આકાશને આંબી રહેલી પેટ્રોલ ડીઝલની કિંમતોની વચ્ચે સીએનજીના રેટમાં વધારો નોંધાયો છે. દિલ્હીમાં સીએનજીની કિંમત 90 પૈસા પ્રતિ કિલોના વધારો કરવામાં આવ્યો છે. આ વધારાની સાથે દિલ્હી એનસીઆરના લોકોને મોટો ઝટકો લાગ્યો છે. આ વધારા બાદ દિલ્હીમાં સીએનજીના ભાવ 43.40 પ્રતિ કિલોથી વધીને 44.30 રુપિયા પ્રતિ કિલો પર પહોંચી ગયો છે.
એટલું જ નહીં પાઈપથી પહોંચનારા ઘરેલુ રસોઈ ગેસના રેટ વધારી દેવાયા છે. આજે પીએનજીની કિંમત વધીને 29.66 રુપિયા પ્રતિ ઘન મીટર પહોંચી ગયું છે. જ્યારે સીએનજી અને પીએનજીની નવી કિંમતો બુધવારે મોડી રાતે એટલે કે 12 વાગે લાગૂ થઈ છે.
નોઈડામાં મોંઘો થયો સીએનજી
દિલ્હીની સાથે સાથે નોઈડા, ગ્રેટર નોઈડા અને ગાઝિયાબાદમાં પણ સીએનજીના રેટમાં વધારો થયો છે. નોઈડા, ગ્રેટર નોઈડા અને ગાઝિયાબાદમાં સીએનજીનો સપ્લાય કરનારી કંપનીએ 90 પૈસા પ્રતિ લિટર કિલોનો વધારો કર્યો છે. હવે આ વિસ્તારોમાં સીએનજી 49.08 રુપિયા પ્રતિ કિલો વધારીને 49.98 રુપિયા પ્રતિ કિલો પહોંચી ગઈ છે. ત્યારે પીએનજી 29.61 રુપિયા પ્રતિ ઘન મીટર થઈ ગઈ છે.
પેટ્રોલ ડીઝલ પણ મોંઘુ
ગુરુવારે પેટ્રોલ અને ડીઝલની કિંમતોમાં તેજી જોવા મળી છે. તેલ કંપનીઓએ આજે પેટ્રોલના ભાવમાં 35 પૈસા અને ડીઝલમાં 9 પૈસા વધારો કર્યો છે. આ સાથે દિલ્હીમાં પેટ્રોલ 100.56 રુપિયા પ્રતિ લીટર અને ડીઝલ 89.62 રુપિયા લીટર પર વેચાઈ રહ્યું છે.