અંબાજીની મુલાકાત અંતર્ગત કોટેશ્વર ખાતે સ્થાનિક લોકો સાથે સીએમ ભૂપેન્દ્ર પટેલે ચા નાસ્તો કર્યો હતો
સીએમ ભૂપેન્દ્ર પટેલની અંબાજી મુલાકાત
કોટેશ્વર ખાતે સ્થાનિક લોકો સાથે મુખ્યમંત્રીએ ચા નાસ્તો કર્યો
શિક્ષણ તેમજ અન્ય તકલીફો પર લોકોની રાય જાણી
મુખ્યમંત્રી ભૂપેન્દ્ર પટેલ ના સહજ સરળ અને નિખાલસ વ્યક્તિત્વનો અંબાજી ધામ નજીકના કોટેશ્વર ના ગ્રામજનો અને બાળકો ને આજે અદકેરો અનુભવ થયો.
ચા પાપડીની લિજ્જત માણી
મુખ્યમંત્રી કોટેશ્વર મહાદેવ માં પૂજન અર્ચન કરી ગબ્બર ખાતે લાઈટ એન્ડ સાઉન્ડ શો સહિત ના વિકાસ કામો ના લોકાર્પણ માટે જઈ રહ્યા હતા. માર્ગ માં આવતી એક દુકાને તેઓ સામાન્ય નાગરિક ની જેમ જ અચાનક ઊભા રહી ગયા અને એક વડીલ સાથે પોતીકા ભાવથી વાતચીત કરી તેમના ખબર અંતર પૂછ્યા અને અહીં જે બાળકો હતા તેમની સાથે પણ વડીલ ભાવે સંવાદ કરી તેમના શિક્ષણ, શાળા ની સુવિધા જેવી બાબતે પ્રાથમિક માહિતી મેળવી હતી. ભૂપેન્દ્ર પટેલે ગ્રામજનો સાથે ગ્રામ જન બની ચા ની ચૂસકી લીધી અને નાસ્તો પણ કર્યો હતો. મંત્રી અરવિંદ રૈયાણી મુખ્યસચિવ પંકજ કુમાર પણ તેમની સાથે જોડાયા હતા.
અંબાજીની મુલાકાત અંતર્ગત કોટેશ્વર ખાતે સ્થાનિક પ્રજાજનોને મળવાનું સદ્ભાગ્ય પ્રાપ્ત થયું હતું. pic.twitter.com/UZge8NfGJO
અંબાજીમાં વિકાસ કાર્યોનો શુભારંભ
મુખ્યમંત્રીએ આદ્યશક્તિના દર્શન બાદ અંબાજી મંદિર સંકુલમાં એગ્રો મોલનો શુભારંભ કરાવ્યો હતો. આ ઉપરાંત, પબ્લિક એડ્રેસ સિસ્ટમનું લોકાર્પણ તેમજ ગુજરાત યાત્રાધામ વિકાસ બોર્ડની મોબાઇલ એપનું લોન્ચિંગ પણ કર્યું હતું.મુખ્યમંત્રીએ વિચરતી વિમુક્ત જાતિના કુલ 41 મહિલા લાભાર્થીઓને 80 ચો.મી. ના પ્લોટની સનદનું વિતરણ કર્યું હતું. અંબાજી ગામની આસપાસ વિચરતી વિમુક્ત જાતિના પરિવારો માટે 'શ્રી શક્તિ વસાહત' નું નિર્માણ થઈ રહ્યું છે જેમાં પાકા રહેણાકની સુવિધા સરકારના સહયોગથી ઉપલબ્ધ થશે.
CM ભૂપેન્દ્ર પટેલની ઓળખ કોમનમેન તરીકે...
વડોદરાની મુલાકાત દરમિયાન CM ભૂપેન્દ્ર પટેલ નાયક ફિલ્મના હીરોની જેમ જ ઓચિતા જ એકતાનગર આવી પહોંચ્યા હતા. એકતાનગરના ઝૂંપડપટ્ટી વાળા વિસ્તારમાં જઈને લોકો સાથે સામે ચાલીને સંવાદ કર્યો હતો જેનો વીડિયો ખૂબ જ લોકોએ પંસદ કર્યો હતો. નોંધનીય છે કે આ પહેલા પણ મુખ્યમંત્રી ભૂપેન્દ્ર પટેલ ચર્ચામાં આવ્યા હતા જ્યારે બગોદરા હાઇવે પોતાનો કાફલો રોકાવીને એક ઢાબા પર ખાટલા પર ચા પીવા બેઠા હતા. શીલજ ખાતે ભાજપના જૂના કાર્યકરો સાથે બાંકડે બેસીને ચર્ચા કરતાં મુખ્યમંત્રી ભૂપેન્દ્ર પટેલની તસવીર પણ વાયરલ થઈ હતી.