Health / ઠંડીની અસર હૃદય અને મગજ પર, હાર્ટએટેક અને બ્રેઇન સ્ટ્રોકના દર્દી વધ્યા

મધ્યપ્રદેશમાં આ અઠવાડિયે શરૂ થયેલી જબરજસ્ત ઠંડીએ લોકોના દિલ અને દિમાગ પર અસર કરી દીધી છે. હોસ્પિટલમાં હાર્ટએટેકના દર્દીઓની સંખ્યા ૩૦થી ૫૦ ટકા વધી ચૂકી છે. ભોપાલની હમિદિયા હોસ્પિટલમાં આઇસીયુમાં પહેલા હાર્ટ એટેકના રોજ એક બે દર્દી આવતા હતા, પરંતુ હવે ચાર પાંચ દર્દી આવે છે. મગજની નસોમાં લોહી બ્લોક થવાથી બ્રેઇન સ્ટ્રોકના રોજ સરેરાશ ત્રણ દર્દી આવે છે.

ઠંડીમાં હાર્ટની નસો સંકોચાઇ જાય છે

હમિદિયા હોસ્પિટલના કાર્ડિયોલોજિસ્ટ ડો. આર.એસ. મીનાએ જણાવ્યું કે ઠંડીમાં અન્ય અંગોની જેમ હાર્ટની નસો સંકોચાઇ જાય છે. લોહી પણ ઘટ્ટ થઇ જાય છે. આવા સંજોગોમાં જે દર્દીઓના હૃદયની નસોમાં પહેલેથી બ્લોકેજ હોય છે તેમને હાર્ટએટેકનો ખતરો વધી જાય છે. થોડા સમય પહેલાં હૃદયની બીમારીના દર્દી ઘટ્યા હતા, પરંતુ હવે હાર્ટએટેકના દર્દીઓ વધી ચૂક્યા છે. 

એલએન મેડિકલ કોલેજના કાર્ડિયોલોજિસ્ટ ડો. વિવેક ત્રિપાઠીએ જણાવ્યું કે ઠંડી વધવાની સાથે હાર્ટએટેકના ૨૫ ટકા દર્દીઓ વધી ગયા છે. બાળકોમાં ગળામાં ઇન્ફેક્શન, ન્યુમોનિયાના દર્દી ૩૦ ટકા સુધી વધ્યા છે. અહીં રોજ બ્રેઇન સ્ટ્રોકના બેથી ત્રણ દર્દી આવી રહ્યા છે.

આંખની સમસ્યાઓ પણ વધી 

ઠંડી વૃદ્ધોની આંખો પર પણ અસર કરી રહી છે. હમિદિયા હોસ્પિટલમાં નેત્ર રોગ વિભાગના સહ પ્રાધ્યાપક ડો. એસ.એસ. કુબરેએ જણાવ્યું કે બે દિવસની અંદર બે દર્દીઓની એક એક આંખની રોશની સેન્ટ્રલ રેટિનલ આર્ટરી ઓક્લુઝનના કારણે ચાલી ગઇ. આ બીમારીમાં રેટિનાને લોહી પહોંચાડતી નસમાં અવરોધ આવવાથી રોશની ચાલી જાય છે.

આટલી સાવધાની રાખો

1. વૃદ્ધોએ હુંફાળું પાણી ખૂબ જ પીવું જોઇએ અને આઇબોલની મસાજ પણ કરવી જોઇએ.
2. સવારે તડકો નીકળે તે પહેલા બહાર ન નીકળો.
3. બીપીના દર્દીઓ નિયમિત દવા લો.