રવર્તીની વોટ્સએપ ચેટમાં ડ્રગ્સ ની વાત સામે આવ્યા પછી ડ્રગ્સ એન્ગલની તપાસ માટે NCB એ આ કેસમાં તપાસ શરૂ કરી હતી. જેના પછી NCB ઘણા પેડલર્સ અને સપ્લાયરોની ધરપકડ કરવામાં આવી હતી, એ સિવાય બોલિવૂડની ઘણી જાણીતી અભિનેત્રીઓ જેવી કે દીપિકા પાદુકોણ, સારા અલી ખાન, શ્રદ્ધા કપૂર અને રકુલ પ્રીત સિંહની પણ પૂછપરછ કરવામાં આવી હતી.