ગુજરાતના 20 જિલ્લા લમ્પી વાયરસથી પ્રભાવિત, સીએમ ભૂપેન્દ્ર પટેલ આજે પહોંચ્યા કચ્છ, કૃષિ- પશુપાલન મંત્રી રાઘવજી પટેલ પણ કચ્છની મુલાકાતે
મુખ્યમંત્રી ભુપેન્દ્ર પટેલ આજે કચ્છમાં
લમ્પી વાયરસને પગલે આઇસોલેશન સેન્ટરનું નિરીક્ષણ
મંત્રી રાઘવજી પટેલ પણ સીએમ સાથે કચ્છની મુલાકાતે
ગુજરાતમાં પશુઓમાં જોવા મળતો લમ્પી વાયરસ કહેર વર્તાવી રહ્યો છે. રાજ્યના 20 જિલ્લામાં આ વાયરસનો ફેલાવો થયો છે. આ ગંભીર સ્થિતિને પગલે રાજ્ય સરકાર પણ ચિંતિત છે. પશુઓમાં લક્ષણ જોવા મળતા જ રસીકરણ કરવામાં આવી રહ્યું છે ત્યારે સીએમ ભૂપેન્દ્ર પટેલ આજે કચ્છની મુલાકાતે પહોંચ્યા હતા.તેમની સાથે કૃષિ અને પશુપાલન મંત્રીશ્રી રાઘવજી પટેલ પણ જોડાયા હતા.
ભૂજ આઇસોલેશન સેન્ટરની લીધી મુલાકાત
કચ્છ જિલ્લામાં 37 હજાર 840 પશુઓ લમ્પી સ્કીન ડિસીઝથી અસરગ્રસ્ત થયેલા છે.આવા પશુઓને ક્વૉરન્ટાઇન કરીને આઇસોલેશનમાં રાખવા માટે જિલ્લાના 10 તાલુકામાં 26 જેટલા આઇસોલેશન સેન્ટર શરૂ કરવામાં આવ્યા છે. ત્યારે સીએમ ભૂપેન્દ્ર પટેલે ભૂજ ખાતેના આઇસોલેશન સેન્ટરની મુલાકાત લીધી હતી. સેન્ટરમાં પશુધનને અપાઈ રહેલી સારવાર-સંભાળની જાણકારી મેળવી હતી.
કચ્છ જિલ્લાના ભુજ ખાતે લમ્પી સ્કીન ડીસીઝથી અસરગ્રસ્ત પશુધન માટેના આઈસોલેશન સેન્ટર તથા પશુ રસીકરણ કેન્દ્રની મુલાકાત લઈ પશુઓની દેખરેખ અને માવજતની કામગીરીનું જાતનિરીક્ષણ કર્યું. પશુઓની સારવાર કરી રહેલા પશુ ચિકિત્સક અને અન્ય અધિકારીઓ પાસેથી જરૂરી વિગતો મેળવી. pic.twitter.com/haPUkThLEv
ઉલ્લેખનીય છે કે કચ્છ જિલ્લામાં લમ્પી સ્કીન ડિસીઝને વધુ ફેલાતો અટકાવવા અત્યાર સુધી સવા બે લાખથી વધુ પશુધનનું રસીકરણ પશુપાલન વિભાગ અને જિલ્લા તંત્ર દ્વારા હાથ ધરવામાં આવ્યું છે. રાજ્યના અસરગ્રસ્ત જિલ્લાઓમાં સુધીમાં 10 લાખ 6 હજારથી વધુ નિરોગી પશુઓનું રસીકરણ કરવામાં આવ્યું છે. જિલ્લા કક્ષાએ આ હેતુસર 6 લાખથી વધુ વેક્સિન ડોઝ પણ ઉપલબ્ધ છે.
રસીકરણ અભિયાન સઘન બનાવવાનો નિર્ણય
પશુધનમાં આ લમ્પી સ્કીન ડિસીઝની સારવાર અને રસીકરણ યુદ્ધના ધોરણે પૂર્ણ કરવા 222 પશુચિકિત્સા અધિકારીઓ, 713 પશુધન નિરીક્ષકો સઘન સર્વે, સારવાર અને રસીકરણની કામગીરીમાં જોડાયા છે. એટલું જ નહીં, રાજ્યની વેટરનરી કોલેજના સ્નાતક, અનુસ્નાતક અને અધ્યાપકો મળીને 107 સભ્યો કચ્છ ઉપરાંત જામનગર, દેવભૂમિ-દ્વારકા અને બનાસકાંઠામાં કાર્યરત થયા છે. કચ્છ જિલ્લા માટે કામધેનુ યુનિવર્સિટીના વધુ 175 લોકોને મોકલી રસીકરણ સઘન બનાવવાનો નિર્ણય કરવામાં આવ્યો છે.
વેક્સિનેશન સેન્ટરની મુલાકાત લઇને યોજી બેઠક
સીએમ ભૂપેન્દ્ર પટેલે વેક્સિનેશન સેન્ટરની પણ મુલાકાત લીધી હતી, વેક્સિનનો સ્ટોક તથા જાળવણીને લઇને માહિતી મેળવી હતી. ત્યારબાદ જિલ્લા કલેકેટર કચેરીમાં જિલ્લાના અધિકારીઓ સાથે બેઠક પણ યોજી હતી. બેઠકમાં લમ્પી સ્કિન ડીસીઝ વધુ ન ફેલાય તે માટે રોગ ફેલાવતા કીટકોના નિયંત્રણ માટેના પગલાં અને ઉપાયો વધુ સઘન બનાવવા સૂચન કર્યું હતું. આ ઉપરાંત મૃત પશુઓનો વૈજ્ઞાનિક ઢબે નિકાલ થાય તેની તકેદારી રાખવા જિલ્લાના અધિકારીઓને તાકીદ કરી હતી
કચ્છ જિલ્લાતંત્રના અધિકારીઓ સાથે બેઠક કરીને જિલ્લામાં પશુઓના લમ્પી સ્કીન રોગના નિયંત્રણ માટે લેવાઈ રહેલા પગલાઓની સમીક્ષા કરી. કચ્છમાં પશુઓને સારવાર ઉપરાંત પશુના સઘન રસીકરણનો એક્શન પ્લાન તંત્રએ તૈયાર કર્યો છે. જિલ્લામાં રાજ્ય સરકાર તરફથી વેકસીનનો પૂરતો જથ્થો ફાળવવામાં આવ્યો છે. pic.twitter.com/xiTqAjUITj
આ બેઠકમાં જણાવવામાં આવ્યું હતું કે જિલ્લામાં 58 જેટલી પશુ ચિકિત્સા એમ્બ્યુલન્સ સેવારત છે. જિલ્લાના 964 ગામોમાંથી 585 ગામોના પશુઓ આ રોગથી અસરગ્રસ્ત છે. 38 હજાર પશુઓ આ રોગનો ભોગ બન્યા છે જે પૈકી 3467 કેસ એક્ટીવ કેસ છે. 50 હજાર પશુઓને સારવાર આપવામાં આવેલી છે એટલું જ નહીં 2.26 લાખ પશુઓનું રસીકરણ કરવામાં આવ્યું છે. કચ્છ જિલ્લામાં રોજ 20 હજાર પશુઓનું રસીકરણ કરીને બાકી રહેલા 3.30 લાખ પશુઓનું સઘન રસીકરણ કરવાનો એક્શન પ્લાન જિલ્લા તંત્ર દ્વારા તૈયાર કરવામાં આવ્યો છે.