કોરોનાની સ્થિતિને લઈને મુખ્યમંત્રી વિજય રૂપાણી અને નાયબ મુખ્યમંત્રી નીતિન પટેલ સુરતની મુલાકાતે છે. સુરતમાં કોરોના કેસમાં સતત વધારો થતા અધિકારીઓ સાથે રિવ્યુ બેઠક યોજી હતી. કલેક્ટર ઓફિસ ખાતે કલેક્ટર, મનપા કમિશનર, નોડલ ઓફિસર, સાંસદો, ધારાસભ્યો અને આરોગ્ય મંત્રીઓ સાથે બેઠક યોજાઇ હતી. સીએમએ કહ્યું કે, સરકારે 5 મહિનાથી કોરોના પર ફોકસ કર્યુ છે. સરકારે પ્રથમ પ્રાયોરિટી કોરોનાને આપી છે અને સ્ટ્રેટેજીથી કામ ચાલી રહ્યુ છે.
CM રૂપાણી અને DYCM નીતિન પટેલે યોજી બેઠક
સુરતમાં અધિકારીઓ સાથે યોજી રીવ્યૂ બેઠક
CM, DYCM સુરત કલેક્ટર ઓફિસ પહોચ્યા
સુરત શહેરમાં કોરોનાને નાથવાની બેઠક બાદ મુખ્યમંત્રી રૂપાણીએ કોરોના વોરિયર્સ અને પ્લાઝ્મા ડોનર્સ સન્માન કર્યુ હતું. આજે મુખ્યમંત્રી વિજય રૂપાણીનો જન્મદિવસ હોવાથી હોસ્પિટલના સ્ટાફ દ્વારા તેમને જન્મદિવસની શુભકામના પાઠવવામાં આવી હતી. તો આવતીકાલે રક્ષાબંધન હોવાથી આજે મુખ્યમંત્રી, નાયબ મુખ્યમંત્રી, આરોગ્ય મંત્રી અને ભાજપ પ્રદેશ પ્રમુખના હાથે રાખડી નર્સ દ્વારા બાંધવામાં આવી હતી. ત્યારબાદ મુખ્યમંત્રી વિજય રૂપાણીએ પત્રકાર પરિષદ યોજી હતી.
સુરતમાં અત્યારે પર મિલિયન 1200 ટેસ્ટ થાય છે
મુખ્યમંત્રી વિજય રૂપાણીએ કહ્યું હતું કે, સુરતમાં કોરોનાના ટેસ્ટ 10 ગણા વધારી દીધા છે. અગાઉ લેબોરેટરીની કેપેસિટી મર્યાદિત હોવાને લઇને 5-7 હજાર ટેસ્ટ કરતા હતા પરંતુ હવે 26 હજાર જેટલા ટેસ્ટ કરી રહ્યા છીએ. સુરતમાં અત્યારે પર મિલિયન 1200 ટેસ્ટ થાય છે.
સુરતમાં અત્યારે 70% રિકવરી રેટ થયો છે
સીએમએ કહ્યું કે, સુરતમાં રિકવરી રેટ 60 ટકા હતો અને હાલ 70 ટકા પર પહોંચ્યો છે. જ્યારે રાજ્યમાં 73 ટકા પર પહોંચ્યો છે. જ્યારે પોઝિટિવ કેસ વધારના દરનો ગ્રોથ રેટ 4 ટકાથી ઘટીને 2 ટકા થયો છે.
સુરતમાં 7030 બેડની વ્યવસ્થા
સીએમએ કહ્યું કે, સુરતમાં 121 ધનવંતરી રથ કાર્યરત થયા છે. જેમાં 35-40 હજારની ઓપીડી કરી રહ્યા છીએ. તો બેડની કેપેસિટી 4856 બેડ હતી તે વધારીને 7030 બેડ કરવામાં આવી છે. હજુ પણ આવરનારા દિવસોમાં તેમાં વધારો કરીશું. હાલ સુરતમાં ગમે એટલું કોરોનાનું સંક્રમણ વધે તે માટે આપણે બેડની વ્યવસ્થા કરી ચૂક્યા છીએ.
વધુમાં તેમણે કહ્યું હતું કે, મેં અગાઉ સુરતમાં વેન્ટિલેટર મોકલીશું તેમ કહ્યું હતું ત્યારબાદ રાજ્ય સરકારે 600 વેન્ટિલેટર મોકલ્યા છે. 128 વેન્ટિલેટર ખાનગી હોસ્પિટલોને આપ્યા છે. સુરતમાં જરૂરિયાત મુજબ વેન્ટિલેટર પુરા પાડવામાં આવ્યા છે.
ઈન્જેક્શન માટે આજે એક પણ પેન્ટિંગ કેસ નથી
સુરતમાં ટોસિલિઝુમેબ ઈન્જેક્શન માટેનો જથ્થો ઉપલબ્ધ છે. ઇન્જેક્શન જેને જોતા હોય તેની અરજી જાય છે. આજે એક પણ કેસ પેન્ડિંગ નથી. ઇન્જેક્શન હજુ પણ સ્ટોકમાં પડ્યા છે. હજુ પણ સરકારે તેની વ્યવસ્થા કરી છે. જેટલા ઇન્જેક્શનની જ્યારે જ્યારે જરૂરિયાત પડશે ત્યારે પુરા પાડીશું.
ગોતી ગોતીને ટેસ્ટ કરીશું
આજે અધિકારી સાથે બેઠક કરી જેમાં આખો રિવ્યૂ, આજની સ્થિતિ, હજુ પણ શું કરવાનું છે તેની ચર્ચા થઇ હતી. એકંદરે પરિસ્થિતિ ખુબ સારી રીતે અધિકારીઓ કામ કરી રહ્યા છે. જે સંતોષજનક છે. હવે મોટાપાયે ટેસ્ટ કરવામાં આવી રહ્યા છે. જેમાં એકેય ખુણો બાકી નહીં રહે, ગોતી ગોતીને ટેસ્ટ કરીશું જેથી પરિસ્થિત પર કંટ્રોલ આવે.
પ્લાઝમામાં સુરતે ખુબ સરસ કામ કર્યું
સીએમએ કહ્યું કે, ઓક્સિજન ઘટે એટલે તરત સારવાર થઇ જાય તે માટે વ્યવસ્થા કરાઇ છે. આપણે વ્યવસ્થિત પગલા ભર્યા એમાં ડેથ રેડ પણ ઘટ્યો છે. પ્લાઝમામાં સુરતે ખુબ સરસ કામ કર્યું છે. 500થી વધુ દર્દીઓને આ થેરાપીથી આપણે મદદ કરી શક્યા છીએ જેથી મૃત્યુદર પણ ઘટ્યો છે.
કમ્યુનિટી આઇસોલેશન સેન્ટરની પહેલા પ્રશંસનીય
સીએમએ કહ્યું કે, સુરતમાં અલગ અલગ સમાજે કમ્યુનિટી આઇસોલેશન સેન્ટરની જે પ્રકારે સુંદર વ્યવસ્થા કરી છે તે પ્રસંશનીય છે. સાથે ઓક્સિજનની વ્યવસ્થા પણ કરી છે. તો બીજી તરફ ડાયમંડ અને ટેક્સટાઇલમાં પણ દૂર દૂર બેસાવની વ્યવસ્થા અપનાવવામાં આવી રહી છે.
આજે ગુજરાત 12માં નંબરે
સીએમએ કહ્યું કે, આખા ભારતમાં મહારાષ્ટ્ર પછી કહેવાતું કે ગુજરાતમાં સૌથી વધુ સંક્રમણ છે પરંતુ આજે આપણે 12માં નંબરે છીએ. સારવાર, ડિસ્ચાર્જ, ટેસ્ટિંગ અને ડેથ રેટમાં રાજ્યની સારી કામગીરી છે. ગુજરાત કોરોનાને લઇને સારૂ કામ કરી રહ્યું છે જેને સુપ્રીમ કોર્ટે પણ વખાણી છે. સુપ્રીમ કોર્ટે ગુજરાત મોડેલ અપનાવવા કહ્યું છે.