નશાનું ભેલાણ / યુવાધનને બરબાદ કરવાના ષડયંત્રનો પર્દાફાશ, ગુજરાતના આ મેગા સિટીમાંથી ઝડપાયું 20 કરોડનું કોકેન

• ગુજરાતને ઊડતા ગુજરાત બનાવવાની કોશિશ
• NCBએ 20 કરોડ રૂપિયાનું કોકિન ઝડપ્યું
• અમદાવાદ ક્રાઈમબ્રાંચે MD ડ્રગ્સ સાથે 2 લોકોની કરી ધરપકડ

દિલ્હી અને પંજાબ બાદ ગુજરાતમાંથી પણ કરોડો રૂપિયાનું ડ્રગ્સ ઝડપાઈ રહ્યું છે. NCBએ 20 કરોડના કોકિન સાથે એક આરોપીને ઝડપી લીધો છે. દેશના યુવાધનને નશાના રવાડે ચઢાવીને કેટલાક અસામાજીક તત્વોએ જાણે કે, દેશના ભવિષ્યને બરબાદીના પંથે લઇ જવાનો કારસો રચ્યો હોય તેમ લાગી રહ્યું છે. છેલ્લા કેટલાક સમયથી જે રીતે ગુજરાતમાં ડ્રગ્સ માફિયાઓ બેફામ બન્યા છે. તે જોતાં એમ લાગી રહ્યું છે કે, જો આમ જ ચાલતું રહેશે તો કાગળ પરના વ્યસન મુક્ત ગુજરાત ને ' ઊડતા ગુજરાત ' બનતા વધુ સમય લાગશે નહીં. શહેરમાં વધુ એક વખત ડ્રગ્સનો જથ્થો ઝડપી પાડવામાં પોલીસ સફળ થઈ છે. અમદાવાદ ક્રાઇમબ્રાંચની ટીમે એમડી ડ્રગ્સના જથ્થા સાથે બે લોકોની ધરપકડ કરી છે. જ્યારે NCBએ 20 કરોડના કોકિન સાથે એક આરોપીને ઝડપી લીધો છે.

અમદાવાદ ક્રાઇમ બ્રાન્ચે બાતમીના આધારે બારેજા ગામથી જેતલપુર ગામ તરફના હાઈ-વે પરથી એમડી ડ્રગ્સના જથ્થા સાથે બે આરોપીઓને ઝડપી લીધા છે. ક્રાઇમ બ્રાન્ચએ રૂપિયા 7 લાખની કિંમતના 70 ગ્રામ MD ડ્રગ્સ સાથે બે આરોપીઓ શાહઆલમના મોહમ્મદ સાદિક ઉર્ફે સજ્જુ પઠાણ અને મુંબઈના યાકુબ પલસારાને ઝડપી લીધા છે. આરોપીઓની પૂછપરછમાં સામે આવ્યું કે, મોહમ્મદ સાદિક ઉર્ફે સજ્જુ મુંબઈના મુસ્તાક નામના વ્યક્તિ પાસેથી ડ્રગ્સ મંગાવ્યું હતું. યાકુબ પલસારા નામના આરોપી મુંબઈના મુસ્તાક પાસેથી આ જથ્થો લઈને ડિલિવરી આપવા માટે હોન્ડા સિટી કાર લઇને અમદાવાદ આવ્યો હતો. જોકે બાતમીના આધારે ક્રાઇમ બ્રાંચે ડિલિવરી દરમિયાન બંને આરોપીઓને ઝડપી લીધા છે. 

MD ડ્રગ્સ સાથે ઝડપાયેલા આ બંને આરોપી ઓની પૂછપરછ શરૂ કરી છે. પ્રાથમિક તપાસમા મુંબઈના ડિલર મુસ્તાકનું નામ સામે આવ્યું છે. જેની શોધખોળ કરવા માટે અમદાવાદ ક્રાઈમ બ્રાંચની ટીમ મુંબઈમાં તપાસ કરી રહી છે. સાથે જ આરોપી અત્યાર સુધીમાં કેટલી વખત ડ્રગ્સની હેરાફેરી કરી છે. તે અંગે પણ તપાસ શરુ કરવામા આવી છે. અને મોહમ્મદ સાદિક ઉર્ફે સજ્જુ અમદાવાદમાં ડ્રગ્સ કોને અને કેવી રીતે વેચતો હતો તે અંગે તપાસ શરૂ કરી છે.

મહત્વનું છે કે, તાજેતરમાં જ શહેરમાંથી એમડી ડ્રગ્સ સહીતના 15થી વધુ ગુના નોંધાયા છે. અને સંખ્યાબંધ આરોપી ઝડપાયા છે. તેમ છતાં પેડલરો બેફામ ડ્રગ્સની હેરાફેરી કરી રહ્યા છે. ગુજરાત NCBને 20 કરોડના 4 કિલો કોકિનના જથ્થા સાથે ડેરીસિક પીલ્લઇ નામના આરોપીની ધરપકડ કરી છે. ત્યારે હવે ગુજરાતમાં ડ્રગ્સનું નેટવર્ક ફેલાઈ રહ્યું છે. ક્રાઇમ બ્રાન્ચે આ નેટવર્ક સાથે સંડોવાયેલા આરોપીઓની તપાસ શરૂ કરી છે.