કાશ્મીરમાં આ વર્ષે ઠંડીએ ૩૦ વર્ષનો રેકોર્ડ તોડી દીધો છે અને બરફ વર્ષાએ દસ વર્ષનો. શ્રીનગરમાં ૨૬ જાન્યુઆરી પણ ચારથી પાંચ ફૂટ બરફ વર્ષા અને માઇનસ ૨.૪ ડિગ્રી વચ્ચે મનાવાઇ હતી.
આવી કડકડતી ઠંડી કાશ્મીરના લોકોનાં ડેઇલી રૂટિન પર પણ અસર કરે છે. ખાણી પીણીથી લઇને પહેરવેશ પણ બદલાઇ જાય છે. કાશ્મીરમાં ઠંડીની સિઝન ટૂરિસ્ટો માટે પણ હોય છે. આ સિઝનમાં અહીંની પરંપરા અને સંસ્કૃતિના રંગ પણ જોવા મળે છે.
આ વર્ષે થયેલી ભારે બરફ વર્ષાને લઇને સોશિયલ મીડિયા પર એવી પોસ્ટ શેર થઇ છે કે દક્ષિણ કાશ્મીરમાં લોકો પોતાનાં ઘરમાં અવરજવર બીજા માળેથી કરી રહ્યા છે. કેમકે પહેલો માળ સંપૂર્ણ રીતે બરફમાં દબાઇ ગયો છે. કેટલીક હદ સુધી આ વાત સાચી પણ છે. થોડા દિવસ પહેલાં પુલવામાનાં સાંગરવાની ગામમાં છ ફૂટ બરફ પડ્યો અને લોકોને આવવા જવાનો રસ્તો બનાવવા માટે બરફની વચ્ચે ખોદકામ કરવું પડ્યું હતું. એક ઘરમાંથી બીજા ઘર કે બજાર સુધી જવામાં એવું અનુભવાય છે કે લોકો બરફની સુરંગોમાં ચાલી રહ્યા છે.
હાલમાં કાશ્મીરમાં ચિલ્લાઇ કલા ચાલે છે. આ સમય ઠંડીનો સૌથી મુશ્કેલ સમય કહેવાય છે. ૪૦ દિવસની ચિલ્લાઇ કલા ૨૦ ડિસેમ્બરથી શરૂ થઇને ૩૧ જાન્યુઆરી સુધી રહે છે. જમ્મુ કાશ્મીર અને લદ્દાખમાં આ ૪૦ દિવસ દરમિયાન રાતનું તાપમાન માઇનસમાં ચાલ્યું જાય છે. મોટાભાગે તાપમાન પણ છથી સાત ડિગ્રીની ઉપર આવતું નથી. ૪૦ દિવસ આવી કડાકાની ઠંડીને સ્થાનિક ભાષામાં ચિલ્લાઇ કલા કહેવાય છે.
કાશ્મીરના લોકો પહેલેથી આ પરિસ્થિતિ માટે તૈયાર રહે છે. ચિલ્લાઇ કલા દરમિયાન અહીંના લોકો સામાન્ય રીતે ફેરન પહેરે છે. તે એક લાંબા કોટ જેવું વસ્ત્ર હોય છે. યુવા, વૃદ્ધ, પુરુષ હોય કે મહિલાઓ દરેક વ્યક્તિ ફેરનનો ઉપયોગ કરે છે. ફેરનમાં એક જગ્યા બની હોય છે, જ્યાં કાંગડી રાખી હોય છે. કાંગડી માટીના કટોરામાંથી બની હોય છે. તેની ઉપર વિલો વર્ક હોય છે. તેના કટોરાની અંદર કોલસો નાખીને સળગાવવામાં આવે છે. કાંગડી ૮થી ૧૦ કલાક સુધી આરામથી શરીરને ગરમ રાખે છે.
ગયા અઠવાડિયે કાશ્મીરના મુખ્ય પર્યટક સ્થળો હાઉસફૂલ થઇ ચુક્યાં છે. અહીં લગભગ ૧૦૦૦ ટૂરિસ્ટ આવે છે. એક મહિના પહેલાં સુધી આ સંખ્યા સેંકડોમાં હતી. ખરાબ હવામાનના કારણે ડઝન જેટલી ફ્લાઇટો રદ કરવી પડી છે અને હજારો વાહનો હાઇવે પર ફસાઇ ગયાં છે.
નહીંતર ટૂરિસ્ટ્સની સંખ્યા હજુ વધુ હોત. ગુલમર્ગનો ફેમસ વિન્ટર રિસોર્ટ અને હોટલ પણ હાઉસફૂલ છે. લોકો સ્કીઇંગ અને અન્ય વિન્ટર સ્પોર્ટ્સ એક્ટિવિટીનો આનંદ લઇ રહ્યા છે. ગોંડોલા કેબલ કાર એ ટૂરિસ્ટ્સ માટે વંડરિંગ હોય છે. જે બરફીલા તોફાન બાદનું જાદુઇ દ્રશ્ય જોવા ઇચ્છે છે.