દ્રૌપદી મુર્મુ આવતીકાલે રાષ્ટ્રપતિ પદની ચૂંટણી માટે ફોર્મ ભરશે
રાષ્ટ્રપતિ ચૂંટણીમાં આ વખતે મુખ્ય મુકાબલો દ્રૌપદી મુર્મુ અને યશવંત સિન્હા વચ્ચે છે. ઓડિશાના પૂર્વ મંત્રી અને ઝારખંડના રાજ્યપાલ રહી ચૂકેલા દ્રૌપદી મુર્મૂ એનડીએના ઉમેદવાર તરીકે રાષ્ટ્રપતિ ચૂંટણી લડશે. આવતીકાલે તેઓ રાષ્ટ્રપતિ પદની ચૂંટણી માટે ફોર્મ ભરશે. આ પ્રસંગે સી.આર પાટીલ અને સીએમ ભૂપેન્દ્ર પટેલ NDAના રાષ્ટ્રપતિ પદના ઉમેદવારના સમર્થનમાં હાજર રહેશે.
સીએમ પટેલ-સી.આર પાટીલ કાલે દિલ્હીમાં
24 જૂનના રોજ સીએમ ભૂપેન્દ્ર પટેલ અને ભાજપ પ્રદેશ પ્રમુખ સી.આર પાટીલ દિલ્હીમાં હશે. આવતીકાલે સવારે બંને નેતાઓ દિલ્હી પહોંચશે. મહત્વનું છે કે NDAના રાષ્ટ્રપતિ પદના ઉમેદવાર તરીકે દ્રૌપદી મુર્મુ જ્યારે UPA અને કેટલાક અન્ય પક્ષોએ મળીને જોઈન્ટ ઉમેદવાર તરીકે પૂર્વ ભાજપ નેતા તથા ચંદ્રશેખર અને અટલ બિહારી વાજપેયી સરકારમાં મંત્રી રહી ચૂકેલા યશવંત સિન્હાને જોઈન્ટ ઉમેદવાર તરીકે મેદાનમાં ઉતાર્યા છે
હું આશ્ચર્યમાં છું- દ્રૌપદી મુર્મૂ
રાષ્ટ્રપતિ પદ માટે એનડીએ તરફથી ઉમેદવાર બનાવતા દ્રૌપદી મુર્મૂએ જણાવ્યું હતું કે, હું આશ્ચર્યમાં છું, મને વિશ્વાસ નથી થઈ રહ્યો. હું આપ તમામની આભારી છું. મને વધારે બોલવાની ઈચ્છા નથી. સંવિધાનમાં રાષ્ટ્રપતિની જે શક્તિઓ હોય છે, તે અનુસાર હું કામ કરીશ.
કેન્દ્ર સરકારે આપી ઝેડ પ્લસ સિક્યોરિટી
કેન્દ્ર સરકારે એનડીએના રાષ્ટ્રપતિ ઉમેદવાર તરીકે દ્રૌપદી મુર્મૂને ઝેડ પ્લસ સિક્યોરિટી આપી છે. કેન્દ્ર સરકારે દ્રૌપદી મુર્મૂને સીઆરપીએફ કર્મીઓની ઝેડ પ્લસ સિક્યોરિટી કવર આપ્યું છે. ભારતી જનતા પાર્ટીએ મંગળવારે સંસદીય દળની બેઠક બાદ રાષ્ટ્રપતિની ચૂંટણી માટે એનડીએના ઉમેદવારની જાહેરાત કરી હતી. એનડીએના ઉમેદવાર દ્વૌપદી મુર્મૂનું જીતવું લગભગ નક્કી છે. જો તેઓ જીતી જાય છે તો દેશના પ્રથમ આદિવાસી મહિલા રાષ્ટ્રપતિ હોવાની સાથે સાથે 15માં રાષ્ટ્રપતિ તરીકે તેઓ શપથ લેશે.
દ્રૌપદી મુર્મુ જાણીતા આદિવાસી નેતા
દ્રૌપદી મુર્મુ એક ભારતીય રાજકારણી છે અને 18 મે 2015 થી 2021 સુધી ઝારખંડના રાજ્યપાલ તરીકે રહી ચૂક્યા છે. તેઓ તેઓ પ્રથમ ઓડિયા નેતા છે જેઓ ઝારખંડના ગવર્નર તરીકે રહ્યા છે. તેમણે 2000 થી 2004 સુધી ઓડિશા વિધાનસભામાં રાયરંગપુરથી ધારાસભ્ય અને રાજ્ય સરકારમાં મંત્રી તરીકેની જવાબદારી વહન કરેલી છે.
કોણ છે દ્રૌપદી મુર્મૂ
ઝારખંડના રાજ્યપાલ રહી ચુક્યા છે દ્રૌપદી મુર્મૂ
વર્ષ 2015થી 2021 સુધી ઝારખંડના રાજ્યપાલ રહ્યા
ઓડિસાની સાંતલ આદિવાસી કોમ્યુનિટીમાંથી આવે છે મુર્મૂ
ભારતીય જનતા પાર્ટીમાં સિનિયર નેતાઓમાં સ્થાન પામે છે
વર્ષ 2000થી 2002 સુધી ઓડિસા સરકારમાં ટ્રાન્સપોર્ટ અને કોમર્સ મંત્રી રહ્યા
ઓડિસાની રાયરંગપુર વિધાનસભાથી ધારાસભ્ય પણ રહી ચૂક્યા છે મુર્મૂ