આજે રાજ્યના અનેક વિસ્તારોમાં કમોસમી વરસાદ વરસ્યો છે. ભાવનગર, બનાસકાંઠા, વલસાડ તેમજ સુરેન્દ્રનગર, અમદાવાદ સહિતના વિસ્તારોમાં કમોસમી વરસાદ ખાબક્યો છે.
રાજ્યમાં 53 તાલુકા વિસ્તારમાં નોંધપાત્ર વરસાદ
ભુજમાં 2 ઈંચ વરસાદ, સરસ્વતી તાલુકામાં દોઢ ઈંચ
માંડલમાં દોઢ ઈંચ, હિંમતનગરમાં સવા ઈંચ વરસાદ
આજે રાજ્યામાં 53 તાલુકાના વિસ્તારમાં નોંધપાત્ર વરસાદ વરસ્યો છે. જેમાં ભુજમાં 2 ઈંચ વરસાદ તેમજ સરસ્વતી તાલુકામાં દોઢ ઈંચ વરસાદ નોંધાયો છે. જ્યારે માંડલમાં દોઢ ઈંચ, હિંમતનગરમાં સવા ઈંચ વરસાદ નોંધાયો છે. સિદ્ધપુરમાં એક ઈંચ, દાંતામાં પણ એક ઈંચ વરસાદ પડ્યો છે.
આ વિસ્તારમાં વરસાદ ખાબક્યો
સુરતના માંડવીમાં 0.75 ઈંચ, બેચરાજીમાં 0.75 ઈંચ વરસાદ પડ્યો છે જ્યારે પાટણમાં 0.75 ઈંચ, ડીસામાં 0.75 ઈંચ વરસાદ નોંધાયો છે. દાહોદ, સુઈગામ, સુરતના માંગરોળમાં વરસાદ વરસ્યો છે તેમજ ભરુચના વાગરા, ઉમરાળા, નેત્રંગ, સુબિરમાં વરસાદ ઝાપટ બોલાવી છે. વડગામ, ઈડર, ચોટિલા, દાંતિવાડામાં વરસાદ વરસ્યો છે.
ઘોઘાના ઉખરલા ગામમાં કરા પડયા
ભાવનગર જિલ્લાના વાતાવરણમાં એકાએક પલટો આવ્યો છે. ગ્રામ્ય વિસ્તારમાં ભારે પવન સાથે કમોસમી વરસાદ પડ્યો છે. ઘોઘાના ઉખરલા ગામમાં કરા પડયા છે. કેટલાક ગામોમાં આકરા તાપ વચ્ચે વરસાદી માહોલ જોવા મળી રહ્યો છે. વાવાઝોડા સાથે માવઠું પડતા ખેડૂતોને પાક નિષ્ફળ જવાની ભીતિ સેવાઈ રહી છે. ભાવનગરના ત્રાંબક ગામમાં કરા સાથે વરસાદ પડ્યો છે. પાક નિષફળ જતા ખેડૂતોમાં ચિંતા પ્રસરી છે. બપોર બાદ વાતાવરણમાં પલટો આવતા કરા પડ્યા છે. કમોસમી વરસાદથી ખેડૂતોની હાલત કફોડી બની છે.
અંબાજીના દાંતા પંથકમાં વરસાદી માહોલ
બનાસકાંઠાના અંબાજીમાં ભર ઉનાળે ચોમાસા જેવી સ્થિતિ નિર્માણ પામી છે. અંબાજીના દાંતા પંથકમાં વરસાદી માહોલ જામ્યો છે. ભર ઉનાળે ચોમાસા જેવું વાતાવરણ સર્જાયું છે. કમોસમી વરસાદ આવતા ખેડૂતોની ચિંતા વધી છે.
સુરેન્દ્રનગરમાં ભારે પવન સાથે વરસાદ
સુરેન્દ્રનગર જિલ્લામાં ભારે પવન સાથે કમોસમી વરસાદ વરસ્યો છે. ભર ઉનાળે વરસાદ પડતા ખેડૂતોની ચિંતામાં વધારો થયો છે. ઘઉં, જીરુ, અને ધાણાના પાકને ભારે નુકસાન થવાની ભીતિ સેવાઈ રહી છે. કમોસમી વરસાદને કારણે ખેડૂતોને મોટાપાયે નુકસાન થયું છે. અમદાવાદ સહિત રાજયમાં વરસાદી માહોલ છવાયો છે. અમદાવાદના ગ્રામ્ય વિસ્તારોમાં વાતાવરણમાં પલટો આવ્યો છે. ઘાગંઘ્રાના ગ્રામ્ય વિસ્તારોમાં પવન સાથે મેઘરાજાનું આગમન થયું છે. કમોસમી વરસાદને લઈ જગતનો તાત ચિંતીત બન્યો છે
વલસાડના વિવિધ વિસ્તારોમાં વરસાદ
વલસાડ જિલ્લામાં બપોર બાદ વાતાવરણ પલટાયું છે. કપરડાના સુથારપાડા સહિતના વિસ્તારોમાં વરસાદ વરસ્યો છે. આગાહી બાદ વરસાદ પડતા ખેડૂતોની મુસીબતમાં વધારો થયો છે. કેરી અને કઠોળના પાકને મોટાપાયે નુકસાન થવાની ભીતિ સેવાઈ રહી છે. વરસાદ થતા શાકભાજીની જીવાત અને ફૂગમાં વધારો થયો છે.
કચ્છમાં સતત બીજા દિવસે વરસાદી માહોલ
કચ્છમાં સતત બીજા દિવસે વરસાદી માહોલ શરૂ થયો છે. પવન સાથે કમોસમી વરસાદને કારણે ખેતીને નુકસાન થયું છે. ભુજના થરાવડા,અબડાસાના ઉસ્તીયા સહિતના વિસ્તારોમાં વરસાદ વરસ્યો છે. ગાગોદર વિસ્તારમાં કરા સાથે વરસાદ પડ્યો છે.
ભરૂચમાં પણ પવન સાથે વરસાદ
ભરૂચના જંબુસરમાં વાતાવરણમાં એકાએર પલટો આવ્યો છે. ગ્રામ્ય વિસ્તારોમાં પવન સાથે વરસાદ પડ્યો છે. ટુંડજ સહિતના ગામોમાં કમોસમી વરસાદ પડ્યો છે. માવઠાને લઇ ખેડૂતોની ચિંતામાં વધારો થયો છે. રાજ્યના કેટલાક જિલ્લાના વાતાવરણમાં પલટો જોવા મળી રહ્યો છે. સુરતના માંગરોળ તાલુકાના વાતાવરણમાં પલટો આવ્યો છે. કોસંબા વિસ્તારમાં કરા સાથે વરસાદ પડ્યો છે. ભર ઉનાળામાં ચોમાસા જેવો માહોલ સર્જાયો છે. કમોસમી વરસાદના કારણે ખેડૂતોમાં ચિંતા પ્રસરી છે.
જામનગરમાં વરસાદ
જામનગરના લાલપુર તાલુકામાં કમોસમી વરસાદ વરસ્યો છે. હરીપર ગામના વાતાવરણમાં પલટો જોવા મળ્યો છે. બરફના કરા સાથે વરસાદ વરસતા ખેડૂતોની ચિંતા વધી છે.
દ્વારકામાં વરસાદ
દ્વારકા જિલ્લામાં કમોસમી વરસાદ વરસ્યો છે. ખંભાળિયાના ભટ્ટમાં કરા સાથે કમોસમી વરસાદ ખાબક્યો છે. કલ્યાણપુરના ગઢકા અને પટેલકા ગામમાં પણ વરસાદી માહોલ જામ્યો છે. ખંભાળિયા તેમજ કલ્યાણપુર તાલુકાના વિસ્તારમાં વરસાદ વરસ્યો છે. માવઠાના કારણે ખેડૂતોની હાલત કફોડી બની છે.
અમદાવાદમાં વરસાદી માહોલ
અમદાવાદ શહેરમાં કમોસમી વરસાદ વરસ્યો છે. શહેરમાં વાદળછાયું વાતાવરણ છવાયું છે. શહેરમાં પવન સાથે ધુળની ડમરીઓ પણ ઉડી છે. બોડકદેવ,માનસી ચાર રસ્તા,યુનિવર્સિટી વિસ્તારમાં વરસાદી માહોલ જામ્યો છે. આશ્રમરોડ અને સરખેજ તેમજ નારોલ, નિકોલમાં વરસાદી માહોલ છવાયો છે
પાંથાવાડા ,મંડાર પંથકમાં કરા સાથે કમોસમી વરસાદ
ગુજરાત રાજસ્થાન બોર્ડર નજીકનાં વિસ્તારમાં વરસાદી માહોલ જામ્યો છે. પાંથાવાડા ,મંડાર પંથકમાં કરા સાથે કમોસમી વરસાદ ખાબક્યો છે. કરા અને પવન સાથે કમોસમી વરસાદનું આગમન થયું છે. કમોસમી વરસાદ પડતા ખેડૂતોના જીવ પડીકે બંધાયા છે. ખેતરમાં ઉભેલા ઘઉંના પાકને નુકશાન થવાની ભીતિ ખેડૂતો સેવી રહ્યાં છે.