ઉત્તર ભારતમાં સતત હિમવર્ષા થતી હોઇ ત્યાંથી ફુંકાતા ઉત્તરથી ઉત્તર-પૂર્વ દિશાના શીતાગાર પવનથી અમદાવાદ સહિત સમગ્ર રાજ્યમાં કાતિલ ઠંડીનું મોજું ફરી વળ્યું છે. ગુજરાતમાં નલિયા ઠંડુગાર બન્યુ છે નલિયાનું તાપમાન 8.8 ડિગ્રી સેલ્સિયસ નોંધાયુ છે જ્યારે કંડલા, અમરેલીમાં પણ તાપમાન 10 ડિગ્રીએ પહોંચ્યુ છે. હજુ આવનારા દિવસોમાં તાપમાન રાજ્યભરમાં 8 ડિગ્રીએ પહોંચવાની હવામાન ખાતાએ આગાહી કરી છે.
ઠંડા પવન તેમજ ઠારથી અમદાવાદી ઠુઠવાયા
નલિયામાં ૮.૮ ડિગ્રી સેલ્સિયસ ઠંડી
કંડલા ૧૦.૭ ડિગ્રી તાપમાન સાથે ઠર્યુ
અમદાવાદમાં ગઇ કાલે ૧ર.૯ ડિગ્રી ઠંડી નોંધાતાં સિઝનનો કોલ્ડેસ્ટ દિવસ નોંધાયો હતો. પરંતુ આજે ઠંડા પવન ઉપરાંત ઠારથી અમદાવાદીઓ ઠંડીમાં ઠુંઠવાયા હતા. આજે શહેરનું લઘુતમ તાપમાન ૧ર ડિગ્રી સેલ્સિયસ નોંધાયું હતું કે જે સામાન્ય તાપમાન કરતાં બે ડિગ્રી ઓછું હતું. શહેરમાં હજુ ઠંડીની તીવ્રતામાં વધારો થાય તેવી શક્યતા છે.
લોકોનો વસાણા તરફ ઝુકાવ વધ્યો
આજે ઠંડા પવન સાથે ઠાર વધવાથી ઠંડીની તીવ્રતામાં વધારો થયો હતો. કડકડતી ઠંડીના દિવસો શરૂ થતાં સ્વાસ્થ્યપ્રેમી નાગરિકોએ તલની ચીકી, સિંગના લાડુ, કચરિયું, પોંક વગેરે વસાણાંનો ઉપયોગ શરૂ કર્યો છે. કહેવાય છે કે શિયાળાનું ખાધેલું બારે મહિના શરીરને પોષણ આપે છે. જેના કારણે લોકોનો હવે વસાણાં તરફનો ઝોક વધ્યો છે.
નલિયા ઠંડુગાર
નલિયામાં ૮.૮ ડિગ્રી સેલ્સિયસ ઠંડી નોંધાતાં આ શહેર રાજયનું કોલ્ડેસ્ટ સિટી બન્યું હતું. રાજ્યનાં કુલ ૧ર શહેરોમાં આજે પણ લઘુતમ તાપમાન ૧પ ડિગ્રીથી નીચું રહ્યું હતું. અન્ય પ્રમુખ શહેરોની ઠંડી જોતાં ડીસા ૯.૮, વડોદરા ૧૪.ર, સુરત ૧૭, રાજકોટ ૧૧, ભૂજ ૧૧.૮, સુરેન્દ્રનગર ૧૧.પ, કંડલા ૧૦.૭, અમરેલી ૧૦.ર, વલ્લભ વિદ્યાનગર ૧૩.૪ અને ગાંધીનગરમાં ૧૧.૮ ડિગ્રી સેલ્સિયસ લઘુતમ તાપમાન નોંધાયું હતું.