આજે ગાંધીનગરના મહાત્મા મંદિર ખાતે મુખ્યમંત્રી ભૂપેન્દ્ર પટેલના હસ્તે રાજ્યની મહાનગરપાલિકાઓ, નગરપાલિકાઓ અને શહેરી વિકાસ સત્તામંડળોને વિકાસ કામો માટે રૂ. 1184 કરોડની ગ્રાન્ટ ફાળવી છે.
ચીફ ઓફિસર પર બદલીને લઇને મુખ્યમંત્રીએ કર્યો કટાક્ષ
બદલી કરાવશો તો એવું નહિ બને કે ત્યાં પ્રમુખ પદ ખાલી હશેઃ સીએમ
પાણીમાં રહેવું હોય તો મગરમચ્છ જોડે દુશ્મની ન કરવી જોઈએઃ સીએમ
ગાંધીનગર ખાતે આ કાર્યક્રમ દરમિયાન મુખ્યમંત્રી ભૂપેન્દ્ર પટેલે ચીફ ઓફિસર અને પ્રમુખ પર બદલીઓને લઇને કટાક્ષ કર્યો હતો. મુખ્યમંત્રી ભૂપેન્દ્ર પટેલે કહ્યું કે, કોઈ ચીફ ઓફિસરને એવું હોય કે બદલી કરાવી નાખું, પણ બીજી નગરપાલિકામાં એવું નહીં બને કે ત્યાં પ્રમુખ પદ ખાલી હશે. પાણીમાં રહેવું હોય તો મગરમચ્છ સાથે દુશ્મની ન કરવી જોઈએ. ચીફ ઓફિસરે પ્રમુખ સાથે રહીને જ કામ કરવું પડશે. પ્રમુખે પણ ચીફ ઓફિસર સાથે રહીને કામ કરવું પડશે.
મુખ્યમંત્રીએ કહ્યું કે, ઘણી વખત ફેરબદલીમાં પ્રમુખોએ ધ્યાન રાખવું જોઈએ. કોઈ વખત આપણને પણ નુકસાન થઇ શકે. જ્યાં છીએ ત્યાં સારુ કામ કરવા માંગીએ છીએ. વહિવટી અને ચૂંટાયેલાને પણ મુશ્કેલી પડી શકે છે. પણ આપણે કામ તો પબ્લિક માટે કરવાનું છે. ખુબ સારી રીતે કામ થઇ શકે તેમ છે. પહેલા પૈસા ઓછા આવતા તો પણ સારુ કામ કરતા હતા હવે તો તકલીફ ન પડવી જોઈએ.
કોઇ નગરપાલિકાને પ્રાથમિક જરૂરિયાત બાકી હોય તે જણાવી દો... : મુખ્યમંત્રી
ગટરલાઇન અને તેની પર રોડ કરવાનો જેવી નપાની નાની મોટી તકલીફો આવતી હોય છે. પોત પોતાની નગરપાલિકા, બેઝિક જરૂરિયાત બાકી હોય તેવી કોઈ નપા છે ? 5 કે 6 નપા છે. આ તમામ અત્યારે મિટિંગ પૂર્ણ થયા બાદ પંકજ જોશીને મળતા જજો. કામો બાકી હશે તે આજે સ્પેશિયલ કેસમાં પૂરા કરી દઇશું. જે કામ હોય તે પૂરુ થઇ જવું જોઈએ. નગરપાલિકા વિસ્તારમાં બેઝિક જરૂરિયાતવાળુ કોઈ કામ બાકી રાખવા માંગતા નથી. કોઈએ અકળામણ રાખવાની જરૂર નથી. તમે બોલો નહીં તો ખબર કઇ રીતે પડે. શેના કારણે બાકી છે તે પછી જોઈશું.