વડોદરામાં મુખ્યમંત્રી ભૂપેન્દ્ર પટેલ અનેક સાર્વજનિક પંડાલમાં શ્રીજીના દર્શન અર્થે પહોંચ્યા હતા. આ તકે સીએમનું સ્વાગત કરાયું હતું.
CM ભૂપેન્દ્ર પટેલ વડોદરાની મુલાકાતે
શ્રીજીના દર્શન થકી લોકો સુધી સીધા પહોંચવાનો પ્રયાસ
CM ભૂપેન્દ્ર પટેલ ગણેશ પંડાલોની લીધી મુલાકાત
વડોદરા સહિત દેશભરમાં ગણેશ મહોત્સવનો માહોલ બરાબરનો જામ્યો છે. ભક્તો શ્રીજીની ભક્તિમાં લીન બન્યા છે. ત્યારે વડોદરામાં અનેક સાર્વજનિક પંડાલમાં ગણેશ ચતુર્થીના દિવસે બાપ્પા બિરાજમાન થયા છે.તેવામાં રાજ્યના મુખ્યમંત્રી ભૂપેન્દ્ર પટેલે વડોદરાની મુલાકાત લીધી હતી. આ દરમિયાન શહેરના અનેક સાર્વજનિક પંડાલમાં પહોંચી મુખ્યમંત્રીએ શ્રીજીના દર્શન કરી ધન્યતા અનુભવી હતી.
વડોદરામાં મુખ્યમંત્રીએ 10 જેટલા સ્થળોએ ગણેશજીના દર્શનનો લાભ લીધો
વડોદરામાં લગભગ 500 થી વધુ સ્થળોએ અલગ અલગ સાર્વજનિક પંડાલ લાગ્યા છે. સ્થળે શ્રીજીનું સ્થાપન કરી દુંદાળા દેવની પૂજા અર્ચના કરવામાં આવી રહી છે. ત્યારે રાજ્યના મુખ્યમંત્રી ભૂપેન્દ્ર પટેલ વડોદરામાં દુંદાળા દેવની આરતી ઉતારી હતી. આ ઉપરાંત શહેરના 10 જેટલા સ્થળોએ ગરવા ગણેશજીના દર્શનનો લાભ લીધો હતો. આ દરમિયાન મુખ્યમંત્રીનો કાફલો અચાનક આવી પહોંચતા ભાવિકો પણ ખુશ થયા હતા . ઠેર ઠેર પંડાલમાં સીએમને કુમકુમ તિલક કરી સ્વાગત કરવામાં આવ્યું હતું. આમ ખુદ રાજ્યના સીએમ ગણેશ મોત્સવમાં સહભાગી થતા મંડળોમાં પણ ઉત્સાહ જોવા મળ્યો હતો.
વિવિધ સ્થળોએ પંડાલની મુલાકાત લીધી
એક બાજુ ગુજરાત વિધાનસભાની ચૂંટણી માથે છે ત્યારે શ્રીજીના દર્શન થકી લોકો સુધી સીધા પહોંચવાનો પ્રયાસ કરાયો હતો. શહેરના અલગ-અલગ 10 સ્થળોએ પંડાલની મુલાકાત દરમિયાન મુખ્યમંત્રી ભૂપેન્દ્ર પટેલ સાથે સાંસદ રંજન ભટ્ટ, મંત્રી પ્રદીપ પરમાર, મનીષા વકીલ સહીત મોટી સંખ્યામાં સ્થાનિક આગેવાનો અને કાર્યકરો જોડાયા હતા. મહત્વનું છે કે તાજેતરમાં જ મુખ્યમંત્રી ભૂપેન્દ્ર પટેલે અમદાવાદમાં પણ ભગવાન ગણેશજીના દર્શનનો લ્હાવો લીધો હતો.