હવામાન આગાહીઃ રાજ્યમાં ઠંડીનું પ્રમાણ રહેશે યથાવત્ પડી શકે છે કમોસમી વરસાદ

છેલ્લાં અઠવાડિયાથી ગુજરાતમાં ઠંડીનું પ્રમાણ વધ્યું છે અને જો તમે ઠંડી ઓછી થવાની રાહમાં બેઠાં છો તો તમારા માટે નિરાશાજનક સમાચાર આવી રહ્યાં છે. હવામાન વિભાગની આગાહી પ્રમાણમાં આગામી 2 દિવસોમાં કોલ્ડવેવની અસર સર્જાઈ શકે છે. આ ઉપરાંત રાજ્યમાં ઠંડીનું પ્રમાણ યથાવત્ રહેશે તેવી પણ આગાહી કરવામાં આવી છે. 

હવામાન વિભાગની આગાહી ખેડૂતો માટે પણ માઠાં સમાચાર લઈને આવ્યું છે. આગામી દિવસોમાં ગુજરાતમાં છુટો છવાયો કમોસમી વરસાદ પણ પડી શકે છે. હવામાન વિભાગ અનુસાર ગુજરાતમાં સૌરાષ્ટ્ર અને કચ્છમાં વરસાદ પડી શકે છે. રાજસ્થાનમાં સર્જાયેલા વેસ્ટર્ન ઇન્ડસ ડિસ્ટર્બન્સને કારણે ગુજરાતમાં વરસાદ પડવાની સંભાવના છે. આવામાં જો કમોસમી વરસાદ થાય છે તે ખેડૂતો માટે ચિંતા વધી જશે. 

રાજ્યભરમાં ઠંડીનો કહેર

રાજ્યભરમાં ઠંડીનો કહેર યથાવત્ છે. જોકે અમદાવાદ વડોદરા સહિત કેટલાક શહેરોમાં આંશિક રાહત મળી છે. તો આજે પણ ડીસા રાજ્યનું સૌથી ઠંડુ શહેર રહ્યું. ડીસામાં 8 ડિગ્રી તાપમાન નોંધાયું છે. તો નલિયામાં 9 ડિગ્રી તાપમાન નોંધાયું.

આ તરફ અમદાવાદમાં 11 ગાંધીનગરમાં 11 અને ઈડર તેમજ વડોદરામાં 11 ડિગ્રી તાપમાન નોંધાયું છે. જ્યારે ભુજ અને અમરેલીમાં 12 ડિગ્રી તો રાજકોટમાં 13 ડિગ્રી તાપમાન નોંધાયું છે.
 

 

આ તરફ ગુજરાતની બોર્ડર પર આવેલા રાજસ્થાનના પર્યટક સ્થળ માઉન્ટ આબુમાં 3 ડિગ્રી તાપમાન નોંધાયું છે. મહત્વનું છે કે છેલ્લા ચારથી પાંચ દિવસ ઠંડીનો પારો ગગડ્યો હતો અને લોકો ઠંઠવાઈ ગયા હતા. તો કેટલાક લોકો કામ વગર બહાર જવાનું પણ ટાળી રહ્યા હતા. જોકે આજે લોકોને આંશિક રાહત મળી છે.

 

દક્ષિણનો દરિયો તોફાની બનવાની આગાહી

ગઈ કાલે પણ હવામાન વિભાગે આગામી 24 કલાકમાં દક્ષિણ ગુજરાતનો દરિયો તોફાની બનશે તેવી હવામાન વિભાગ દ્વારા આગાહી કરવામાં આવી હતી. સમુદ્રમાં નોર્થ ઇસ્ટના ભારે પવનને લઇને દરિયો તોફાની બનશે. સમુદ્રમાં લો પ્રેસર સિસ્ટમ સર્જાતા 50 kmની ગતિએ પવન ફૂંકાવાની સંભાવના છે. દક્ષિણ ગુજરાતના માછીમારોને દરિયામાં ન જવા અને દરિયો ન ખેડવાની સલાહ આપવામાં આવી છે. દરિયામાં પણ મોજાં ઉછળવાની સંભાવના છે. એટલા માટે દક્ષિણ ગુજરાતના દરિયામાં માછીમારોને દરિયો ન ખેડવા જવા માટેની સૂચના આપવામાં આવી છે. સાથે દરિયાકાંઠાના વિસ્તારને પણ અલર્ટ કરાયા છે.