મહામારી / CM રૂપાણીએ પોતાની અને CSની માહિતીમાં વિરોધભાસ અંગે કહ્યું, આ તો ત્રીજી લહેરની વાત હતી

• મુખ્યમંત્રી અને CSની માહિતીમાં વિરોધભાસ
• ઓક્સિજન સપ્લાયને લઇ માહિતીમાં વિરોધાભાસ
• CM રૂપાણીનું મીડિયા સમક્ષ નિવેદન 

મુખ્યમંત્રી અને CSની માહિતીમાં વિરોધભાસ મામલે સીએમ રૂપાણીએ જવાબ આપ્યો છે. મહત્વનું છે કે, સુપ્રીમ કોર્ટમાં ચીફ સેક્રેટરીનું એફિડેવિટ અને સીએમ રૂપાણીના નિવેદનમાં કેન્દ્ર તરફથી રાજ્યને મળતી સહાય મુદ્દે વિરોધાભાસ હતો. જેને લઇ સીએમ રૂપાણીએ કહ્યું કે, CSએ આગળનું વિચારીને માંગણી કરી હશે. ત્રીજી લહેર આવશે તો શું કરીશું એ વિચારીને માગ કરી છે. 1300 ટન ઓક્સિજનની માગ કરવામાં આવી છે. કેન્દ્ર સરકારને ગુજરાતની ચિંતા છે. અને હાલમાં રોજ 1 હજાર ટન ઓક્સિજન હોસ્પિટલમાં મળે છે.

શું છે સમગ્ર મામલો

કોરોનાકાળમાં કેન્દ્ર તરફથી મળતી સુવિધા મુદ્દે ગઈકાલે મુખ્યમંત્રી વિજય રૂપાણીએ મહત્વનું નિવેદન આપ્યું હતું. જેમાં CM રૂપાણીએ કહ્યું કે, PM મોદી અને કેન્દ્રીય ગૃહમંત્રી અમિત શાહના નેતૃત્વમાં કેન્દ્ર સરકારે ગુજરાતને મદદ કરી છે અને સશક્ત પીઠબળ પૂરું પાડ્યું છે. કોરોનાના સંક્રમણની શરૂઆતના પહેલા તબક્કામાં કેન્દ્ર સરકારે ગુજરાતને ટ્રીટમેન્ટ પ્રોટોકોલ માટે નિષ્ણાત તબીબો મોકલીને અત્યંત આવશ્યક માર્ગદર્શન આપ્યું હતું.

અને કોરોનાના આ બીજા અતિ આક્રમક વેવ સામે લડવા વેન્ટિલેટર જેવા સાધનો મોટી માત્રામાં આપ્યા છે. એટલું જ નહીં ગુજરાતમાં કોરોનાના દર્દીઓના જીવ બચાવી શકાય એ રીતે ક્યારેય ઓક્સિજન, આવશ્યક ઇન્જેક્શન કે દવાઓની ક્યારેય અછત વર્તાવા દીધી નથી. આ માટે ગુજરાત હંમેશા PM મોદી અને કેન્દ્રીય ગૃહમંત્રી અમિત શાહના આભારી રહેશે.

કેન્દ્રએ ગુજરાતને બધું આપ્યું તો ચીફ સેક્રેટરીએ સુપ્રીમમાં કેમ આવું સોગંદનામું રજૂ કર્યું હતું?

ગુજરાતમાં કોરોનાની બીજી લહેરમાં કેન્દ્રની મદદ મુદ્દે મુખ્યમંત્રીએ ગઈકાલે નિવેદન આપ્યું હતું. પરંતુ મુખ્યમંત્રીના નિવેદનના એક દિવસ પહેલા ગુજરાતના ચીફ સેક્રેટરી અનિલ મૂકીમે સુપ્રીમ કોર્ટમાં એક સોગંદનામું રજૂ કર્યું હતું. જેમાં ગુજરાત તરફથી માગવામાં આવેલી મદદ પૂરતી ન મળતી હોવાની વાત કરવામાં આવી હતી. સોગંદનામામાં કેન્દ્ર તરફથી ગુજરાતને પૂરતો ઓક્સિજનનો જથ્થો ન મળતો હોવાની પણ વાત કરી હતી. જ્યારે આજે કેન્દ્ર દ્વારા તમામ સહાય મળી હોવાની વાત એક વિરોધાભાસ સ્થિતિ દેખાડતી હતી.