રાજ્યમાં ઉનાળાની શરૂઆત થતાંની સાથે જ રાજ્યના ડેમ તળિયા ઝાટક થઈ ગયા છે. તો સૌરાષ્ટ્ર અને કચ્છમાં કપરી સ્થિતિ સર્જાઈ છે. ત્યારે આ મામલે મુખ્યમંત્રી વિજય રૂપાણીની સમીક્ષા બેઠક મળી રહી છે. જેમાં પાણીની વિવિધ યોજનાઓને લઈને ચર્ચા વિચારણા કરવામાં આવશે. સાથે જ અછતગ્રસ્ત વિસ્તારોમાં પાણી પહોંચાડવાની વ્યવસ્થા અંગે પણ ચર્ચા કરવામાં આવી શકે છે.
હાલ ગુજરાતમાં પાણીની સ્થિતિ અતિ ગંભીર બની રહી છે. ત્યારે આંકડાઓ પર નજર કરીએ તો નર્મદા ડેમને બાદ કરતાં મોટા ભાગના ડેમ તળિયા ઝાટક બન્યા છે. સૌરાષ્ટ્ર અને આદિવાસી પટ્ટીમાં પાણીની સ્થિતિ વધુ વિકટ બની છે. ચરોત્તરને બાદ કરતા ગુજરાતમાં પણ પીવાના પાણીની સ્થિતિ ગંભીર બની છે.
સૌરાષ્ટ્રના ડેમમાં માત્ર 10 ટકા જ પાણી બચ્યું છે. જ્યારે કચ્છના ડેમમાં માત્ર 13 ટકા જ પાણી બચ્યું છે. આ તરફ ઉત્તર ગુજરાતમાં ડેમમાં 16 ટકા પાણીનો જથ્થો બચ્યો છે. તો દક્ષિણ ગુજરાતના ડેમમાં માત્ર 22 ટકા જ પાણી રહ્યું છે. જ્યારે નર્મદા ડેમમાં કુલ 50 ટકા પાણીનો જથ્થો બચ્યો છે. આ તરફ મધ્ય ગુજરાતના ચરોતરમાં પાણીની સ્થિતિ થોડી સારી છે. સૌરાષ્ટ્રમાં પોરબંદર, જામનગર, બોટાદ, દ્વારકાના તમામ ડેમ તળિયા ઝાટક થઈ ગયા છે.તો અમદેલીના ડેમમાં 6 ટકા અને ભાવનગરમાં 7 ટકા જેટલું પાણી બચ્યું છે. તો જૂનાગઢમાં 8 ટકા, રાજકોટમાં 9 ટકા જ્યારે ગીર-સોમનાથના ડેમમાં 20 ટકા જેટલું પાણી છે.
આ તરફ નવસારી, તાપી અને વલસાડના ડેમમાં 12 ટકા પાણી છે. તો છોટાઉદેપુરમાં 6 ટકા, દાહોદમાં 17 ટકા, બનાસકાંઠામાં માત્ર 4 ટકા જ પાણીનો જથ્થો રહ્યો છે. ઉનાળો એક તરફ આગળ વધી રહ્યો છે. તો બીજી તરફ પાણીની સ્થિતિ ઘણી વિકટ બની રહી છે. ત્યારે સૌરાષ્ટ્ર અને કચ્છમાં પાણી માટે લોકો વલખાં મારી રહ્યાં છે. કુવાના તળિયા પણ ઉંડા જતાં લોકોએ કિલોમીટરો સુધી ચાલવું પડે છે.
દક્ષિણ ગુજરાતની વાત કરીએ તો તાપી ડેમમાં 20 ટકા પાણી વધ્યું છે. તો આ તરફ કડાણા અને પાનમ ડેમમાં 53 ટકા પાણી બચ્યું છે. તો ઉત્તર ગુજરાતમાં દાંતિવાડા ડેમમાં 7 ટકા પાણી, ભાદરમાં 7 ટકા અને સીપુ ડેમમાં 9 ટકા પાણી રહ્યું છે. જામનગરનો ઉંડ ડેમ તળિયા ઝાટક થયો છે. તો મચ્છુ ડેમમાં 16 ટકા અને સુખીમાં 13 ટકા તેમજ શેત્રુંજુ ડેમમાં માત્ર 13 ટકા જ પાણીનો જથ્થો રહ્યો છે.