શહેરના થલતેજ વિસ્તારમાં આવેલ ડેની કોફી બારમાં મોડી રાત્રે બે ભાઇઓએ જૂની અદાવતને ધ્યાનમાં રાખીને એક યુવક પર છરી વડે ખૂની હુમલો કરતા લોિહયાળ ખેલ ખેલાયો હતો. દરવાજો તોડીને બે ભાઇઓ કોફી બારમાં ઘૂસ્યા હતા અને યુવક ઉપર ઉપરાછાપરી છરીઓના ઘા ઝીંકી દીધા હતા.
યુવકને બચાવવા માટે તેનો મિત્ર વચ્ચે પડતા તેને પણ છરીના ઘા વાગ્યા હતા. યુવક અને તેના મિત્ર પર છરી વડે હુમલો કર્યા બાદ બે ભાઇઓ બિનધાસ્ત બધાંની સામે પોતાની કાર લઇને નાસી છૂટ્યા હતા.
થલતેજ વિસ્તારમાં આવેલ ઠાકોરવાસમાં રહેતા ૩૦ વર્ષીય રાજેશ ઠાકોરે સોલા પોલીસ સ્ટેશનમાં બે યુવકો વિરુદ્ધમાં હત્યાની કોશિશની ફરિયાદ કરી છે. રાજેશભાઇના મોટાભાઇનો પુત્ર સાહિલ અને તેના મિત્ર પર ગઇ કાલે થલતેજ અંડરબ્રીજ પાસે આવેલ ડેની કોફી બારમાં બે સગાભાઇઓ જીવલેણ હુમલો કરીને નાસી જતા ચકચાર મચી ગઇ છે.
સાહિલની હાલત નાજુક છે, જેને નજીકની એક ખાનગી હોસ્પિટલના આઇસીયુમાં રાખવામાં આવ્યો છે જ્યારે તેના મિત્ર ધ્રુવિલને સામાન્ય ઇજા પહોંચી છે. ફરિયાદમાં જણાવ્યા અનુસાર ગઇ કાલે રાજેશ તેના પરિવાર સાથે ઘરે ટીવી જોતો હતો તે સમયે સાહિલ લોહીથી લથપથ હાલતમાં આવ્યો હતો, જે જોઇને ઘરના તમામ સભ્ય ચોંકી ઊઠ્યા હતા. લોહીથી લથપથ હાલતમાં આવેલો સાહિલ જમીન પર ઢળી પડ્યો હતો, જેને જોઇને કાકા રાજેશ અને અન્ય લોકો તેને નજીકની ખાનગી હોસ્પિટલમાં લઇ ગયા હતા. સાહિલની હાલત નાજુક હોવાથી તેને આઇસીયુમાં રાખવામાં આવ્યો છે.
સાહિલ ઇજાગ્રસ્ત હાલતમાં ઘરે આવ્યો ત્યારે તેના પરિવારને જણાવ્યું હતું કે તે તેના મિત્રો સાથે મોડી રાત્રે થલતેજ અંડરબ્રીજ પાસે આવેલ ડેની કોફી બારમાં બેઠો હતો ત્યારે સ્વીફ્ટ કાર લઇને બોડકદેવ વિસ્તારમાં રહેતો આશિષ ઠાકોર અને તેનો ભાઇ દિપક ઠાકોર આવ્યા હતા. કોફી બાર બંધ થઇ ગયું હોવાથી બન્ને ભાઇઓએ તેનો દરવાજો ખોલવાનું કહ્યું હતું.
સાહિલ તેમજ કોફીબારમાં કામકરતા અન્ય કર્મચારીઓએ કોફી બારનો દરવાજો ખોલવાની ના પાડી દેતાં બન્ને ભાઇઓ ઉશ્કેરાયા હતા અને બીભત્સ ગાળો બોલીને દરવાજો તોડી નાખ્યો હતો. દરવાજો તોડી નાખ્યા બાદ બન્ને ભાઇઓ કોફી બારની અંદર ઘૂસી ગયા હતા અને સાહિલ ઉપર ઉપરાછાપરી છરીઓના ઘા ઝીંકી દીધા હતા.
આશિષ અને દીપકે સાહિલના પેટના તેમજ છાતીના ભાગે ઉપરાછાપરી છરીઓ હુલાવી દીધી હતી. સાહિલ પર હુમલો થતાં તેના મિત્રો જે કોફી બારમાં હાજર હતા તે તરત જ તેને છોડાવવા માટે દોડી આવ્યા હતા. સાહિલને બચાવવા માટે આવેલ તેના મિત્ર ધ્રુવિલ પટેલને પણ બરડાના ભાગે છરીના ઘા વાગ્યા હતા.
મોડી રાત્રે સર્જાયેલી આ હિંસક ઘટનામાં સાહિલને વધુ છરીના ઘા વાગે નહીં તે માટે તેના મિત્રો તેને ઘરે લઇ આવ્યા હતા અને ત્યારબાદ તેને હોસ્પિટલમાં સારવાર માટે ખસેડવામાં આવ્યો હતો. જીવલેણ હુમલો કરીને બન્ને ભાઇ આરામથી તેમની કારમાં બેસીને રવાના થઇ ગયા હતા.
મોડી રાત્રે ખેલાયેલા ખૂની ખેલમાં સોલા પોલીસ ઘટના સ્થળે પહોંચી ગઇ હતી અને તપાસનો ધમધમાટ શરૂ કરીને આશિષ અને દિપક ઠાકોર વિરુદ્ધ હત્યાની કોશિશનો ગુનો દાખલ કર્યો હતો.
સાહિલ ઉપર હુમલો કયા કારણસર થયો છે તે રહસ્ય હજુ સુધી અંકબધ છે પરંતુ પોલીસને શંકા છે કે બન્ને ભાઇઓએ જૂની અદાવતને ધ્યાનમાં રાખીને તેના પર હુમલો કર્યો છે. આ મામલે સોલા પોલીસ સ્ટેશનના પોલીસ ઇન્સપેક્ટર ડી.એચ.ગઢવીએ જણાવ્યું છે કે ચાર મહિના પહેલા થયેલા ઝઘડાની અદાવત રાખીને સાહિલ ઉપર ઘાતક હુમલો કરવામાં આવ્યો છે.